九龍西聯網（全名九龍西醫院聯網，英文：Kowloon West Cluster）係香港醫院管理局嘅其中一個地區性醫院聯網，負責服務深水埗區、葵青區、荃灣區同北大嶼山127萬居民，而家總監係謝文華醫生。
- 瑪嘉烈醫院：大型地區醫院，提供全科急症服務，係聯網嘅創傷同腫瘤科中心、醫管局傳染病中心同毒理化驗室。
- 北大嶼山醫院：喺2013年9月開始分階段投入服務。服務範圍包括急症室、社區健康中心、專科門診同社區外展服務。
- 明愛醫院：全科醫院，提供急症、復康同紓緩治療服務，並設有兒童發展障礙服務；九龍西聯網眼科中心亦設於明愛醫院。
- 仁濟醫院：全科醫院，提供急症同復康服務，並設有中醫診所。
- 葵涌醫院：精神科醫院，提供精神科急症同外展服務。
