三番起糊

三番起糊，「糊」亦有寫做「胡」，即「三番起胡」，係一個麻雀術語，亦係廣東十三張麻雀一種牌例，意思係三番以下唔畀食糊，食咗當詐糊。通常三番起糊都會跟「最大八番」，即係八番以上全部當八番計，亦有「最大十番」。

特式

三番起糊係廣東十三張麻雀特有嘅牌例，由於廣東牌打十三隻，要完成「四搭一對」食糊並唔困難，為咗唔想開枱鋪鋪只係鬥快食糊，於是就有人定咗「三番起糊」呢條例出嚟，等打牌唔單止鬥快，重要鬥副牌靚，不過由於十三張蔴雀番數可大可小，小到幾十，大到幾十萬都有，所以就有人定多條「最大八番」嘅例，就算食出大牌，都唔使輸到要無鞋挽屐走。

不過亦有啲人打衛生麻雀，只係想追求食糊快感，所以唔會玩三番起糊。另外亦有人鍾意玩鬥快食糊，覺得咁樣刺激啲，都唔會理三番起糊，所以三番起糊其實唔係一條死例，不過開枱前最好先講清楚。