三位一體

三位一體係基督教神學術語，佢嘅意思就係聖父、聖子、聖神（天主教會譯為聖神，東正教會同新教就譯為聖靈）係同一個本體（本性）、三個唔同嘅位格，啲人用希臘語homoousios 來表達佢哋之間嘅關係。三個位格係同一本質同埋同一屬性。通俗啲講，只有獨一一個天主；聖天父完全係天主，聖子完全係天主，聖神完全係天主；聖天父唔係聖子，聖子唔係聖神，聖神唔係聖天父。

雖然「三位一體」呢個詞語係後來神學家歸納出嚟，而唔係直接出自《新約聖經》原文，但係三位一體嘅理論基礎係建基於新約聖經嘅經文同神學觀之上。其中包括喺馬太福音28:19：「所以你們要去、使萬民作我的門徒、奉父、子、聖靈的名、給他們施洗」，經文入面嘅「名」係單數。三位一體嘅支持者指聖父、聖子、聖靈係共用上帝個名。一啲經文亦都被人覺得係隱含三位一體嘅思想，教父同護教士加以立論同宣講。經過漫長嘅紛爭加上逐漸發展，「三一論」將三位一體嘅神學思想體系化，詳細闡述咗有關三位一體呢個信條嘅教義，亦避免咗將天主陷於形態論或者三神論嘅極端，保護三位一體嘅神學思想留存。

根據《聖經》記載，耶穌冇反對猶太人相信嘅獨一真神；耶穌及使徒都冇直接倡導三位一體。喺三位一體神學觀念嘅形成過程中，不斷有一啲基督教教派同個別人士否定呢個教義，有啲更認定呢個唔係基於聖經嘅錯誤主張。經過幾個世紀嘅爭議同發展，而家大部分基督宗教嘅教會都接納三位一體係傳統教義之一；反對嘅就支持「一位格論」，否定三一論。

傳統天主教會將聖神降臨節第一主日定為三一主日，紀念天主聖父、聖子、聖神係三位一體。