傲璇

傲璇（英文：Opus Hong Kong）係香港私人住宅，喺香港島灣仔司徒拔道53號，2012年起好，高12層，總共12個單位。

傲璇

傲璇係太古地產2012年起好嘅樓盤，由美國建築師法蘭克蓋里設計，係佢响亞洲第一個高尚住宅項目。傲璇總面積約3.25萬平方呎。大樓結構呈螺旋形，玻璃包圍嘅鋼柱包圍成棟樓。項目除傳呎價高見港幣8萬外，更盛傳每方呎管理費高達9蚊，以每伙達6,000方呎單位計算，每月管理費已經要5萬4千蚊，可能係全香港最貴管理費嘅豪宅。傲璇有12個獨特單位，包括兩個複式花園連游泳池嘅空中別墅。單位面積由6,000平方呎起，設施有地下停車場、游泳池及健身室等。