畀佢哋食蛋糕囉

畀佢哋食蛋糕囉（粵拼：bei2 keoi5 dei6 sik6 daan6 gou1 lo1）係出名法文句子 Qu'ils mangent de la brioche ! 嘅通用意譯。

描繪瑪麗安東妮嘅人像畫；
大臣：皇后陛下，啲平民窮到連麵包都食唔起喇！
想像中嘅瑪麗皇后：冇麵包嘅話，食蛋糕咪得囉。

當中要留意 brioche 嚴格嚟講係指甜包（一種傳統嘅法國貴價包點）而唔係指蛋糕，不過英文同德文等語文入面嘅譯句，都當咗句嘢提到嗰樣嘢食係蛋糕，例如英文就將句嘢譯做

let them eat cake —

Let	them	eat	cake
動詞	代名詞	動詞	名詞
畀（某人做某樣嘢）	佢哋	食	蛋糕

史實

睇埋：瑪麗安東妮

句嘢相傳係喺 1789 年出自法國最後一位皇后——瑪麗安東妮（Marie Antoinette）嘅：嗰時法國嘅皇室生活窮奢極侈，當中瑪麗安東妮出咗名大使、鍾意享樂；同時啲平民就極之窮困，仲飽受饑荒煎熬；根據傳說，當瑪麗安東妮聽到「平民連麵包（歐洲傳統上嘅主糧）都食唔起」嗰陣，就隨口講咗句 Qu'ils mangent de la brioche !—反映法國皇室係幾咁唔知民間疾苦；最後啲平民作反，引起改革全歐洲嘅法國大革命。

歷史學家做過啲研究，似乎呢句說話係啲人老作嘅：嗰時法國皇室的確係生活極之奢侈，而瑪麗安東妮真係好揮霍無度，但並冇紀錄顯示瑪麗安東妮真係講咗句噉嘅說話；實情比較似係，有仇視法國皇室嘅人老作咗個噉嘅故仔出嚟，諗住唱衰瑪麗安東妮；亦都有講法係，講呢句說話嘅查實另有其人，不過好多平民都好憎瑪麗安東妮，所以就當咗呢句刻薄說話係佢講嘅。

用法

到咗廿一世紀初，畀佢哋食蛋糕囉（或者句嘢嘅變體）成日俾西方世界嘅人引用。用法可以係噉：

某富家子弟提出咗個諗頭，個諗頭反映佢明顯唔理解平民苦況。

反駁者：噉又係，冇麵包嘅話，咪畀佢哋食蛋糕囉。係咪噉講？

—反駁者就係想話嗰位富家子弟唔知民間疾苦。

睇埋

• 法國大革命
• 何不食肉糜

拎

• （英文） Uncover the reality behind Marie-Antoinette's famous phrase, "Let them eat cake"，《不列顛百科全書》