兑分仔

兑分仔（粵拼：deoi3 fan1 zai2；異體字：兌分仔）係喺機舖道買賣街機積分嘅人，令打機客可以間接賭錢；呢行屬於偏門。

原理

粵語區嘅兩廣、香港同澳門，各自有規矩，只准指定嘅一至幾檔嘢開賭。因此，機舖同埋非法賭檔入面擺嘅機器，都無直接賭錢嘅功能。正式賭場所用嘅跑馬機、老虎機同輪盤等等，以貨幣計輸贏，而其他舖頭所用嘅品種就只會計積分。

「正常」噉計，客人會使錢由機舖職員度買儲喺咭入面嘅積分。插張咭入部街機度，就有得玩——輸會扣分，贏到就加；唯一用處係攞嚟繼續打機。

兑分仔做嗰啲「反常」嘢，就係將客人（尤其是熟客）嘅積分換成現錢，令到積分就好似賭場籌碼噉樣，可以同現錢雙向兑換（就算次次都要蝕水），即係有得變相賭錢。喺呢啲積分嘅買賣過程之中，渠哋有佣抽。而呢種中間人嘅另一個用處，係幫舖頭東主逃避法律責任。