Save HK

Save HK係一個香港親中派網上群組，截至2020年12月有近20萬名會員。

關於創辦人

創辦人何敬康曾經喺新疆經商近十年。另外，佢係現任香港立法會議員，亦係澳門前行政長官何厚鏵個姪。

政治立場

Save HK網上群組入面嘅成員係以親中派為主，入面有唔少針對民主派，同埋形容親民主派人士係曱甴嘅非人化言論。另外，佢哋亦有時會發放一啲偏幫香港政府或中國品牌嘅消息。

部分成員喺群組入面分享虛假信息

唔止一次有新聞工作者公開批評，Save HK入面不時有成員分享虛假信息。

例如，喺2020年9月，包括Save HK 在內嘅一啲親中派網上群組，都流傳咗一張疑似立法會議員林卓廷Facebook專頁嘅截圖，圖入面林聲稱自己將親自到廣東協助12位被內地扣留人士（見12港人案），但事實上林卓廷因為七二一元朗襲擊嘅案件，要交出旅遊證件，根本無法離港。FactWire嘅記者亦查證過，佢嘅Facebook並無呢個帖。

另外，Save HK亦有會員曾經被批評，喺一啲涉及警察懷疑遇襲嘅案件入面，刻意曲解裁決理由。例如明明呈堂證供影片根本無拍到警員遇襲，但入面嘅討論就講到裁判官睇完片段點樣評論警員遇襲後嘅表情。

去到2022年9月，Save HK群組入面有人聲稱以華為手機拍攝月亮，當中內文大讚華為手機影得靚過單鏡反光機，又話當時新出嘅iPhone車尾燈都睇唔到。但之後求驗傳媒就揭發內容做假，早嗰張相喺2017年已經存在，亦係當年iPhone嘅Wallpaper之一。

否認新疆種族滅絕

新疆維吾爾族人受到中共嘅大清洗，受到迫害、強迫勞動、宗教歧視等議題，喺2014年起開始受到關注。而美國兩任國務卿蓬佩奧同布林肯，都將中國針對新疆維吾爾族嘅行為定義為「種族滅絕」。不過，創辦人何敬康喺2021年2月接受葉劉淑儀訪問嘅時候，就話中國喺當地係促進族裔融合，而唔係種族滅絕。

扼殺香港觀眾對俄烏戰爭俄軍暴行知情權

2024年11月4號起，無綫電視喺81台夜晚十點半播出由黎芷珊主持嘅實地採訪綜藝節目《戰場上》，但係個節目只係播左兩集，因為只係暴露左俄軍喺烏克蘭點對當地人無差別綁架以至殺害嘅暴行，就比Save HK facebook群組班激進支持者，以偏概全噉話個節目「偏頗」，話佢冇由俄羅斯一方嘅角度睇成單戰爭，「散播烏克蘭係戰爭受害者」嘅訊息（實際上，俄羅斯同俄軍嘅侵略同殘忍暴行，已經畀國際社會公認咗做戰爭同反人類行為），喺Save HK等親中共網民嘅持續攻擊同向無綫施壓下，個節目最終腰斬咗，令到觀眾對俄軍暴行嘅知情權畀人扼殺咗。。