Clipper
Clipper 係一隻喺DOS環境之下行嘅高級編譯語言，專係用來整處理資料庫嘅應用程式（即係例如客戶管理系統、員工資料管理系統之類），屬於所謂 xBase 語系，所謂 xBase 即係 ｢類似 dBase｣，特別係除咗可以用 dBase 嘅檔案格式之外，語法亦都係基於 dBase，並且喺某程度上保持咗同 dBase 語法嘅兼容。因為編譯咗嘅執行檔一般用家改唔到，喺大公司、政府部門等等地方嘅IT部門中意用，曾經係IT界流行嘅語言。
雖然 Clipper 係 xBase 語系，但係實際上 Clipper 程式同 dBase 程式喺寫法上可以有好大出入，其中一個原因係佢有一啲 dBase 冇嘅資料類型，特別係碼塊（類似Λ演算講嘅 closure）；另外，好多喺 dBase 入面係命令式嘅嘢，喺 Clipper 都可以寫成函數叫用。
除咗咁之外，雖然 Clipper 寫嘅程式可以用 dBase 嘅檔案格式，但係實際上 Clipper 有自己研發嘅索引格式，通常唔會用 dBase 格式嘅索引。所以 Clipper 寫嘅程式通常唔會喺同一個區域網絡同 dBase 溝亂用。
Clipper 本來係一間美國嘅細公司 Nantucket 嘅產品，個名指喺 Nantucket 會見到嘅一種行得快嘅帆船，暗喻編譯咗嘅程式會行得快。間公司後來被 Computer Associates 買咗。
