劉備

劉備（粵拼：lau4 bei6，經常變調爲lau4 bei2；161年9月31號—223年6月10號），字玄德（jyun4 dak1），係三國時期漢國嘅開國皇帝，以繼承中原皇族漢統自居，同當時嘅魏國，吳國分別各自控制中原嘅北方、江東，同埋川蜀地區，後世稱之為三國鼎立。

劉備
出生日	161年
出生地	Zhuozhou
死亡日	223年6月10號  （61歲）
死亡地	白帝城 (漢)
國籍	漢
職業	軍閥
配偶	昭烈皇后、麋夫人、孫夫人、吳皇后
仔女	劉禪、劉永、劉理
家族	House of Liu
阿爸	Liu Hong
[改維基數據]

220年曹丕廢漢獻帝，自立做魏文帝，劉備隨後喺221年以「繼承漢統」為名而稱帝。

早年

劉備喺東漢桓帝延熹三年出世，嗰時政局動盪，州官割據，羣雄並起。劉備係漢景帝劉啟嘅玄孫、中山靖王劉勝嘅後人，算得上係漢室皇族嘅後裔，佢阿爺叫做劉雄，阿爸叫做劉弘，都做過官，不過兩個都早死。劉備自細就過著窮生活，同佢阿媽雙依爲命，靠賣草履織蓆為生。後生嗰時跟過盧植，學儒家思想，之後走咗去參軍，鎮壓黃巾之亂。

事業

黃巾之亂之後，劉備先後以客軍身份投靠過公孫瓚、陶謙、曹操、袁紹同埋劉表。207年三次去南陽臥龍崗請諸葛亮出山幫佢，史稱三顧草廬。208年劉表嘅二仔劉琮向曹操投降，駐守喺樊城嘅劉備帶同二千幾個步兵同十幾萬平民撤退到江陵，曹操於是派曹純帶五千精騎突襲江陵，劉備唯有轉守江夏。後來佢同孫權結成聯盟，喺赤壁之戰大敗曹操。其後佢佔領咗荊州、益州，更親自統軍發起漢中之戰，打敗曹操，自封做漢中王。220年曹操二仔曹丕廢咗漢獻帝自立，漢朝滅亡，劉備亦喺下年喺成都稱帝，史稱蜀漢。同年佢為咗由東吳手上攞返荊州同埋為關羽報仇，出兵攻打東吳，結果大敗而歸，史稱彝陵之戰。223年駕崩，謚號叫做昭烈皇帝。

劉備臨終嗰時立過遺詔，叫丞相諸葛亮同尚書令李嚴一齊輔助佢個仔劉禪，史稱白帝城托孤。

劉備做過兩年蜀漢皇帝，史稱蜀漢先主、漢昭烈帝；而劉禪維持咗四十年國祚直至亡國，頭嗰十年由諸葛亮主政，尾嗰十年由姜維主管北伐軍事，史稱蜀漢後主。