不反對通知書

  呢篇文講香港《公安條例》下嘅《不反對通知書》。想搵香港《稅務條例》下嘅《不反對撤銷公司註冊通知書》嘅話，請睇不反對撤銷公司註冊通知書。

不反對通知書（英文：Letter of No Objection，粵文意思：唔反對通知書）係香港《公安條例》下香港警務處處長針對集會或者遊行發出嘅文書，代表唔反對活動嘅進行。如果處長喺指定期限內無發出不反對通知書，只要處長無發出反對遊行嘅通知，仍然可以視為已經發出不反對通知書。唯若警方發出反對通知書，就代表遊行已被禁止。

發出咗不反對通知書嘅示威活動，警方會派員幫手開路同維持秩序，如果係大規模遊行，運輸署同各公共交通機構更會預先公佈相應嘅交通措施，譬如路線改道或者停駛。

申請條件

凡係香港境內搞嘅超過50人嘅集會或者超過30人嘅遊行，都需要申請不反對通知書，但唔包括喺私人處所或者教育機構搞嘅活動，或者純粹涉及社交、康樂、文化、學術、教育、宗教、專業、商業或者殯殮嘅活動。

申請結果通知

警方收到不反對通知書通知書後，需要向申請者通知申請結果。但係假如警務處處長喺指定期限內都無發出不反對通知書，只要處長無發出過反對遊行嘅通知，仍可睇成已經發出咗不反對通知書。而按《公安條例》，指定期限嘅計法係：

• 活動開始前夠7日提出嘅申請（每日上晝11點截止），警方要喺活動開始前至少48個鐘頭通知申請結果。
• 活動開始前唔夠7日但夠72個鐘頭提出嘅申請，警方要喺活動開始前至少24個鐘頭通知申請結果。
• 活動開始前唔夠72個鐘頭提出嘅申請，警方要喺活動開始前通知申請結果。

相關罪名

如果參加無申請過不反對通知書嘅示威活動，有機會觸犯「未經批准集結」；如果參加警方已發出反對通知嘅示威活動，就有機會觸犯「非法集結」。

爭議

喺2019年反送中逆權運動‎爆發初期，根據民間人權陣線引述嘅統計，以往遊行唔獲批不反對通知書嘅機會只係得約莫0.01%（意思即係平均每約一萬宗申請先至有一宗唔獲批）。但係自從7月27號光復元朗遊行開始同埋之後多數反修例遊行，都唔獲批不反對通知書，泛民主派認為係打壓示威自由。