中繼資料

中繼資料（英文：metadata），又叫詮釋資料、中介資料、元資料、後設資料等，係泛指任何描述資料嘅資料。

喺2010年中繼資料通常係數碼形式；而喺1960同70年代嘅傳統卡片目錄，都係中繼資料嘅例，因為呢啲卡片包含有關圖書館資料嘅資料（作者，標題，主題等）。

基本概念

以圖書館學做例子，假設有一本書，如果本書嘅實體或者書嘅內容係資料，咁書名就會係中繼資料，因為佢描述本書，但係唔係書本身；書嘅尺寸、頁數、用乜語言寫、分類係乜、ISBN 幾號等等亦都係中繼資料，可以幫人搵嗰本書或者判斷本書啱唔啱用，但係唔係內容本身。

用點陣圖做例子，如果幅圖嘅像素係資料，佢嘅大細會係中繼資料，因為佢唔係像素本身，但係冇佢就詮釋唔到啲像素。但係如果像素加尺寸係資料，咁佢嘅色彩空間就可能係中繼資料。但係如果呢三樣嘢同其他所有需要嘅嘢擺埋哂入一個檔案，咁像素、尺寸同色彩空間就變成都係資料，但係檔案名、檔案大細、日子時間同（如果有咁嘅支援）檔案系統入面嘅標籤就會係中繼資料，因為呢啲可以幫人搵幅圖，但係唔係幅圖本身。

又或者以電訊做例子，例如你打電話，對方嘅電話號碼可能算係中繼資料，但係以對方嘅角度，你嘅電話號碼就變成中繼資料，因為佢會睇你個電話號碼係乜而決定接唔接個電話，但係以電話公司嘅角度，你同對方嘅電話號碼都係中繼資料，因為唔係通訊內容本身，但係冇齊兩個號碼，電話公司就駁唔到線。或者可能你嘅通話對方做緊研究或者藝術創作，想記低哂所有收到嘅電話號碼，咁係佢個 project 嘅角度，你個電話號碼就直情係資料，唔係中繼資料。

換句話講，乜嘢係中繼資料，係取決於資料係乜，同情況係點；同一樣嘢，喺某個情況可以係資料，換第個情況，佢可以變成中繼資料。日常生活中講某樣嘢係中繼資料，其實係假定咗某樣其他嘢係資料本身。

分類

根據美國嘅 NISO（國家資訊標準組識），中繼資料可以分三大類，分別係記敘性中繼資料、結構性中繼資料同管理性中繼資料。

• 記敘性中繼資料描述咗用喺發現同辨別意義嘅資源。佢可以包含好似標題、摘要、作者同關鍵字等元素。

• 結構性中繼資料係有關於資料容器嘅中繼資料，指示點樣整理複合嘅物件。

• 管理性中繼資料係用喺管理資源嘅資訊，例如資料產生嘅時間同方式、檔案類同其餘技術資訊，同埋邊個有權限存取佢。喺啲國家，有關於Email、電話、網頁、IP連結同手機位置嘅中繼資料係固定由國家嚟儲存嘅。