伊蒙·德維利拉
伊蒙·德維利拉（愛爾蘭蓋爾文/英文：Éamon de Valera；1882年10月14號—1975年8月29號）係愛爾蘭歷史上最有影響力、亦都係最具爭議嘅政治人物之一。佢先後做過革命政府總統、愛爾蘭下議院議員、下議院議長、總統委員會主席、愛爾蘭總理同愛爾蘭總統，政治生涯長達半個世紀。
| 伊蒙·德維利拉 | |
|---|---|
 | |
| 姓名原文 | Éamon de Valera |
| 出生日 | 1882年10月14號  |
| 出生地 | 曼克頓 |
| 死亡日 | 1975年8月29號 （92歲） |
| 死亡地 | 都柏林 |
| 死因 | 肺炎 |
| 國籍 | 美國、愛爾蘭自由邦、愛爾蘭共和國 |
| 識嘅語言 | 英文、愛爾蘭蓋爾文 |
| 信奉 | 天主教會 |
| 學位 | Bachelor of Arts、理學士 |
| 母校 | Royal University of Ireland、C.B.S. Charleville |
| 職業 | 數學家、外交官、政治人 |
| 政黨 | Fianna Fáil、新芬黨 |
| 配偶 | Sinéad de Valera |
| 仔女 | Brian de Valera、Emer de Valera、Vivion de Valera、Máirin de Valéra、Éamon de Valera、Rúaidhrí de Valera、Terry de Valera |
| 阿爸 | Juan Vivion de Valera |
| 阿媽 | Catherine Coll |
[改維基數據] | |
早年
編輯伊蒙·德維利拉1882年喺美國紐約出世，阿媽係愛爾蘭移民嘉芙蓮·高（Catherine Coll），阿爸就係西班牙裔古巴人環·維維安·德維利拉（Juan Vivion de Valera）。佢哋兩個聽講係喺1881年9月18號喺新澤西州澤西市聖柏德歷大教堂結婚嘅，但係教堂同市政府都無今次結婚嘅證明。
1885年，環·維維安·德維利拉過咗身，嘉芙蓮·高又身無分文，於是伊蒙·德維利拉被佢阿叔尼德（Ned）帶咗返去愛爾蘭。嘉芙蓮·高後來嫁咗畀一個英國裔車夫查爾斯·維禮（Charles Wheelwright），但係伊蒙·德維利拉再都無返過去美國，而係去咗同佢婆婆伊麗莎白·高一家人住。之後，伊蒙·德維利拉先後喺廉尼郡嘅布魯利聖柏德歷國立學校（Scoil Naom Pádraig Brú Rí Scoil Náisiúnta）同埋沙夏城基督教兄弟學校（C. B. S. Charleville）讀過書。16歲，伊蒙·德維利拉獲得獎學金，但係被兩間書院拒收，祇有都柏林嘅黑石書院（Coláiste na Carraige Duibhe）錄取咗佢。伊蒙·德維利拉入讀咗之後，第一年就成為咗「年度頂尖學生」，重開始打橄欖球，後來重加入校隊擔當殿衛，帶領校隊一路殺入莫雲省高級盃。之後，伊蒙·德維利拉加入咗莫雲省橄欖球隊，從此同橄欖球結落不解之緣。
1903年，伊蒙·德維利拉被池伯歷治奧倫郡嘅佳石書院[暫譯]（Coláiste Charraig an Tobair）請咗做數學老師。1904年，德維利拉從皇家愛爾蘭大學畢業，拿到數學學位。佢之後入讀咗都柏林三一學院，但係因為缺乏生活費，讀咗一年就停咗學，返咗去黑石書院教數學。1906年，德維利拉喺嘉麗斯福教師訓練學院搵到一份教數學嘅工作。之後佢向新成立嘅愛爾蘭國立大學申請過做教授，但係唔成功，祇有馬努德分校請咗佢做兼職數學老師。之後佢重係都柏林嘅幾間學校教過數學。
伊蒙·德維利拉識得講愛爾蘭蓋爾文，後來亦都成為咗保護愛爾蘭蓋爾文嘅積極分子。1908年，德維利拉加入咗道格拉斯·希渣創立嘅蓋爾文同盟，之後重喺同盟裡面識咗後來同佢結婚嘅專業教師仙妮德·妮芙蘭納根（Sinéad Ní Fhlannagáin）。兩個人喺1910年1月8號喺都柏林聖保祿教堂結婚。德維利拉同妮芙蘭納根一共生咗5個仔同兩個女，五個仔分別叫做維維安、小伊蒙、布里仁（喺德維利拉夫婦過身之前就過咗身）、魯里同泰倫斯；兩個女分別叫做瑪蓮同伊美。
初試鋒芒
編輯1913年11月25號，伊蒙·德維利拉正式開始咗佢嘅政治生涯：佢加入咗愛爾蘭志願軍（後來嘅愛爾蘭共和軍），同保皇派嘅歐斯達志願軍對抗，同時保證愛爾蘭議會黨爭取到嘅愛人治愛政策得到落實。
第一次世界大戰爆發之後，伊蒙·德維利拉開始平步青雲，好快就當選咗愛爾蘭志願軍布洛堂連嘅連長。當愛爾蘭志願軍開始籌備武裝起義嘅時候，德維利拉被人任命為都柏林旅直屬第三營嘅營長，重參加咗1916年嘅以達峰武器走私行動。之後，德維利拉喺湯馬士·麥當夏達嘅見證之下，加入咗當時秘密指揮愛爾蘭志願軍嘅愛爾蘭共和兄弟會，不過德維利拉本人好反對秘密組織，所以佢加入愛爾蘭共和兄弟會，祇不過係為咗全面瞭解武裝起義嘅計劃。
1916年4月26號，復活節起義爆發。伊蒙·德維利拉嘅任務係為都柏林東南邊嘅起義部隊提供支援。佢手下嘅部隊控制咗大運河街嘅寶蘭麵粉廠，重一直堅持到起義領袖派崔克·皮亞士下令起義部隊向英軍投降。投降之後，德維利拉被英國軍事法庭判咗有罪，本來要處死刑，但係之後好快就改判咗做終身做苦力。歷史學家認為，德維利拉大難不死有四個原因：
- 德維利拉嘅同佢嘅部隊係最後投降嘅，所以佢被英國當局運咗去第間監獄，無同其他起義領袖被人困埋一齊，所以無辦法同時處死；
- 美國駐都柏林總領事館喺德維利拉受審之前派咗人向英國交涉，而英國方面由於極力想拉攏美國一齊打一戰，怕處死可能係美國公民嘅德維利拉會激嬲美國，所以無倉促行刑；
- 帶領英軍鎮壓起義嘅軍官麥斯韋爵士（Sir John Grenfell Maxwell）喺審閱德維利拉份檔案嘅時候，判定德維利拉祇不過係個小角色，就算唔槍斃都唔足以對英國構成威脅，所以將死刑改為終身監禁；
- 到德維利拉受審嘅時候，來自倫敦嘅政治壓力迫使麥斯韋爵士中止行刑。