五支旗桿
五支旗桿，亦寫五支旗杆，或者五支旗竿，係香港名勝，喺九龍尖沙嘴，近尖沙嘴碼頭同星光行，亦近海運大廈，因地有五支旗桿而名。旗桿係九龍倉集團樹立，桿桿高低唔同。因爲就近碼頭同巴士站，舊時又係過海必經之路，就做咗約人勝地。「約喺五支旗桿等」係香港人口頭禪。
旗
編輯1997年主權移交前，五支旗桿係掛英國旗、香港旗、九龍倉旗、海港城旗同天星小輪旗。
1997年主權移交後到約莫2017年，五支旗桿改掛九龍倉旗、海港城旗、九倉電訊旗、香港有線電視旗、天星小輪旗。
約莫2017年後，隨住九倉電訊同香港有線電視先後賣盤，五支旗桿再改掛中華人民共和國旗、香港特區旗、九龍倉旗、海港城旗、天星小輪旗。
喺2019年香港修例風波期間，五支旗桿上嘅中華人民共和國旗兩度畀激進示威者扯落嚟掉落海。