Sans (Undertale)

Sans係2015年出版電腦遊戲Undertale嘅其中一個角色。佢都喺相關嘅遊戲Deltarune出現過。

Sans喺遊戲入面嘅外貌。

荷蘭鹿特丹嘅一個動漫展，有扮演者扮Undertale嘅角色，其中Sans企喺最左邊。

人物檔案

Sans係一隻骷髏骨頭，亦都係Papyrus嘅哥哥，身材矮細，好鍾意講笑話。雖然佢嘅對話大多數都係用Comic Sans MS字體造成，但係當佢認真，或者喺某啲特別情況之下嘅時候，佢嘅對話就會用到遊戲嘅預設字體。

佢對時間嘅認知好好，所以喺屠殺路綫會係最後嘅大佬。佢嘅大佬戰被譽爲遊戲入面最難嘅一關，連埋戰鬥歌「MEGALOVANIA」一齊俾唔少人攞嚟做網絡Meme。

歷史

托比·霍士由漫畫家J.N. Wiedle嘅漫畫Helvetica得到啟發，漫畫講關於一隻叫做Helvetica嘅骷髏骨頭。嗰隻骷髏骨頭同一種電腦字體同名，於是托比就創造咗兩個由另外兩種電腦字體改名嘅骷髏骨頭角色-Sans同埋Papyrus。Papyrus嘅對話大多數都係用Papyrus字體造成。