泛民主派

關於香港嘅其他反對派，請去「非建制派」。

泛民主派（英文：Pro-democracy Camp），簡稱泛民，本稱民主派，有時又叫做香港右派，係香港傳媒同學者等由2004年起常用嘅辭彙，廣義指支持香港推行民主同普及選舉嘅政治人及組織；當中部分黨派亦要求中華人民共和國實行民主、結束中國共產黨一黨專政。

佢哋經常會同中共支持嘅港共政府同親中共嘅親中共派議員針鋒相對。

歷史改

泛民主派一直高舉香港民主運動嘅大旗，佢哋嘅歷史開始追溯到1980年代嘅中英談判。喺之前，英籍嘅貝納祺喺1949年成立嘅香港革新會同埋其他政團亦都曾經爭取過全面直選，但係冇乜影響力。

1950年代至1960年代，香港社會普遍受到冷戰思維嘅影響，民間組織大致分成支持中國共產黨嘅左派及支持中國國民黨嘅右派。六七暴動後，左派抬唔起頭，受盡港英政府打壓；而右派亦因為蔣介石瓜老襯，加上逐漸融入咗香港社會，勢力有所下降。

喺1970年代嘅爭取中文成為法定語文運動、反貪污捉葛柏、文憑教師薪酬運動、金禧事件、保釣運動、艇戶事件等，多數由新興嘅民間團體領導。熾熱嘅社會運動風潮，因此聚集咗一批關注社會嘅人士，為1980年代泛民主派嘅興起奠定基礎。

踏入1980年代，中華人民共和國同英國開始就香港前途問題展開討論，民間嘅論政團體亦好似雨後春筍咁發展起嚟，例如早喺1973年司徒華創立嘅教協，楊森、張炳良等人喺1983年創立嘅匯點，陳偉業、李永達、馮檢基喺1986年成立嘅民協，何俊仁所屬嘅太平山學會等，發表民主回歸嘅訴求同埋參與殖民地政府因應《中英聯合聲明》而發展嘅英式代議民主，參與第1屆香港立法局選舉。

1984年，《中英聯合聲明》簽訂，數以千計嘅市民出席開始喺高山劇場搞嘅「高山大會」，討論《香港基本法》嘅起草同埋未來政制問題，並且要求殖民地政府喺1988年第2屆香港立法局選舉入面舉行直選（八八直選），重收集到22萬嘅簽名向政府施壓，但係建議最後畀港督衛奕信否決。高山大會亦要求基本法起草委員會喺《基本法》內容加入民主政制。

1986年，由百幾個社運、壓力團體阿頭發表「一九零人政制方案」，支持普選香港行政長官同埋1997年至少有半數立法局議席由直選產生。11個民間團體亦以呢樣嘢為基礎喺10月27號組成咗民主政制促進聯委會（民促會），由司徒華同埋李柱銘兩位基本法草委領導，泛民主派略見雛型。因應當年北京希望可以順利過渡，香港各界人士做咗中共統戰拉攏嘅對象，直至六四事件發生之前，泛民主派同中共關係好好。

1989年4月15號，支持改革嘅中共中央總書記胡耀邦瓜老襯，北京同埋各大城市捲起學潮，泛民主派亦都熱心力撐學運，並且呼籲香港市民上街。5月，四五行動等團體同埋香港專上學聯分別响天星碼頭同埋新華社香港分社進行絕食同埋靜坐，聲援北京學生。

5月21號，100萬人上街遊行，支聯會成立，由司徒華做阿頭。5月27號，香港演藝界响跑馬地馬場舉行咗連續12粒鐘嘅「民主歌聲獻中華」演唱會，籌得1,200萬港幣支援北京學運。5月28號，香港共有150萬人（佔當時全香港嘅四分之一人口）參加響應北京號召而搞嘅「五二八大遊行」。

6月4號清晨，解放軍同埋武警部隊進行六四清場，香港市民喺電視前面得知噩耗，全城悲憤。喺街上，唔少人嘅手臂都綁上黑絲帶以悼念死難者，並且發起多次示威聲討中共政權。支聯會原本計劃於6月7號搞三罷（罷工、罷課同埋罷市），但係由於前一日出現碧街事變，所以最後取消三罷。由1990年到2020年，支聯會年年都搞六四遊行同埋維園六四燭光晚會，而「平反六四」亦成為咗泛民主派嘅核心信念；六四事件之後，司徒華、李柱銘等人退出基本法起草委員會，至此泛民主派同中共關係決裂。

喺1991年第3屆香港立法局選舉、1995年第4屆香港立法局選舉，泛民主派喺地區直選選舉佔盡壓倒性優勢，當中喺1991年，18個地區直選議席入面佢哋就贏咗17個（除咗新界西選區嘅黃偉賢輸畀戴展華之外），當中14席係由港同盟、匯點嘅候選人贏得，剩低3位泛民主派當選人就有民協馮檢基、無黨籍嘅劉慧卿、黃宏發；1995年，泛民主派受惠於彭定康提出嘅新九組政改方案，喺60個立法局議席入面贏得31席，當中由港同盟、匯點合併而成嘅民主黨贏得19個議席，成為港英時期立法局第一大黨，而民協亦有4個議席，就連一二三民主聯盟、街工、職工盟亦各佔一席，其他當選嘅獨立人士就包括陸恭蕙、黃宏發、吳靄儀、黃錢其濂、劉慧卿，1996年，劉慧卿、李卓人、劉千石、梁耀忠同埋黃錢其濂成為前綫嘅創會會員，而陸恭蕙就喺1997年成立民權黨。