維基百科

中國人唔食呢一套

中國人唔食呢一套（原文：中國人不吃這一套）係中國民族主義同戰狼外交之下出現嘅一句口號，最初出自中華人民共和國（下稱中國）資深外交官楊潔篪，後來被唔少中國網民同一啲香港親中派人士引用。呢句話喺中國網民之間大熱，但喺國際社會就充滿爭議性。就一啲中國大陸傳媒人同學者，都對呢句說話有保留。

原文出處

編輯

喺2021年3月，美中高層喺阿拉斯加最大城市安克拉治進行中美高層戰略對話，美國就中國喺香港、新疆、西藏、台灣問題嘅表現，作出批評，要求佢哋尊重當地人嘅人權。出席會談嘅中共中央政治局委員楊潔篪未有回應問題，但就對美國代表講咗一句：「美國沒有資格居高臨下同中國說話，中國人不吃這一套！」[1]

後續影響同評論

編輯

中國大陸

編輯

楊潔篪呢句說話，隨即喺中國大陸嘅互聯網大熱，尤其係受到小粉紅嘅歡迎。

  • 喺淘寶網，有唔少商家推出印呢句「金句」嘅各種商品，包括T恤、手機殼、購物袋等。有啲商品亦印有英文「stop interfering in China's internal affairs」（停止干預中國內政）嘅字句[2][3][4]。不過，亦有網民批評呢啲係假借愛國名義嘅商業行為，並唔可取[3]。
  • 人民日報微博用上大紅帖子，同時用中英文寫出楊潔篪呢句話[1]。

雖然呢句話得到一啲小粉紅同官媒嘅認同，但喺中國大陸，亦有一啲傳媒人同學者對於呢句說話有保留。

  • 北京資深媒體人高瑜話，呢句說話唔係咁文明，甚至有一啲江湖氣喺度，可能會鼓動國內民粹主義嘅反美情緒，對年輕人嘅成長，或者國一般老百姓文化水平嘅提高亦無幫助[5]。
  • 前中國人民大學政治系主任冷傑甫教授話，中國外交官喺國際場合，可以強硬，但要妥當。呢句話對國內一部分民族主義者，有唔好嘅刺激，日後中國外交官要提高修養，合理正當咁表達意見。佢亦反對有啲商人咁樣借機會嚟搵錢[5]。
  • 前中共中央黨校教授，因為批評中共總書記習近平而被開除共產黨黨籍嘅蔡霞，話楊潔篪咁講，連基本嘅文明禮儀都冇，係丟架嘅中國江湖混子俚語[6]。

另外，一啲反共嘅大陸網民亦改編呢句說話去揶揄中共，例如話「中國不吃美國這一套，只吃毛澤東文革那一套。」，「中國不吃美國這一套，只吃三年大饑荒死3,000萬人那一套。」等等[7][8]。

台灣

編輯
  • 民進黨立委王美惠喺2021年3月一次質詢陸委會同海基會嘅時候，抨擊中共打壓台灣，又喺個人Facebook改編咗呢句說話，話「台灣人不吃（中共）這一套」[10]。
  • 《聯合報》評論，楊潔篪呢句話係同潑婦罵街無分別，甚至可能成為中美關係嘅分水嶺[1]。
  • 時事評論員黃澎孝形容，呢句話其實背後係代表中國人覺得自己有著「百年國恥」，有強烈嘅「歷史受害情結」，食盡外國人嘅所畀嘅苦頭。因為呢種諗法，中國人對外國人嘅成見同負面情緒，就喺呢個場合表現出嚟。黃澎孝又分析，加上楊潔篪20年前就被中共任命為駐美大使，楊覺得自己以前打交道嘅對手係老布殊、克林頓、小布殊、奧巴馬，但呢次會面嘅布林肯同蘇利文，只係佢以前對手嘅手下，覺得自己被冷待，所以先講咗佢咁「反外交」嘅說話[11]。
  • 時事評論員蕭徐行話，事件凸顯現中國戰狼外交本質，自以為是，態度強硬傲慢同霸道，完全唔係十年前公開宣稱嘅中國和平崛起，引起外界反感[12]。

香港

編輯
  • 親中派香港立法會議員葛珮帆，喺2021年7月1號出席一個花車巡遊慶祝中國共產黨百年黨慶同香港回歸嘅時候，著上咗一件「中國人不吃這一套」嘅T裇，事後佢話係希望希望表達反對外國干預香港嘅信息[13]。
  • 喺2021年4月，有親中派人士喺西九龍裁判法院門外襲擊記者，當時就著住「中國人不吃這一套」T恤。佢之後被警察拉咗[14]。

美國

編輯
  • 保守派智庫美國企業研究所（AEI）亞洲研究項目主任卜大年（Dan Blumenthal）話，中國其實無外交目標，只係要羞辱美國，贏得國民支持，而楊潔箎將會被視為英雄咁樣回國[15]。
  • 《華盛頓郵報》形容，呢次係拜登政府首次領教到中國「戰狼外交」嘅作風，又批評中國完全無外交禮節[11]。

參考

編輯
  1. ↑ 1.0 1.1 1.2 〈楊潔篪是否嚴重失態〉。《RFI - 法國國際廣播電台》 (繁體中文)。2021-03-19。原著喺2021-05-07歸檔。喺2021-07-02搵到。
  2. ↑ 世界新聞網。〈「中國人不吃這一套」 楊潔篪金句變商品〉。《世界新聞網》 (臺灣中文)。喺2021-07-02搵到。
  3. ↑ 3.0 3.1 中時新聞網。〈「中國人不吃這一套」周邊商品爆紅 網購大賺愛國財 - 兩岸〉。《中時新聞網》 (中文)。喺2021-07-02搵到。
  4. ↑ 朱加樟 (2021-03-21)。〈楊潔篪「中國人不吃這一套」周邊產品熱賣 連iPhone手機殼都有〉。《香港01》 (香港中文)。喺2021-07-02搵到。
  5. ↑ 5.0 5.1 〈"中國人不吃這一套" 分析：用江湖語言鼓動民粹主義〉。《美國之音》。喺2021-07-02搵到。
  6. ↑ 〈蔡霞痛批「中國人不吃這一套」是江湖混子俚語〉。《看傳媒新聞網》 (繁體中文)。喺2021-07-02搵到。
  7. ↑ 〈中共演「不吃這一套」變臉秀 網友造句調侃 - 大紀元〉。《大紀元 www.epochtimes.com》 (繁體中文)。2021-03-24。喺2021-07-02搵到。
  8. ↑ 〈蔡霞痛批「中國人不吃這一套」是江湖混子俚語〉。《看傳媒新聞網》 (繁體中文)。喺2021-07-02搵到。
  9. ↑ 〈（影）中國人不吃這一套? 郁慕明忙舔共 : 聽後熱血沸騰啊! | 中國〉。《新頭殼 Newtalk》 (中文)。2021-03-23。喺2021-07-02搵到。
  10. ↑ 〈抨擊中國打壓自由民主 女戰神王美惠:「台灣人不吃這一套」 | 政治〉。《新頭殼 Newtalk》 (中文)。2021-03-22。喺2021-07-02搵到。
  11. ↑ 11.0 11.1 精選轉載 (2021-03-24)。〈楊潔篪一句「中國人不吃這一套」，既有中國人的受害情結，也有他個人的歷史心結〉。《The News Lens 關鍵評論網》 (中文)。喺2021-07-02搵到。
  12. ↑ 〈蕭徐行觀點》罵來罵去的戰狼外交就是中國式的外交嗎 | 國際〉。《新頭殼 Newtalk》 (中文)。2021-03-24。喺2021-07-02搵到。
  13. ↑ 〈【政情網上行】葛珮帆「盛裝」賀黨慶〉。《Now 新聞》 (香港中文)。喺2021-07-02搵到。
  14. ↑ 〈涉追打兩記者 穿「中國人不吃這一套」T恤男被捕 - 新聞〉。am730 (香港中文)。原著喺2021-07-09歸檔。喺2021-07-02搵到。
  15. ↑ 〈楊潔篪「高級戰狼秀」專家 : 只為羞辱美國 以英雄身分回中國 | 國際〉。《新頭殼 Newtalk》 (中文)。2021-03-22。喺2021-07-02搵到。
由「https://zh-yue.wikipedia.org/w/index.php?title=中國人唔食呢一套&oldid=1995105」收