上契
上契，又叫結拜、結義，係兩個至幾個人走埋一齊，因為意趣相投，惺惺相識而希望進一步成為親如兄弟姐妹嘅關係，經過儀式之後，咁年紀比較大嘅就係契哥（義兄）或者契家姐（義姊），而年紀比較細嘅就被稱為契細佬（義弟）或者契妹（義妹）。
.jpg)
不過要清楚一點嘅係，「義兄弟」係由結拜而嚟，要一齊向天宣誓日後要有福同享有難同當，有同生共死嘅意味；而「契兄弟」呢啲就係由上契而成，係由做細嘅向做大嘅表上敬意，多數係斟茶叩頭，表示甘願做細佬，有啲上司下屬咁嘅味道。所以兩者嘅概念雖然好相近，但其實當中嘅意義係有唔同嘅地方。
不過今時今日嘅香港社會（除咗三合會之外）已經冇話結義冇話要向天罰誓咁浩氣干雲，同埋個形式已經同「契」混淆成一樣嘅嘢，有時當意趣相投好傾好玩嘅人走埋，只要有人提出，就隨時可以成為人哋嘅'契爺、契媽、契哥、契姐、契妹、契細佬。