Mayday

「Mayday」（萬國音標：/ˈmeɪdeɪ/）係無線電求救信號裏面最緊急嘅一個信號。當一隻船或者一架飛機發出「Mayday」訊號嘅時候，即係話如果唔即刻採取行動，就會有人命傷亡。宜家，警察同消防員有時都會用「Mayday」表示需要馬上支援。

來源

目前最多人接受嘅講法係：「Mayday」來自法文「Venez m'aider!」（「來幫我！」）入面嘅「m'aider」（法文發音：/mɛˈde/），係英國倫敦古萊頓機場（Croydon Airport）嘅高級無線電通訊員費德歷•史丹利•莫霍德（Frederick Stanley Mockford）喺1923年首先使用嘅。當時，機場空管要求莫霍德創造一個畀機師同埋地勤用來緊急求救嘅詞，要簡單明瞭。由於當時大部份飛機都係來往倫敦同法國巴黎嘅，因此莫霍德就用咗來自法文嘅「Mayday」。

使用

由於Mayday訊號嘅嚴重性，祇有嚴重事故，例如着火、爆炸、（船）下沉、燃料耗盡等等，對機/船上人員構成即時生命威脅，而且駕駛員無辦法自救嘅時候，先至可以發Mayday訊號。發虛假求救訊號唔單止浪費資源，重可能延誤真正有需要嘅救援，所以喺好多地方都係刑事罪行。而另一方面，由於Mayday訊號嘅嚴重性，如果一隻船或者一架飛機發出Mayday訊號，其他船/飛機就要全部避讓，畀出事船隻先緊急靠岸，或者畀出事飛機緊急降落。唔避讓係違反國際民航規則嘅行為。

Mayday訊號喺任何頻道都可以被人聽明，但係大部份航空或海事搜救組織都有人24小時監聽緊急頻道。

發出「Mayday」訊號嘅時候，一定要重復「Mayday」三次，然後根據以下格式來講明緊急狀況：

Mayday！Mayday！Mayday！（航管中心代號）（航班代號同埋飛機/船隻型號）We're declaring an emergency！（描述緊急狀況）（描述駕駛員意圖）

例子：

Mayday! Mayday! Mayday! Canton Tower, this is WikiAir 009. We're declaring an emergency! We have only 6 minutes of fuel remaining on board! Requesting emergency landing at Canton Airport!

根據唔同緊急狀況嘅需要，控制中心重會要求駕駛員提供以下資料：

• 乘客人數以及傷亡狀況
• 宜家嘅位置/上一次定位嘅位置同埋航向
• 飛行高度
• 剩返幾多燃料
• 其他有用嘅資訊

接力求救

一隻船因為某啲原因發唔到Mayday訊號嘅話，可以通過其他方式（例如煙花）求救。其他船或者飛機如果見到一隻船放煙花求救，應該馬上呼叫通知控制中心。如果喺無線電裏面聽到一部船或者一架飛機發Mayday訊號，但係控制中心過咗兩分鐘都未回應嘅話，應該嘗試代為呼叫控制中心。

無線電靜默

控制中心或者搜救機構收到Mayday訊號之後，可以用「Silence, Mayday.」（根據國際規則，「silence」要用法文發音/siˈlɑ̃s/；意思係「靜默，收到Mayday求救訊號」）或者「Silence, détresse.」（法文發音/siˈlɑ̃s deˈtʀɛs/，意思係「靜默，收到緊急求救訊號」）。</ref>要求無線電靜默。喺無線電靜默期間，祇有搜救機構同出事船隻/航班可以用伊個頻道通話，其他船或者飛機要轉用其他頻道，直到控制中心或者搜救機構宣佈「Silence finit.」（法文發音/siˈlɑ̃s fiˈni/；意思係「靜默結束」）。

睇埋

• Pan-Pan，無Mayday咁嚴重嘅緊急求救訊號。
• 2011年吉祥航空拒絕避讓事件，民航史上第一單聽到Mayday都唔避讓嘅事故。