三省六部
三省六部係中國古代嘅一個中央官制。三省係指中書省、門下省同尚書省，六部即係尚書省下屬嘅吏部、戶部、禮部、兵部、刑部同工部。每個部各管四司，總共係廿四司。
三省六部係由西漢開始長期發展形成嘅一個制度。其中尚書省喺東漢形成（當時叫尚書台），中書省同門下省就喺三國時期形成，佢嘅目的就係要分割同限制尚書省嘅權力。喺發展嘅過程中，佢嘅組織形式同權力都各有演變。
到咗隋朝，隋文帝綜合漢魏嘅官制創立咗三省六部制，主要掌管中央嘅政令同埋政策嘅制定、審核同貫徹執行，因為要避楊忠諱，將中書省個名做內史省。
唐朝基本上都係繼續用隋朝嘅制度，再加補充同發展，令到個中央集權體制更加完善，又因為要避李世民諱，將民部改叫做戶部。宋朝繼承唐制，但係三省六部嘅主要職權都已經轉移到其他機構，三省六部只係得個名。遼代設官同於宋制。
金代、元代、明代只設一省六部，金叫尚書省；元、明叫中書省。明1380年廢中書省，將中書省嘅權歸六部。自此，六部取代咗三省六部制。期間六部制基本沿襲未改，對於三省制，唔同時期嘅統治者作過一啲唔同嘅調整同補充。
三省六部制嘅特點在於分散丞相及同埋中央機構嘅權力，將相權「一分為三」，互相牽制；同時，又將尚書省權分六部，限制地方割據勢力嘅產生同發展，又推動部門牽制同埋機構運轉，以加強皇權。
三省
編輯中書省（即隋朝嘅內史省）：長官係中書令（隋叫內史令），副長官係中書侍郎（隋稱內史侍郎），主要職官有中書舍人。就軍國大事、重要官員嘅任免等事項，替皇帝起草詔旨，起草嘅責主要由中書舍人負擔。係決策機構。
門下省：長官係侍中（隋叫納言），副長官係黃門侍郎（後改叫門下侍郎），主要職官有給事中。負責審核朝臣奏章，複審中書詔敕，有認為唔妥當嘅，可以駁回，叫「封駁」，駁正嘅權主要由給事中掌握。係審議機構。
尚書省：長官係尚書令，實際唔任命，副長官係左、右僕射。僕射之下有左右丞、左右司郎中、員外郎。尚書省設喺宮外，總領六部。中書、門下發出嘅制敕，皆由尚書省轉發到中央各部門同地方州縣，或根據制敕精神，制定政令，下達有關部門。中央寺、監、百司等機構下達諸州嘅政令，都必須由本省發遣。係執行機構。
六部
編輯- 内文：六部
各部長官叫尚書（正三品），副官係侍郎．各司長官係郎中，副官係員外郎，分別負責貫徹各種政令，六部各下設四司，合共二十四司。