Talk:𠊎族
 | 呢篇文係2016年維基百科亞洲月嘅作品之一。 |
|
𠊎族嘅資訊曾經響2016年11月7號喺維基百科頭版嘅你知唔知？小節度出現過。 |  |
編寫手記 編輯
族名、漢喃附錄 編輯
越南文嘅Ngái純粹係記音，即係用國語字記客家話嘅音，所以呢度採用客家話嘅本來寫法作爲族名。呢個Ngái好明顯就係客家話第一人稱單數詞「𠊎」（人字邊嘅厓），因爲呢隻客家字一般唔係咁易打出，所以網絡上一般用「涯、崖、艾、亻厓」呢啲方式來寫，所以呢度都用呢幾種方式開跳轉。
因爲越南文純粹係記音，喺正文寫漢喃唔係咁大必要，所以將漢喃寫法補喺呢度。người即係「𠊛」，意思係「人」，Ngái寫出嘅字有「𥇹、𣝅」兩個，「𥇹」意思係眼瞓，「𣝅」係種榕樹嘅名。
Ngái Nhằn一詞，Nhằn疑似係粵語音，但又唔係十分之相似，似係帶口音嘅粵語，推計呢個詞應該係「𠊎人」。Nhằn對應嘅喃字有「㗴、𠡛」兩個，「㗴」意思係怨氣，「𠡛」意思係攰。
Ngái Lầu Mần一詞好明顯係「𠊎流民」，好明顯嘅粵語音，呢個名應該同佢哋作爲客家人嘅歷史有關。Lầu只有「樓」字，Mần有「摱、𪡯」兩個，「摱」意思係「做」、「𪡯」意思係「圓形」。
越文版寫又有別名「Sín」，但呢個Sín有音無字，搵咗陣互聯網亦無搵到解釋呢個名嘅意思或來由，從個發音我亦估唔到係個咩字，所以無譯到。
Đàn一詞應該就係「蜑」，因爲𠊎族來源有部分疍家人。Đàn有「壇、彈、樿」三個，前兩個字同中文一樣，「樿」意思係桉樹。
Lê一詞係「黎」字嘅標準漢越音，而且𠊎族有講黎話（黎話見下面）嘅人群來源。
Sán Ngái一詞越文版本身就畀出漢字「山涯」，即係「山𠊎」，意思係「山民」，衆所周知客家人係山地族羣。Sán有「趁、棧、汕、燦、璨、疝、粲、訕、鏟」九個，意思全部同中文一樣。另，越文嘅Sán Ngái và亦係記音，好明顯對應嘅字係「山𠊎話」。
--S7w4j9 (傾偈) 2016年11月5號 (六) 14:33 (UTC)
話 編輯
據越文版維基填咗模嘅語言欄，其中「臺山話」對應嘅內容係phương ngữ Thái Sơn，Thái字可能寫錯，應該係Đài，所以臺山話嘅內容係從中文維基得來。
現時所知，𠊎族當中有部分人係疍家，所以有啲人講粵語唔出奇，更何況𠊎話受過粵語影響，所以上述有啲名會係由粵語推測。
從客家話維基百科嘅《𠊎話》一文睇到話，𠊎話同黎話有接觸，而黎話係閩南話一支，我採信咗佢，認爲中維喺相關種族一欄填「黎族」唔妥，因爲黎人係海南島先有嘅民族，應該唔會有咩理由過海去越南。呢度嘅「黎」應係指黎話人群。
𠊎話好明顯係漢藏語，越文版寫「Dao Xa」（瑤畬）係錯嘅。寫嘅人應該係知道「畬客一體」，但唔知道畬族人而家大部分講客家話，真正嘅畬語係瀕危語言，只喺增城正果等少數嘅村有啲老人家識講呢種話，呢個畬語先係真正嘅瑤畬語。另，中維有《畬語》同《畬話》兩篇文章，清楚講明，畬語係苗瑤語，畬話係漢藏語，一般認爲畬話係客家話嘅變體（亦有認爲係漢化咗嘅、遺留大量畬語底層嘅語言）。佢入面提到山客，睇下面《山客同山哈》嘅註文。
--S7w4j9 (傾偈) 2016年11月5號 (六) 14:33 (UTC)
𠊎字讀音 編輯
雖然「𠊎」係客家話，但實際上有啲粵語用呢個詞，比如廣州北郊鄉鎮嘅話到花都一帶嘅話，因爲呢帶嘅話受客家話影響，唔講「我」，講「𠊎」，佢哋要寫自己嘅粵文，呢個客家字可以用得到。（透個底，我就係北郊人，所以北郊話、花都話我幾熟下）。
關於「𠊎」嘅聲調，攞北郊嘅江村話爲例，據陳衛强嘅《廣州地區粵方言語音研究》一書嘅記載，江村話嘅九聲調分別嘅調值係55、35、33、22、11、21、5、3、2（按粵拼順序），可以見到，陰聲調、入聲調部分同廣州話一樣，陽聲調好唔同，喺廣州話中21同11互爲變體，但江村話中係兩個唔同聲調，陽平同陽去嘅調值啱好互換。
喺我嘅聽辨中，江村話「𠊎」嘅發音應係11調，即係陽上聲，呢個亦好有道理，因爲客家話嘅「𠊎」本來就係從中古音嘅「我」分化形成，中古音嘅「我」大概讀音係[ŋɑ]，主元音高化，會變成[ŋɔ]，呢個係廣州話嘅變化，增添音素，變成[ŋai]，呢個係客家話嘅變化。我字喺中古音讀上聲，因爲陰陽分化，作爲濁聲母字派入陽聲調，於是變爲陽上。
綜上，我諗「𠊎」字嘅定音應該可以定爲ngaai5。
--S7w4j9 (傾偈) 2016年11月5號 (六) 14:33 (UTC)
山客同山哈 編輯
據文章《HAK-KA與SAN-HAK──客家稱謂的由來及本義考》（互聯網可以搵到呢篇文章來睇），畬人所自稱嘅「San-hak」，對應嘅字係「山客」，意思係「住喺山嘅客人」，「山客」係1950年代嘅習慣寫法，1980年代以來習慣寫「山哈」。我呢度用返1950年代嘅寫法，因爲用粵語無論發音、意思都對得上，而「山哈」更多似乎係普通話遷就畬話發音而成嘅，因爲「客」普語讀kè，「哈」字讀hā，可以睇到hā比kè近似hak嘅發音。另，《畬話》畀嘅音標係[saŋ44 xaʔ5 uə21]，「客」字有喉塞，表明係入聲。
不過越南文寫成Sán Há，「客」音無用到帶喉塞嘅嗰兩個聲調，我諗可能係因爲嗰兩個聲調音域偏低，所以用音域偏高嘅銳聲來記音。
嗰篇文章講到畬人嘅自我認知：「我可以係漢族，亦可以係畬族，但一定係客家」，或者讀者可以從呢句話感受到乜嘢叫做「畬客一體」啦。
--S7w4j9 (傾偈) 2016年11月5號 (六) 14:33 (UTC)
舅 編輯
越文原文有句：Ông cậu gọi là khảo。意思係「舅父稱呼做khảo」，呢個khảo應該係𠊎話記音，從發音推測應該係「舅」字。唔知係咪粵西片客語嘅特殊發音，查粵東客語，舅字大概發kiu1。存疑。
--S7w4j9 (傾偈) 2016年11月15號 (二) 10:17 (UTC)
唱歌 編輯
越文原文：gọi là Sường cô（嗌做Sường cô）——Sường cô明顯係記音，從發音推測字係𠊎話嘅「唱歌」。另，呢句嘅前句有詞giao duyên nam nữ（交緣男女），亦即「男女交緣」，呢度譯爲「男女交往」，但其實「交緣」呢個詞更妙。