TC Candler
TC Candler係個美國娛樂媒體，本身做電影評論，自1990年開始每年搞「全球百大型男」（The 100 Most Handsome Faces）同「全球百大美女」（The 100 Most Beautiful Faces）選舉而出名。2022年之前，入圍者同獲選者都係由TC Candler自己揀嘅。但係2022年嗰屆增設咗「課金提名」制度，只要去訂閱佢個Patreon畀月費，就有得提名同投選，令獲提名人數大幅增加，同時令呢個獎嘅公信力大減。
香港入圍者 編輯
2022年之前，亦即係未有「課金提名」制度嘅時期，香港藝人當中就只得演員陳靜入圍過，喺2012年頭一次入圍嗰陣更成功入選第44位，之後喺2020到2021年都有試過入圍（但未入選百大）。
2022年春季，MIRROR成員相繼入圍，一度引起香港傳媒廣泛關注，之後發現原來TC Candler呢屆增設咗「課金提名」制度，及後亦有更多香港男女藝人靠課金入圍，但因為公信力成疑，提名期中後期逐漸無乜香港主流媒體再熱衷關注。最終2022年有4位香港男藝人[註 1]同3位香港女藝人成功打入百大：男嘅包括MIRROR成員姜濤（第5）、盧瀚霆（第16）、江𤒹生（第32）同呂爵安（第73）；女嘅包括無綫合約藝員曾淑雅（第41）、COLLAR成員許軼（第62）同模特兒譚旻萱（第68）。
2023年，原先4位香港男藝人都成功冧莊留喺百大，但女藝人就冇人留低，得蔚雨芯一個新晉百大。
