G 力

G 力（英文：gravitational force equivalent，g-force）係指造成「有重量」嘅感覺嘅加速度（每單位質量嘅力），當中 1 個單位嘅 G 力相當於一般地球環境下人感覺到嘅重力加速度。

過山車分析

睇埋：過山車物理

工程師設計過山車嗰陣成日會考慮 G 力。

打戙嘅 G 力係指（由乘客嘅角度睇）向上或者向下嘅 G 力：

• 正 G 力係指「由上而下」嘅 G 力－當一架列車向下衝去到最低點，下一刻要向前直去嗰陣，乘客同列車嘅慣性會令佢哋傾向繼續向下郁，但條路軌變平咗令到佢哋冇得繼續向下郁，於是乘客就會感受到一股向上嘅力（好似下圖嗰個淺綠色箭咀噉）；過山車設計上認為，有返咁上下勁嘅正 G 力（明顯大過 1 G）係可以令乘客有興奮嘅感覺嘅，但勁得滯嘅 G 力可以危害人命－一般嚟講，超過咗 5 G 咁勁嘅正 G 力經已可以令人暈低，而一過咗 10 G，冇著特別保護裝備嘅人就會死亡。下圖個深綠色箭咀係乘客同列車嘅重量。

• 負 G 力係指「由下而上」嘅 G 力－當一架有返咁上下動能嘅列車衝上斜，去到最高點嗰陣，乘客同列車嘅慣性會令佢哋傾向繼續向上郁，但條路軌變平或者開始向下斜令到佢哋冇得繼續向上郁，於是感受到一股向下嘅力（下圖班乘客仲舉高埋雙手），會或多或少噉有股「飄浮緊」嘅感覺；過山車設計上認為，負 G 力可以令乘客有無重感同興奮感，但亦有一定嘅危險性－一般嚟講，負 G 力大過 2 G 經已會出現流鼻血等嘅徵狀，大過 3 G 就會令個人視力模糊，而過咗 5 G 就有可能會冇咗對眼珠同死亡。

打橫嘅 G 力會喺架列車掟彎嗰陣出現－想像家陣有架列車以快嘅速度向前衝，然後條路軌轉彎，架列車就要跟住轉，同時乘客同列車嘅慣性會令佢哋傾向繼續向前郁，但路軌方向變搞到佢哋焗住要跟住方向變，於是感受到一股打橫（向左或者右，視乎條路軌轉邊面）嘅力；一般嚟講，打橫嘅 G 力係過山車工程師想避免嘅嘢－經驗表明，打橫嘅 G 力勁過 0.2 G 經已會令乘客覺得頭暈甚至想嘔，而呢種體驗一般都唔係過山車想追求嘅興奮感；因為噉，喺過山車設計上，架車掟起彎上嚟（尤其係如果掟彎嗰陣速度會快）會用到傾斜轉彎（banked turn）嘅技術，意思即係條路軌會咬彎少少，等架列車以傾斜咗嘅姿勢嚟掟彎（好似下圖嗰個例子噉），令到一部份嘅打橫 G 力變成正 G 力，減低乘客頭暈唔舒服嘅危險。