公園仔

  想搵第二個意思嘅話，請睇公園仔 (搞清楚)。

公園仔，公園一類，話佢細咁解，公眾去得到。用面積來計，約莫半公頃以下，即唔過五千平方米，英制計唔過一英畝。至於個款點樣，點樣用，起喺邊，就各有各異。有啲一笪地仔，有啲就三幾笪地仔組成。英文pocket park，就話佢衫袋咁細。

至簡單公園仔

有流水公園仔

社區中有可以放狗用

有啲就有兒童遊樂場

佢市區有、市郊有、鄕郊都有。之不過，市區就特別多，皆因地貴，要起市區公園又無咁多地。大多數都細，地亦一巖一窟。搵地有公家亦有私人，如起樓空地，如棕地，如鐵路邊，如公用綫路底，如泊車位咁。

公園仔唔使大型重建，都有地畀公眾用。內城計，少用地、廢置地因佢而化成活躍公家財產，市區重生一部份。亦成為城市規劃之中，創造公共空間要求一元。

公園仔提供市區活動同興趣聚腳地。乜元素都可以有。長椅得，檯又得，噴水池得，遊樂場又得，紀念建築物得，史蹟又得，藝術裝置得，燒烤爐又得，花牀得，社區花園同藍球場都得。

歐洲二戰後，城中炸到爛茸茸，百廢待興而手頭又緊。要恢復市容，至慳錢慳人用料平，就將爛屋爛地化成公園仔。公園仔又象徵和平。由此可謂公園仔起源。

香港公園仔，官家多數叫做休憩處。有啲專門啲好似兒童遊樂場、社區園圃，就未必叫休憩處。英文sitting-out area意思，祇不過一笪地，坐出戶外咁解，至常見有啲長椅，或者幾張櫈，再加啲草木美化。