荃灣區

荃灣區係香港地方行政區之一，位於香港新界南部，區議會選舉嘅代碼係K，2007年選舉，分17分區。荃灣區以區核心地帶荃灣命名。

荃灣區

荃灣區核心地帶（青衣望過去荃灣）

荃灣區連埋葵青區夾埋嘅荃灣新市鎮，唔計新九龍，係新界第一個衞星城市，即家下嘅新市鎮。

2006年為止，荃灣區總面積約莫60.01平方千米，人口28萬8728，佔香港人口百分之4.2。

歷史

荃灣區嘅地界，係由荃灣理民府而來，屬理民府，係香港政府管治新界南部而設。後尾有地方行政白皮書，落實地方行政，就設立荃灣區議會。荃灣區議會係荃灣區嘅咨詢機構，係民選、委任同荃灣鄉事委員會主席組成。區議會喺1981年4月1號成立。佢係香港最早成立嘅區議會之一，皆因佢前身係「荃灣康樂市容諮詢委員會」，早到去1976年。過咗一年，喺1977年，就改名做「荃灣諮詢委員會」。再過幾年，喺1981年，就改組成「荃灣區議會」，除咗成個荃灣新市鎮外，重包括油柑頭、汀九、深井、青龍頭、嘉龍、馬灣、大嶼山北部同埋梨木樹等地方。

1981年到1985年期間，荃灣區嘅管轄範圍，包括成個荃灣新市鎮（荃灣、葵涌同埋青衣），東至金山郊野公園西面界線，南至荔景山路九華徑同埋荔景臺，西至青龍頭嘉龍村，北至大帽山郊野公園近荃錦坳同埋城門郊野公園近鉛鑛凹，而馬灣同埋大嶼山東北部亦係荃灣區嘅範圍。

隨住荃灣新市鎮發展，荃灣區人口不斷增加，政府為咗減輕區議會資源分配嘅負擔，就重新劃分地方行政區，喺1985年4月1號成立「葵涌及青衣區議會」（1988年4月1號改叫「葵青區議會」），集中服務葵涌同埋青衣居民。荃灣區重新劃界，東面以城門道、和宜合道、昌榮路、青山公路同埋德士古道為界，南面以汀九海岸線同埋馬灣海峽為界，西面仍然以青龍頭嘉龍村為界，北面仍然以大帽山郊野公園近荃錦坳同埋城門郊野公園近鉛鑛凹為界，馬灣同埋大嶼山東北部（包括陰澳、竹篙灣）仍然歸屬荃灣區。

地理

荃灣區喺新界中南部，東面係沙田區，南面係葵青區，西係屯門區，西北係元朗區，而東北係大埔區。荃灣區以荃灣市中心為核心，以海劃分，可以分成三部份，北面係新界大陸，東南面馬灣一島，同埋大嶼山個島嘅東北一角。後兩者雖然係離島，但因為居民來往以荃灣市為中心，所以傳統來講，都歸入荃灣區。

山

荃灣區大陸方面，北面一帶係山脈，山脈由九龍伸到去屯門。荃灣區來計，東面向西行，有針山、草山、鉛礦坳、香港最高峯大帽山、荃錦坳，直至大欖涌附近，大欖角東便入海。荃灣區天然北同東北邊界，就係順住呢條山脈嘅山脊。呢個山脈大部份都係郊野公園。南脈南邊重有比較矮啲嘅山，好似象山、芙蓉山、上花山、下花山、蓮花山等。

北便山脈一帶，東北城門山腰，草山同孖指徑之間嘅城門水塘，唔計新九龍，係香港政府響新界第一個起嘅水塘，供當時九龍用水所需，一直用到今日。

海

而南邊就對住藍巴勒海峽，隔開荃灣同青衣島。東南嘅地就相對平少少，同葵青區嘅葵涌部份相接。荃灣西約到青龍頭海皮，有唔少海灘，不過因水質關係，已經好少人游水。

市鎮

荃灣本來平地就唔多，市中心一帶，原本係淺灘來。為咗開市區，就填咗幾次海。荃灣新市鎮係早期衞星城市，所以設計以自給自足為主，區內有好多住宅區同工業區，等啲人唔使跨區返工。而市區生意對象，都係荃灣，葵涌同青衣島居民為主。不過1980年代，香港工業息微，居民就轉向服務業為主，到唔同區分返工，尤其係市區。

分區

荃灣區2003年起，選舉分17分區，順編號計，分別係德華、楊屋道、海濱、祈德尊、福來、愉景、荃灣中心、荃威、麗濤、麗興、荃灣郊區西、荃灣郊區東、綠楊、梨木樹東、梨木樹西、石圍角同埋象石。

人口

跟據返2011年嘅人口普查，荃灣區嘅人口有304,637人。區內大部份都係住私人樓，其次係公屋。