九龍城迴旋處
提示：呢篇文講嘅唔係太子道迴旋處。九龍城迴旋處（英文：Kowloon City Roundabout）係香港九龍城一個迴旋處，又稱「九龍城交匯處」。依個迴旋處包圍住世運花園，1970年代初落成，連接太子道東、太子道西、亞皆老街同馬頭涌道等[1]。
簡介
編輯啟德機場重喺度嗰陣，九龍城迴旋處係連繫機場對外嘅交通道路，所以日日嘅流量非常之高[2]。即使啟德機場搬咗，九龍城太子道、馬頭圍道同亞皆老街都係九龍區嘅交通大動脈，就算迴旋處對上起咗三條行車天橋，等啲車可以兜過迴旋處，但車流都係咁頻繁。
歷史
編輯好耐以前，喺以前九龍城聖山東北山腳有舊裂開咗嘅岩石[3]，依舊石就好似問卜嗰啲珓杯，所以啲人就叫佢珓杯石。舊石喺戰時日軍擴建啟德機場嗰陣就冇咗，不過後嚟啲人傳傳下，就變咗叫「靠背石」（Kau Pui Shek）。後來嗰度起咗個巴士總站，「九龍城巴士總站」，又叫「靠背石巴士總站」（Kau Pui Shek Bus Terminus），後來改建為九龍城迴旋處而拆咗。[4]
本身仲有條珓杯石村，大概喺而家世運道嘅北面，以前聖山嘅東北面，馬頭涌嘅西南面，衙前塱嘅西北面，望住九龍灣。仲有，嗰時有條珓杯石道，係由馬頭涌道分出嚟嘅。[3]依家嗰度仲同舊石有關係嘅，就得番太子道行車天橋底嘅「靠背石變電站」。
喺七十年代，啟德機場不停發展，仲有海底隧道於1972年通車，東九龍嘅車流經九龍城迴旋處渣去海底隧道。為咗紓緩路面交通流量，政府決定起幾條行車天橋橫跨九龍城迴旋處，喺1972年2月13日至4月28日分階段通車。政府為咗行人安全，喺迴旋處地底起四條行人隧道連接九龍城、世運花園同土瓜灣。
由於來往九龍西同九龍東嘅交通依賴九龍城迴旋處，所以依度成日都會塞車。
喺2016年4月7號，九龍城區議會轄下嘅交通及運輸事務委員會討論同總結咗三個塞車嘅原因。
- 龍崗道違例泊車問題嚴重，搞到由龍崗道塞到迴旋處。
- 亞皆老街巴士站有太多條巴士線，巴士埋站塞住條路。
- 亞皆老街站同馬頭涌道嘅香港家庭計劃指導會站太近。
討論後得出幾個建議搞下塞車問題。
- 建議運輸署諗下取消或改善亞皆老街巴士站擺位
- 叫警方捉緊啲龍崗道嘅違例泊車問題
- 建議運輸署唔畀車輛喺特定時間揸入龍崗道
- 喺每個入口加啲交通燈控制車流
參考
編輯- ↑ 〈路政署 - 九龍道路〉。《路政署》。原著喺2020-08-12歸檔。喺2020-01-06搵到。
- ↑ 〈九龍城有嚿靠背石？〉。《史檔》。2018-09-21。喺2021-01-07搵到。
- ↑ 3.0 3.1 〈宋王臺與珓杯石〉。《香港文物 Hong Kong Heritages》。
{{cite web}}: CS1 maint: url-status (link) - ↑ 歷史時空 (2019-07-05)。〈1949年-1950年 九龍城《靠背石巴士站》(珓杯石）〉。facebook。
{{cite web}}: CS1 maint: url-status (link) - ↑ 〈九龍城區議會管轄下交通及運輸事務委員會委員第三次會議會議議工作進度報告〉 (PDF)。《九龍城區議會文件第38/16號》。
{{cite web}}: CS1 maint: url-status (link)
