啟德機場
啟德機場（粵拼：kai2 dak1 gei1 coeng4，英文：Kai Tak Airport）係舊時香港一個軍民兩用機場，響九龍灣填地上面。由1925年1月24號開張到1998年7月6號閂，總共74年。行政上佢係喺九龍城區，畀土瓜灣、新蒲崗、牛池灣同埋牛頭角圍住，機場跑道就伸入去九龍灣。啟德個名，嚟自啟德濱，20世紀初嗰度第一次填地[1]。1962年至到閂呢一段期間，佢個官名係香港國際機場或者香港啟德國際機場[2]；到咗1998年，赤鱲角嘅新機場落成，香港國際機場就由啟德搬去新機場。原本屬於啟德嘅兩個代號，即係IATA機場代碼HKG同埋ICAO機場代碼VHHH，都轉咗去赤鱲角機場。
| 啟德機場 Kai Tak Airport | |||
|---|---|---|---|
| |||
| IATA： | |||
| 摘要 | |||
| 機場類型 | 公眾 | ||
| 東主 | 民航處 | ||
| 服務城市 | 香港 | ||
| 海拔 AMSL | 28英尺（9米） | ||
| 坐標 | 22°19′43″N 114°11′39″E / 22.32861°N 114.19417°E | ||
| 機場跑道 | |||
| 方向 | 長度 | 表面 | |
| 米 | 呎 | ||
 |
|---|
| 呢篇文係香港航空系列之 一 |
|
|
|
|
其他香港系列 |
啟德機場曾經係全球最繁忙嘅國際機場之一，國際客運量曾經係全球第三高，而貨運量更加係全球第一。不過極之繁忙嘅啟德機場，唔單止坐落喺市中心，重只得一條跑道，周圍嘅樓密度高，空間好窄，所以已經到咗佢嘅發展極限。
特點
編輯
地理環境
編輯啟德機場喺香港市區入面，新九龍西邊南岸，貼近維多利亞港。機場範圍以外係鬧市，三面環山。機場北面同埋東北面，大約10千米外有山，山高600米（2000英呎）；東面嘅山，距離跑道淨係得5千米。機場南面係維多利亞港，而海港外唔夠10千米，又係香港島另一個520米（1700英呎）嘅高山。只有機場嘅西面、同埋跑道東南面對正嘅鯉魚門峽角冇高山阻住。
啟德機場，淨係得一條伸入維多利亞港嘅跑道，係喺九龍灣填海出嚟。飛機升降方向，分別係134°同埋314°，所以叫做「13跑道」同埋「31跑道」[3]。13/31跑道，曾經加長過好多次，喺機場關閉之前，長度係3390米。喺跑道同埋東面觀塘之間，隔住條窄水道，而跑道嘅盡頭，就係高山民居。機師喺降落嗰陣，睇到格仔山上嘅巨型方格，就知道要轉彎，準備降落。由於地理環境嘅局限，飛機喺啟德升降難度極高。因為咁，啟德機場俾人話係「世界十大危險機場」之一。不過，亦都因為咁，令有啲航空公司，會派最有經驗嘅機師嚟揸香港航班，所以機場開咗咁耐，都唔係咁多大鑊空難。
13/31跑道
編輯13/31跑道（讀成「一三三一」跑道）呢個稱呼，嚟自國際航空界嘅習慣。呢條跑道可以畀飛機，以180°嘅相反方向升降，跑道數字，以嗰個方向嘅角度，唔要最後一個位數得出嚟，而第2個數字，亦可以喺第一個數字加18計（即180°），而啟德機場嘅兩個跑道，方向就屬於136°同316°[4]。
獨特嘅降落方式，同機場特殊環境，令到啟德機場嘅13跑道世界知名。喺13跑道着陸，對機師嚟講，有特別難度；而對乘客嚟講，亦算喺一個幾刺激嘅體驗。由於香港嘅盛行風係東風，年中用13跑道降落嘅機會，比31跑道多。要喺13跑道降落，飛機首先由長洲附近向西（航向270°）飛，並開始下降，繞過大嶼山西端，轉去東北（航向45°），然後喺大嶼山沙螺灣以北，改向東（航向88°）入機場，經過維多利亞港西部海港，飛入建築密集嘅西九龍上空。13跑道呢段向東航程，由1974年起有儀錶導航系統幫助（Instrument Guidance System；同31跑道嘅儀錶着陸系統、Instrument Landing System類似，但喺唔帶領到着陸）。當飛機飛到九龍仔格仔山附近，機師就要靠目測右轉47°，對準伸入海港嘅跑道着陸。格仔山喺九龍仔公園附近嘅山仔，油咗紅白兩隻色，夜晚就用燈光照住。飛機喺呢度轉彎時，高度唔夠1000呎（300米），離着陸點只得1.4海里（2.6千米）。如果海港內吹嘅係強勁東北風，飛機仲要實施側風着陸。如果喺打風嗰陣，港內吹嘅係強度唔穩定嘅陣風，降落就仲難。而且跑道三面環海，左面好接近滑行道，靠近嘅一方雖然喺陸地，但唔係好遠就係滿佈樓房。
對機上嘅乘客、特別係坐喺機艙右邊靠近窗邊嘅乘客嚟講，飛機降落時就好似係飛錯咗航道一樣。可以感覺到飛機同地面嘅距離越嚟越近，地面喺深水埗同旺角嘅擠迫街道、多層樓房同行人已經睇得好清楚，但喺前面就見唔到條跑道。兩邊嘅建築物好似就嚟要撞到機翼咁，有時更加可以清楚睇倒啲屋入面嘅電視畫面、或者天台上曬緊件衫嘅顏色。當飛機喺九龍城上空轉彎，跑道先喺前面出現。幾秒以後，起落架已經接觸到陸地，飛機停定後喺海港中央嘅跑道着陸。八秒鐘之內剎停飛機。
對住喺航道之下嘅九龍城居民嚟講，曾經流行過一句話：「只要喺大廈高層攞住個晾衫竹就可以掃架飛機落嚟。」
另一方面，飛機由31跑道向九龍城嗰邊起飛又係另一個奇觀。當飛機向鯉魚門方向滑行到跑道尾掉頭，準備起飛嗰陣，機師眼前淨係得前方數以千計嘅高樓大廈同海拔1300英呎（400米）高嘅獅子山同筆架山。飛機啱啱起飛嗰陣，因為驚撞山，機師就要將起機無耐架飛機轉向西飛。31跑道因為受到九龍城樓宇嘅限制，所以實際滑行距離比13跑道短，對航機起飛爬升率嘅要求亦都更高。所以，原定由13號跑道起飛、載滿乘客、貨物同燃料、仲去到最大起飛重量嘅航機，如果喺起飛前因為風向改變而需要改用31號跑道，就需要番返泊位、落咗啲貨嚟維持較高嘅爬升力。
啟德機場喺市中心，部份導航同埋雷達設施需要起喺市區入面。除咗九龍仔格仔山同九龍仔公園之外，飛機入13跑道嘅導航燈起喺衙前圍道一座樓宇嘅天台上面，嗰棟樓宇曾經開設漢寶酒樓。喺九龍灣海旁觀塘繞道側亦都有一座塔型圓形雷達。
擴建同埋搬遷
編輯香港空運同客運增長得好快，啟德機場喺1990年代嘅設計乘客量係每年2400萬，但佢係到佢搬嗰日已經去到2800萬，再加上150萬公噸嘅貨物，以國際客運量屬於全球第3，貨運更加喺全球第1。
之不過，啟德只得一條跑道，平均每個鐘有成要36班機升降，繁忙時間接近一分鐘一班，呢個已經係安全極限。而且，跑道同滑行道距離過近，任何嚴重意外都可能令機場癱瘓。
早期嘅啟德機場同住宅區相距仲比較遠，但隨住住宅區同機場不斷擴展，機場嘅位置同住宅區變成只係同太子道東一街之隔。到咗1980年代，啟德四圍已經無空間可以發展。啟德用盡咗各種方法，喺有限嘅土地上擴展至到65個停機位，其中只有8個直接靠近客運大樓側邊。機場無論喺升降時間、停機位等都到咗使用嘅極限，航空公司要同香港開新綫都好難。
1980年代初期，政府已經研究機場點發展，諗過晒香港境內有邊度地方可以起新機場。80年代尾，商人胡應湘曾經建議喺南丫島同大嶼山之間，用人工島方式起機場。基於當時香港前途因為香港主權問題唔明朗，所以冇落實興建方案，而改為盡量擴大啟德機場暫時解決需求，直至1990年先決定起新機場，選址係大嶼山西北面嘅赤鱲角。新機場喺1998年7月6號啟用嘅時候，啟德機場同時關閉。唔少設備、器材等喺午夜後先至由舊啟德搬去新機場，泊喺啟德機場嘅飛機亦都要飛到去新機場。
噪音
編輯噪音係啟德機場一個重要環境問題，飛機升降帶嚟嘅噪音影響區域好廣泛，包括近住啟德機場嘅九龍城、觀塘、九龍塘、旺角、深水埗到港島東區。由於噪音問題，航班喺深夜至清晨時間都唔會升降，令到啟德嘅航班升降數目設有一定嘅上限。香港政府喺1995年3月實施加強消減噪音措施，1995年11月，消減噪音措施再度加強。1997年6月就裝咗飛機噪音同飛行航道監察系統、開設飛機噪音投訴熱線，嚟減低飛機噪音對居民嘅滋擾[5]。
服務同設施
編輯1946年開始，啟德機場由香港政府屬下民航處直接管理同營運。
客運
編輯客運係啟德機場最主要嘅功能。啟德機場啟用後有一座比較簡陋嘅客運大樓。1962年新客運大樓同埋停車場落成，並且喺1965年拆咗舊嘅客運大樓。新客運大樓經過多次擴建，使用到1998年閂為止。
啟德機場客運大樓分做上下兩層。上層係離境大堂，有航空公司登記櫃枱同埋好多塊自動翻牌式航班顯示板；禁區入面就有入境處出境櫃位，保安檢查設施同免稅品店。離境大堂中央部份有一條去上層瞭望台嘅樓梯，嗰度成為唔少團體出發前拍影團體相嘅地方。離境大堂嘅上層有好多間餐廳，其中一間酒樓由美心集團經營，另外有「世界之窗」自助快餐店。離境大堂亦都有一個小型綜合宗教祈禱室。
客運大樓下層係接機大堂，大堂有麥當勞快餐店同找換店等設施，並且有通道通去南面大樓外面嘅有蓋的士站同機場巴士站。下層禁區入面有入境處入境檢查櫃位同多條行李輸送帶。客運大樓就有停車場，並且有通道通去行人隧道連接九龍城，同行人天橋連接富豪機場酒店。
經過多次擴充後嘅啟德機場，閂之前一共有32個登機門；當中只有8個連接登機橋，主要畀大型客機好似波音747使用。使用其他登機門嘅乘客需要步行去到地面轉撘連接巴士，到戶外嘅停機坪，再爬上樓梯登機。
喺客運大樓天台有瞭望台，喺1960年代，送機人士可以喺瞭望台睇住親友上飛機。啟德機場的控制塔位於客運大樓頂層最高位置，可以睇倒成個機場停機坪同跑道嘅情況。
空運
編輯
除咗客運之外，空運亦都係啟德機場嘅另一個主要用途，對香港嘅貿易同製造業帶嚟唔少貢獻。啟德機場有兩個空運貨站，第一個貨運站喺1976年5月落成，第二期擴建喺1984年4月落成；第二空運貨站就起喺九龍灣，嘅1991年3月落成，全部由香港空運貨站有限公司經營，並喺香港政府嘅專利協議下營運。1993年香港空運貨站處理嘅空運量超過100萬公噸，處理能力喺全球最高，理貨失誤率係全球最低之一。1997年，香港空運貨站嘅年處貨量已經超過150萬公噸[1]。
1950年代開始由香港飛機工程公司獨家提供飛機維修服務。香港飛機工程公司除咗提供運轉過程中嘅小維修外，亦都提供機體、引擎定期檢修，同埋機身內部改裝等嘅服務。
連接交通
編輯啟德機場喺九龍區市中心，交通方便。政府冇特別為啟德機場起高速公路或者鐵路，去啟德機場嘅主要道路包括太子道、觀塘道、東九龍走廊同後期興建嘅觀塘繞道；太子道建有行人天橋同隧道連接機場。現時經已改咗名做啟德隧道嘅機場隧道就係穿過機場跑道嘅下面嘅，連接九龍灣同土瓜灣。機場隧道入面有一個通去機場嘅出口，連接宋皇臺道同埋世運道，再通去客運大樓。
啟德機場入面好多條路嘅名都同航空業有關，有啲路嘅英文名嚟自飛機型號：
- 協調道 Concorde Road（和諧式客機）
- 電星道 Electra Drive（洛克希德L-188伊萊克特拉）
- 彗星道 Comet Road（哈維蘭彗星型）
- 天威道 Skymaster Drive（道格拉斯C-54空中霸王）
- 德高道 Dakota Drive（道格拉斯C-47達科塔）
- 三星道 Tristar Avenue（洛克希德L-1011三星）
啟德機場閂之前有好多條機場巴士路線，全部喺1998年7月6日起啟德閉幕之後取消晒。
| 號碼 | 終點 | 經營機構 |
|---|---|---|
| A1 | 啟德機場去尖沙咀（循環線） | 九龍巴士 |
| A2 | 啟德機場去中環港澳碼頭 | 九龍巴士 |
| A3 | 啟德機場去銅鑼灣（循環線） | 九龍巴士 |
| A5 | 啟德機場去太古城（循環線） | 九龍巴士 |
| A7 | 啟德機場去九龍塘站（循環線） | 九龍巴士 |
| A20 | 啟德機場去中環交易廣場 | 中華巴士 |
機場出面嘅太子道東都有超過30條一般巴士路線來往香港同九龍各地。
統計資料
編輯歷史
編輯早期發展
編輯20世紀初，何啟爵士同區德先生（又名區澤民）合資經營「啟德營業有限公司」，喺九龍灣北岸進行填海工程。1914年4月獲得政府批准，1916年工程展開。新填地面積有120英畝，原本計劃發展成為花園城市住宅區，畀避開中國動盪嘅人來住。填海地域以佢哋兩個人嘅名字命名，叫做啟德濱。1920年完成第一期工程、1927年完成第二期工程。但咁啱香港愛國運動思潮，多次擺工，尤其係省港大罷工，影響香港經濟。公司財政有困難，做唔落去，嗰陣香港政府擔心國民政府，會趁機收返香港，好似中國其他英租界咁，就屬意令呢一大幅空置土地用作機場用途，加強防務。土地先後成為英國皇家空軍機場、飛行會同飛行訓練中心[6]。
1924年12月，美國人哈利·亞弼（Harry Abbott）向啟德營業有限公司租咗一部份填海土地，開辦飛行學校。1925年1月24日（農曆新年元旦）係啟德第一次飛行紀錄嘅日子。同年香港政府建議保留啟德嘅土地，第時有需要嗰陣，用嚟起機場。香港政府嘅報告指，啟德一帶嘅土地係香港可以搵到嘅最大面積土地，可以用嚟起跑道同停泊飛機，而隔離嘅九龍灣嘅海灣則可以用嚟做水上飛機降落同停泊，因此啟德係最啱佢做機場用途嘅地[7]。亞勃特嘅飛行學校冇幾耐就停辦咗，而由於啟德營業有限公司冇辦法將土地發展成住宅區，啟德正式被徵用為機場。1927年3月起，英國皇家空軍嘅飛機開始喺啟德嘅土地停泊。政府就喺同年12月同啟德投資公司達成協議，由政府用100萬1250港元買咗塊地。
政府開始擴充啟德以作為機場用途。1928年，啟德土地起咗一條混凝土下水滑道，畀水上飛機喺九龍灣升降用，機場基本工程喺1930年完成。同年香港政府請咗第一位機場監督，同時並由嗰陣嘅海港署（Harbour Department）負責管轄各種飛行活動。1934年，亞洲第一間飛行學院遠東飛行訓練學校（Far East Flying Training School）喺啟德開辦。1935年，第一座指揮塔同飛機庫落成。
1936年係香港航空史嘅重要一年，第一間商業航空公司：英國帝國航空公司（Imperial Airways，即係英國航空嘅前身）提供來往香港嘅客運服務。3月24號，第一班定期商業客運航班喺檳城飛嚟香港。之後，陸續有好多間航空公司加入提供航班服務，包括：泛美航空公司來往三藩市；法國航空公司來往印度支那半島；中國航空公司來往廣州同上海；歐亞航空公司（Eurasia Aviation Corporation）來往北京。1939年，長457米嘅第一條正規跑道落成。呢條東西向嘅跑道叫做07/25跑道，位置喺新蒲崗一帶。飛機起落嗰陣，需要將清水灣道（今彩虹道一段）嘅車截停。嗰陣皇家空軍喺啟德機場側邊，鑽石山大磡村一帶起咗一座飛機庫。
二次大戰期間
編輯1941年12月8號，日軍開始進攻香港，喺嗰日轟炸啟德機場，好快就將英國皇家空軍嘅飛機同埋設施摧毀。香港喺同年12月25號畀日本佔領。日軍喺1942年3月擴建啟德機場，請咗幾千個工人炸毀古蹟宋王臺，得嚟嘅石頭喺原有嘅07/25跑道以外起咗一條橫跨清水灣道嘅13/31跑道。13/31跑道嗰陣長1,371米，喺1943年年底起好咗，機場西北面嘅九龍寨城石牆，同埋隔離嘅20幾條鄉村亦都被拆毁。日軍拆咗原本嘅航空大樓。
啟德機場喺第二次世界大戰後期畀盟軍嘅猛烈轟炸，嚴重損毀。最後日本喺1945年8月15號投降。戰後政府重建機場，剷平埋聖山淨低嘅「宋皇臺」部份。
戰後發展
編輯1954年嗰陣，政府發表機場發展計劃總綱，決定發展啟德成國際機場。政府填海起咗一條長2,194米、由九龍灣伸到去維多利亞港嘅新跑道代替舊跑道。哩條跑道就係啟德機場一路用到關閉前仲喺度用嘅13/31跑道。九龍灣填海工程喺1958年9月完成，跑道喺9月12號正式啟用。工程將啟德機場南移，原有跑道嘅一部份改建做停機坪，北面嘅部份就發展成新蒲崗工業區同埋太子道東，而起喺鑽石山大磡村隔離嘅一座皇家空軍飛機庫就冇俾人拆。1959年，跑道燈光系統啟用。
1962年，啟德機場新客運大樓同埋停車場都起好開始用，控制塔都遷埋去新客運大樓，而舊嘅客運大樓就喺1965年拆咗。1970年，跑道擴展成為長2,541米，嚟應付新一代大型噴射客機嘅需要。同年4月11號，第一班波音747定期航班降落喺啟德機場，由泛美航空營運。1974年1月7號，機場裝咗入場儀表導航系統，俾飛機喺惡劣天氣下亦都可以喺13跑道降落，機場用量大幅增加。跑道喺1975年再填海擴展到3,390米，當時有31間航空公司喺香港經營。1970年代初開始，皇家空軍已經唔再用啟德機場，啟德變咗做全民用機場。
1976年，貨運站正式啟用；二次監察雷達亦都開始用嚟加強管制航空交通。同一年嘅11月5號，可以超音速飛行嘅和諧式客機第一次喺啟德機場降落。第二日和諧機經過新加坡之後又嚟香港正式訪問。嗰陣啟德機場嘅客運量係400萬幾人。
1980年代以後
編輯.jpg)
1982年，機場客運大樓第四期擴建工程攪掂。同一年富豪機場酒店開業，成為唯一喺啟德機場附近嘅酒店。1998年機場搬咗之後改名叫做富豪啟德酒店，之後又改名做富豪東方酒店[8]。
1986年，啟德機場嘅全年客運量第一次突破1000萬人。1987年，政府為咗喺新機場有定案之前提高旅客容量，於是繼續擴建同埋改善啟德機場。1988年，機場客運大樓第五期擴建工程攪掂，每年處理到1800萬人嘅旅客量，機場入境管制亦都全面實施咗電腦化。
1990年，六四事件發生之後嘅第二年，為咗恢復港人對前景信心，港府啟動咗玫瑰園計劃，其中包括喺赤鱲角起新機場，即係宜家嘅香港國際機場，但係啟德嘅擴建工程仲未停止。1991年，二號貨運站正式用，每年處理到150萬公噸嘅空運貨物量。政府亦將喺啟德機場隔離、新蒲崗對面嘅警察會俱樂部同埋球場搬走，用嚟起東面停機坪。擴建工程喺1992年攪掂，哩次擴建提供咗多1個商務飛機嘅停泊區同埋4個波音747-400飛機嘅停機位。南面停機坪嘅擴建就喺1994年攪掂，為波音747飛機額外提供咗11個停機位。擴建之後每年處理到2400萬人嘅旅客量，亦都係啟德機場最後一次大型擴充工程。
1996年，啟德機場喺國際客運量方面，喺全球最繁忙機場嘅第三位，處理咗2950萬個國際旅客；而喺國際貨運吞吐量方面總共處理咗156萬公噸嚟自世界各地嘅貨品，係全球第一[2]。
完成歷史任務
編輯
1998年7月5號夜晚，啟德機場終於完咗咁多年嚟嘅歷史任務。最後一班喺啟德機場降落嘅航班，係當晚11點8由重慶嚟到香港嘅港龍航空 KA841號班機；而最後一班喺啟德機場起飛嘅航班，就係7月6號半夜12點02分起飛，由香港飛去倫敦希斯路機場嘅國泰航空 CX251號班機。
最後一班航機喺啟德機場飛走咗之後，機場嘅搬遷計劃全速進行，所有泊喺啟德機場嘅29架飛機全部飛去赤鱲角機場。當所有飛機喺啟德機場飛走晒之後，當時嘅政務司司長陳方安生同埋民航處處長施高理（Richard Siegel）主持咗跑道熄燈儀式。1點17分，施高理用 "Goodbye Kai Tak, and thank you!（拜拜啟德，多謝你！）" 作為告別嘅說話，㩒掣熄咗跑道全部嘅燈，正式幫啟德機場嘅歷史畫上咗句號。客運大廈離境同接機大堂就由警員清場，有啲可以喺新機場用嘅嘢亦都通宵搬咗過赤鱲角。7月6號朝早6點半終於搬完，赤鱲角新機場正式開始咗運作。7月10號，原本係為咗保障啟德機場航道安全而訂立嘅建築物高度限制正式撤銷，九龍區嘅建築物高度唔再受到限制。
啟德機場閂咗之後，客運大樓冇即刻拆。政府以短期租約形式將客運大樓出租，曾經成為政府臨時辦公室、汽車展銷廳、小型賽車場、士碌架場地、遊戲機中心、保齡球場等。啟德機場嘅跑道同停機坪等露天地方，就成為高爾夫球場、燒烤場、「大笪地」跳蚤市場同埋一啲大型活動，例如嘉年華同埋風箏比賽等嘅舉辦場地。
1998年10月26號，政府開始喺啟德機場北停機坪嘅3個位置清拆建築物，又開始除污工程，清除跑道地底下面有成11公頃嘅有毒油污。哩啲油污係長年累積嘅飛機燃料滲咗入去地底而造成嘅，除污工程係香港有史以來規模最大嘅同類項目。工程喺2001年攪掂。
客運大樓同埋停車場最後喺2003年12月至2004年1月期間拆晒，而接駁富豪東方酒店同埋客運大樓嘅行人天橋喺2006年6月都拆埋。
事故
編輯
啟德機場嘅地理環境特殊，飛機升降並唔容易，但係發生嘅嚴重意外並唔多。除咗因為機場管理得好之外，亦都可能係因為機師都覺得喺啟德升降係特別嘅挑戰而加倍留心。航空公司對喺香港起降嘅航班機師要求亦都特別嚴格，通常只會交俾有足夠經驗嘅機師嚟擔任。部分航空公司更加會要求機師做咗模擬飛行訓練先嚟熟習啟德嘅環境。
以下簡述啟德機場比較嚴重嘅意外事故：
- 1941年9月21號，中國航空公司一架DC-2降落啟德嘅時候衝出機場外面嘅西貢道並且撞冧咗一間屋，機身嚴重損壞但係就冇人死。
- 1946年9月25號，一架準備飛去越南西貢（今胡志明市）嘅英國皇家空軍C-47運輸機喺惡劣天氣之下，由舊31跑道向住獅子山起飛之後喺九龍塘撞咗機，死咗19個人。
- 1949年7月11號，香港航空公司一架去廣州嘅DC-3在啟德起飛嘅時候機件故障，冇人死。
- 1951年3月11號，一架太平洋海外航空（Pacific Overseas Airlines）嘅C-54飛機喺機場起飛之後撞咗喺畢架山，死咗26個人。事件係因為能見度低同埋機師出錯而起嘅。
- 1951年4月9號，一架DC-3喺着陸之前失控。
- 1953年7月27號，皇家空軍一架由新加坡出發的赫士廷斯式（Hastings）運輸機，降落啟德舊13跑道嘅時候太早掂到地下，飛機撞冧咗跑道頭嘅莆崗民房。一個村民當場撞死咗，飛機鏟咗落跑道之後着火，全架機40個人生還。
- 1958年8月31號，美國空軍一架嚟自沖繩嘅C-54軍機，降落舊31號跑道嘅時候撞咗喺舊13/31跑道同07/25跑道嘅交匯處，冇人傷亡。飛機嘅殘骸阻住咗其他飛機升降，當局要提早啟用原本定咗喺第二日先至開嘅新13/31跑道。
- 1965年8月24號，一架美國陸戰隊嘅洛歇C-130大力士型運輸機，由13跑道起飛之後失控衝咗入海港沉咗。事件造成咗59個人死亡，係啟德最嚴重嘅意外。
- 1967年6月30號，一架泰國國際航空嘅Sud Aviation SE210客機喺颱風吹襲期間降落，最後滑咗出跑道墮海，攪到14死56傷。事件係由於天氣同埋人為錯誤。
- 1967年11月5號，國泰航空公司一架康維爾CV-880噴射機起飛失敗，衝咗出跑道墮海，1死40傷。
- 1977年9月22號，一架飛去泰國曼谷嘅英國環子午線航空（Transmeridian Air Cargo）CL-44貨機起飛之後冇幾耐引擎着火，喺橫瀾島對開海面墜毀，機上4個機員冇一個生還。
- 1983年10月18號，一架德國漢莎航空波音747貨機起飛嘅時候發動機故障，放棄起飛之後衝咗出跑道草坪，起落架斷咗仲要撞爛埋引擎，3個機員都冇事。航機最後喺香港飛機工程公司重修之後成功復飛。
- 1988年8月31號，一架中國民航三叉戟客機喺31跑道降落嗰陣掂到跑道進場燈，之後衝咗出跑道滑咗入去海裏面，7死14傷。當時天氣好差，有霧同埋雨。
- 1993年11月4號，一架中華航空波音747-400客機，喺颱風降落嗰陣衝咗出13跑道。當時陣風達到烈風程度。飛機當時唔能夠穩定下降，但係機長仍然堅持繼續着陸而唔選擇重飛。最後飛機喺超過跑道三分之二嘅地方着陸嗰陣，未能夠停定之後衝咗入海，造成23個人受傷。
- 1994年9月23號，一架香港政府租用嚟遣返越南船民嘅印尼佩利塔航空（Pelita Air Service）洛歇C-130大力士型運輸機攪掂咗任務後返嚟香港，再返去雅加達，點之喺13跑道起飛嗰陣，因為滑門控制折斷，失控墜海，造成咗6死6傷。
睇埋
編輯參考資料
編輯- ↑ 《九龍城區風物志 互聯網檔案館嘅歸檔，歸檔日期2011年6月26號，.》，九龍城區議會，香港。
- ↑ 拆卸之前嘅啟德多層停車場上面，標有大字「香港啟德國際機場」同埋香港特別行政區區徽。
- ↑ 13/31：13跑道、31跑道，都係代表同一跑道，呢種跑道寫法，係航空界習慣。每條跑道，都可以由兩個相隔180° 嘅方向降落，跑道數字，喺嗰個方向角度，唔要最後一個數位寫成，而第二個數字，就係第一個數字加18（即係180°）。如果有兩條平行嘅跑道，就分別以L/R表示左或者右。
- ↑ 《啟德機場1925 - 98》，香港民航處網站
- ↑ 香港特別行政區政府，(1997年)，《http://www.policyaddress.gov.hk/pa97/chinese/cresb.htm 1997年行政長官施政報告：經濟局工作進度報告]》，香港特別行政區政府
- ↑ 《九龍城風物誌》。
- ↑ 趙雨樂/鍾寶賢，《香港地區史研究之一：九龍城》，三聯書店，ISBN 962-04-1970-7
- ↑ 〈存档副本〉。原著喺2020年11月10號歸檔。喺2006年9月21號搵到。
- 《香港航空百年》，宋軒麟，三聯書店，ISBN 962-04-2188-4
- 《從啓德出發》，吳詹仕，經濟日報出版社，ISBN 978-962-678-456-3
- 《香港年報 1998》，香港特別行政區政府，ISBN 962-02-0261-9
- 《Airport of the Nine Dragons: Kai Tak, Kowloon》，Eather, Charles Edward James，Surfers Paradise: ChingChic Publishers，ISBN 0-9586746-0-4 (英語)
- 《Beyond Lion Rock: The story of Cathay Pacific Airways》，Gavin Young，ISBN 0-09-173724-9 (英語)
- 《Wings over Hong Kong: a tribute to Kai Tak: an aviation history 1891-1998》，Odyssey，ISBN 962-217-542-2 (英語)
- 《世界民航雜誌》，1998年7月號
- 香港《蘋果日報》，1998年7月6日/7月7日
- 《民航(飛機噪音)條例》，香港法例第312章
- 《香港機場(規例)條例》，香港法例第292章 (已於2002年廢除)
- ^ 香港空運貨站有限公司網頁 [3] (1997年) [4] (1993年)
- ^ 啟德機場13跑道IGS降落飛行程序
出面網頁
編輯
- 香港民航處：啟德機場
- 香港飛行總會
- 牛池灣文娛中心：啟德文化博物館
- 香港航空青年團：香港航空歷史（英文）
- Phil Parker - Air Traffic Controller, Kai Tak（英文）
- CPA Virtual（英文）
- 啟德機場13跑道IGS降落飛行程序
- FAREWELL，啟德!
- 啟德機場歷史：helis.com（英文）
- 共建維港委員會：啟德規劃檢討
- 財務委員會工務小組委員會討論文件：469CL－ 在啟德機場原址進行嘅九龍東南發展計劃
- 土木工程拓展署：現有工程
地圖
編輯
相片同影像
編輯- Airport database with extended search functionaliy（英文）
- Airliners.net啟德機場相片（英文）
- 香港地方討論區：清拆中嘅啓德客運大樓
- Paul Ashford嘅關於啟德機場網頁（英文）
- 飛機降落啟德機場片段
- 1998年7月5日啟德機場關閉前九龍城一帶嘅片段
- 飛機降落啟德機場嘅模擬影片
- 飛機降落啟德機場嘅模擬影片2
- 香港空運貨站有限公司：啟德國際機場嘅歷史圖片
- 啟德機場早期空中照片
- 啟德最後一張：攝影集（英文）
- 啟德機場照片 airchive.com
- 2002年時嘅啟德
- H.M.S. Nabcatcher (RNAS. Kai-Tak) 英國皇家海軍航空隊 1945年啟德機場平面圖 啟德機場空中照片
