亞洲奧林匹克理事會

亞洲奧林匹克理事會（Olympic Council of Asia；英文縮寫OCA），簡稱亞奧理事會，總部位於科威特，係國際奧委會授權，管理亞洲地區嘅奧運會、洲際賽事同埋國際體育賽事，並且負責亞洲地區奧運嘅發展同將佢嘅精神發揚光大嘅機構，重負責解決亞洲國家、地區之間或同其他非亞洲國家、地區之間發生嘅體育糾紛。

亞洲奧林匹克理事會嘅宗旨係：促進亞洲體育運動嘅發展。亞洲奧林匹克理事會現時擁有45個成員，佢哋主辦嘅最大活動係每4年一屆嘅亞洲運動會。為咗提高亞洲人嘅體育水平同提供更多嘅較量機會，亞奧理事會除設立亞運會之外，亦設立咗亞洲冬季運動會同埋亞洲沙灘運動會，令區內有更豐富嘅體育交流活動。

歷史

亞奧理事會嘅前身係1949年2月13號喺印度新德里成立嘅亞洲業餘體育聯合會，後來改名做亞洲運動會聯合會，總部設响科威特。1981年11月26號同1982年11月16號，亞洲運動會聯合會先後舉行兩次會議，決定將亞洲運動會聯合會改名做亞洲奧林匹克理事會。

大事記

1949年3月13號，亞洲運動會聯合會响印度新德里成立。
1981年11月26號成立，亞洲運動會聯合會改名，總部設喺科威特。
1992年4月，亞奧理事會接納中亞五國哈薩克、吉爾吉斯、塔吉克、土庫曼同烏茲別克為會員國。

會徽

第一代會徽係採用亞奧理事會會徽到2006年亞洲運動會。會徽中間嘅太陽代表亞洲運動嘅發展同埋推廣。上面係奧運五環，而在下面寫上「Ever Onward」^[1]；而响會徽下面就寫咗「Olympic Council of Asia」嘅字樣。

第二代會徽2006年12月2號喺多哈亞運會舉行期間公佈。新會徽中間係一輪太陽，太陽上面盤繞一條龍，下面環繞一隻鷹^[2]。代表亞洲嘅團結。而會徽下面有國際奧委會嘅會徽同「Olympic Council of Asia」字樣。新會徽即日開始用，但係响首個使用新會徽嘅運動會係2007年亞洲室內運動會^[3]。12月底，亞奧理事會嘅官方網頁已逐步換上新會徽。