伯遠帖

《伯遠帖》係晉朝書法家王珣嘅墨寶，全文五行四十七字以行書寫成。

《伯遠帖》

流傳

北宋嗰陣，《伯遠帖》入內府，喺《宣和書譜》記錄低。明代董其昌收藏呢份帖，佢話：「晉人真跡惟二王尚有存者，然米南宮時大令已罕，謂一紙可當右軍五帖，況王珣書，視大令不尤難覯耶！既幸予得見王珣，又幸珣書不盡湮沒得見吾也。」董其昌喺《畫禪寶隨筆》入面評論：「瀟灑古淡，東晉風流，宛然在眼。」

乾隆十一年（1746年）《伯遠帖》入到去內府，乾隆皇帝弘曆將呢份帖同王獻之嘅《中秋帖》加埋王羲之嘅《快雪時晴帖》合稱三希，一齊擺喺養心殿嘅「三希堂」入面。《伯遠帖》，因為第一行有「伯遠」兩隻字，就用佢做帖名。大清滅亡之後，《伯遠帖》同《中秋帖》曾經收喺敬懿皇貴妃住嘅壽康宮。

1924年11月5號，馮玉祥逼溥儀出宮，敬懿皇貴妃將呢份帖帶出宮，私底下將佢哋送去北平後門橋外古董鋪「品古齋」擺賣。北平四大收藏家之一嘅郭葆昌喺「品古齋」買到《中秋帖》同《伯遠帖》。郭葆昌應承故宮博物院文物館副館長馬衡、徐森玉同科長莊嚴，一百年之後將呢兩份帖無條件還翻畀故宮。郭葆昌死後，呢兩份帖畀咗佢個仔郭昭俊。《伯遠帖》本幅上鈐有“郭氏觶齋秘籍”，就係郭葆昌嘅收藏印。

1949年，郭昭俊帶住《中秋帖》同《伯遠帖》走路，去咗台灣。郭昭俊向莊嚴表示，只要政府畀一尐報酬，他就將「二希」捐出來。莊嚴四處籌措資金，都係冇辦法喺約定時間內攞錢出來，郭昭俊因做生意關係去香港，將《中秋帖》和《伯遠帖》押畀一個摩囉叉。嗰個摩囉叉以十多萬港紙抵押畀香港匯豐銀行。1951年10月初，喺香港嘅徐伯郊知道呢件事，即刻向鄭振鐸報告。徐伯郊又寫信畀故宮博物院院長馬衡，馬衡向大陸總理周恩來報告呢一件事。1951年周恩來指示將《伯遠帖》、《中秋帖》買翻來，話：「同意購回《中秋》、《伯遠》二帖。惟須派負責人員及識者前往鑒別真偽，並須經過我方現在香港的可靠銀行，查明物主郭昭俊有無訛騙或高抬押價之事，以保證兩帖能夠順利購回。」12月3號，《中秋帖》同《伯遠帖》返到去北京。23號，「二希」喺北海團城第一次展出，馬敘倫、陳叔通、章伯鈞等都喺受邀之列。1951年12月27號，王冶秋親自將《中秋帖》同《伯遠帖》交故宮博物院收藏。

原文

王珣《伯遠帖》，現藏於北京故宮博物院

珣頓首頓首。伯遠，勝業情期，群從之寶。自以羸患，志在優遊，始獲此出，意不剋申。分別如昨，永為疇古，遠隔嶺嶠，不相瞻臨。

唐人真跡已不可多得，況晉人耶！內府所藏右軍快雪帖，大令中秋帖，皆希世之珍。今又得王珣此幅繭紙家風信堪並美！幾餘清賞亦臨池一助也。御識。