肝

  想搵第二個意思嘅話，請睇肝 (搞清楚)。

肝又叫肝臟（英文：liver），係一種內臟，多數係有脊骨嘅動物先有，係極之重要。肝有極多用處，最明顯係解毒、造蛋白質、造消化用嘅物質。無咗肝係會死，家下都無嘢可替肝嘅功用。

肝
生理
屬於	消化系統
位置	abdominal cavity[*]
識別碼
UBERON ID	0002107
TA	A05.8.01.001
[改維基數據]

羊肝

肝響新陳代謝有好重角色，重識儲肝醣、分解紅血球、造血清蛋白、造激素、重有解毒。肝係人至大嘅腺，響肚入便，橫膈膜以下。佢識整帶醶性嘅膽汁，可以令脂肪同水撈埋同打散，幫助消化。佢又會搞同控制大量好多唔同類嘅生化反應，用到肝嘅特別組織。

名

肝喺西洋醫學來講，中意用hepato-或者hepatic來表示。呢個查實來自希臘文hēpar (ήπαρ)，係肝嘅意思。

結構

肝係一個啡紅色楔型嘅器官，可以分為形狀大細唔同嘅兩葉。人類嘅肝通常重1.5公斤（3.3磅），闊15 厘米（6吋）左右。唔同人嘅肝大細可以差距好大，標準嘅參考範圍係：男970-1860克（2.14–4.10磅），女600-1770克（1.32–3.90磅）。佢係人體最重嘅器官，亦係最大嘅腺體。位處於腹腔右上角，橫膈膜之下，胃嘅右邊，覆蓋着膽囊。

• 供血：肝接駁着雙重血供—肝動脈源自腹腔動脈，負責供給帶氧血；門靜脈負責供給喺消化系統收集返嚟、充滿營養嘅血。肝處理完呢啲血之後，就會經幾條肝小靜脈直接送去下腔靜脈。
• 表面：從頭頂睇，肝臟俾鐮狀韌帶分開兩瓣，叫左葉同右葉。喺腳板嗰邊望上去，喺左右兩葉之間仲夾住多前後兩瓣，近肚皮嗰瓣呈四邊形、叫肝方葉，近背脊個瓣叫肝尾葉。
• 分段：Couinaud系統根據門靜脈分支嘅分佈，將功能分葉再細分成8個子段。每個子段嘅中央係門靜脈、肝動脈、同膽管，外周就有肝靜脈。8個子段由羅馬數字I - VIII標識。I段嘅係尾葉，比較特別嘅係佢同時接受門靜脈左右兩支嘅供血。其餘就從正面望，以順時針編II - VIII段。

病

• 肝炎：最常見係病毒肝炎，分甲乙丙丁戊五種。甲戊多數經食物感染。乙、丙型由血液或者性交傳播，通常係慢性感染，而且會導致肝癌。丁型只有喺已經感染咗乙型肝炎嘅時候先會感染，係衛星病毒。另外亦有細菌或者寄生蟲引起嘅肝炎。
• 肝癌：最常見係肝細胞癌，佔肝臟癌症嘅10%，所以提到肝癌嘅時候通常係指肝細胞癌。除此之外亦有膽管細胞癌，其他細胞引起嘅就比較少見。
• 肝纖維化、肝硬化：雖然肝臟自我修復能力好勁，但係長期傷害到嘅話都會頂唔到、無辦法再生啲肝細胞，唯有生啲纖維組織去撐住個結構。
• 脂肪肝：肝臟積聚太多脂肪肝，有可能係酗酒或者肥胖引起，嚴重嘅話會導致肝硬化或者肝癌。

嘢食

食得嘅肝多數叫做膶，係廣東話入邊嘅一種諱語嚟。