全國獨立黨

全國獨立黨（英文：National Independent Party）係2015年1月成立嘅香港政治組織，鼓吹用激進手段推動香港獨立，自稱屬香港本土派。呢個組織因為西貢蠔涌亞視舊片廠炸彈案而被傳媒廣泛報道，不過好多本土派人士同支持者都表示喺呢單案之前未聽過呢個組織，甚至質疑事件係咪騙局或者嫁禍。

全國獨立黨已經被瓦解，連網頁都處於凍結狀態。

亞視舊片廠炸彈案

2015年6月15號，警方喺西貢蠔涌亞視舊片廠破獲一個炸藥庫，拘捕十個男女，年齡介乎 21 到 58 歲，佢哋涉嫌串謀製造炸彈，部份自稱係「全國獨立黨」成員。警方並搜獲可製作高爆炸性物品三過氧化三丙酮（TATP）嘅原材料、多支氣槍，同埋標示金鐘、灣仔同「炸藥庫」嘅地圖。組織曾喺網上聲言，如果政改通過，「香港人要有心理準備當日會有傷亡」。

事件引起咗唔少人嘅關注，但亦有人指出事件非常奇怪。有網民話佢哋Facebook用字古怪，如本土派用「回歸」、「蛇齋糭餅」四字次序唔對，懷疑事件係唔係嫁禍。又有網民指出，佢哋得200幾個讚好，影響力極為有限。如果有人故意想模仿本土派，其實留下呢啲言論亦無難度可言。時事評論員劉細良話，佢哋連政黨名都唔合乎政治運動嘅邏輯，又比喻事件好似當年中共喺文化大革命期間，以抓「內人黨」嘅名義去對付異己，但「內人黨」根本唔存在。