伍倬弘
伍倬弘 （英文：Deran Ng Cheuk Wang，1997年7月12號—2023年4月6號 ），係香港葵芳閣劫案嘅殺人疑犯。喺2023年3月14號，佢喺葵芳閣搶劫期間，用鐵筆殺死咗梁雪卿，潛逃去咗日本，最後喺日本畏罪自殺。
| 伍倬弘 Deran Ng Cheuk Wang | |
|---|---|
| 出世 | 1997年7月12號 香港 |
| 死 | 2023年4月6號 日本山梨縣 |
| 國籍 | 中國（香港） |
| 出名原因 | 葵芳閣劫案殺人疑兇 |
簡介
編輯伍倬弘住喺梨木樹邨，讀過荃灣聖芳濟中學。據中學同學講，佢中學時期都算係努力嘅學生，仲以考入港大為目標。不過，佢嘅文憑試成績唔理想，最終只考入咗恆生大學。入學之後，伍倬弘性格突然大變，讀咗一年就退學。之後，佢開始沉迷賭博，仲欠咗一大筆賭債。2019年6月，佢曾試圖拎走患癌老豆嘅養病錢，結果俾家人趕出屋企，仲斷絕咗關係。
伍倬弘之後開始四圍搵中學同學同朋友借錢，借宿，但屢次都唔還錢，搞到朋友對佢疏離。喺反修例運動期間，佢識咗一個喺英國留學嘅女仔，因為話自己因為政見問題俾家人趕走，女仔收留咗佢，仲帶佢同女仔阿媽一齊住喺葵芳閣嘅單位。[1][2][3]
命案
編輯呢位女仔阿媽同鄰居梁雪卿好熟，仲有梁雪卿單位嘅後備門匙。伍倬弘有一次見到鄰居屋企有啲值錢嘅財物，2023年3月14號，趁單位無人嘅時候，用後備匙開門入去爆竊，偷走咗大約10萬蚊嘅財物。但呢時梁雪卿突然返屋企，撞破咗佢嘅行為，伍倬弘情急之下用鐵筆打死咗梁雪卿。之後，佢即刻潛逃去日本。
同年4月6號，香港警方接獲日本警方通知，當日中午喺山梨縣郊區發現一具男屍，懷疑係伍倬弘，現場有封遺書，內容講到畏罪自殺。