公孫瓚
公孫瓚（—199年），字伯珪，係東漢末期人，幽州遼西令支人[1]，曾經做到前將軍，封易侯。
| 公孫瓚 | |
|---|---|
 | |
| 東漢 前將軍、易侯 | |
| 生 | ？年 |
| 死 | 199年 |
| 活躍時期 | ？～199年 |
| 仔女 | 公孫續 |
| 遞啲名 | |
| 字 | 伯珪 |
生平
編輯早年
編輯公孫瓚係豪族出身，但係因為佢亞媽出身低微，所以只做到書佐。後尾佢因為美貌、聲音洪亮同埋才智而受到太守侯某賞識，仲娶咗侯某個女。公孫瓚喺侯某嘅幫助下同劉備同埋劉德然一齊拜盧植做先生。[2]公孫瓚後尾喺太守劉其嗰度做嘢。劉其因為犯法而被發配去交州嘅日南，公孫瓚扮成士兵沿途護送，途中劉其俾朝廷赦免咗。公孫瓚返嚟之後因為呢件事而俾舉孝廉，做咗遼東屬國嘅長史。[3]
攻打外族
編輯公孫瓚擔任長史期間曾經用幾十個騎兵做低幾百個鮮卑騎兵，升為涿令。光和年間，因要要討伐涼州嘅盜賊而俾授與都督行事傳[4]。後尾因為做低漁陽張純同埋遼西烏丸丘力居等有功而升做騎都尉[5]。烏丸貪至王帶人投降公孫瓚，公孫瓚又升做中郎將，封都亭侯[6]。公孫瓚曾經組織過一班擅射嘅騎兵，佢哋只騎白馬，自稱自己做「白馬義從」。[7]
逐鹿河北
編輯公孫瓚曾經叫佢上司劉虞唔好派兵幫袁術，佢驚俾袁術怪罪，因此派自己嘅細佬公孫越帶千幾人去幫袁術[8]。孫堅喺陽城之戰俾袁紹部下周昂做低咗，公孫越亦都俾流矢射死咗，公孫瓚因此好憎袁紹[9]。袁紹將自己勃海太守嘅印綬送畀公孫瓚嘅細佬公孫範，諗住搞好雙方嘅關係[10]。初平二年（191年），公孫範派勃海兵幫公孫瓚做低青州黃巾軍[11]，公孫瓚升做奮武將軍，封薊侯。佢羅列袁紹嘅十大罪狀，冀州好多官員都投降公孫瓚。公孫瓚自行任命三州嘅刺史，嚴綱做冀州刺史，田楷做青州刺史，單經做兗州刺史，並且自行設置各地嘅地方長官[12]。之後佢喺同年嘅冬天同袁紹發生界橋之戰，但俾袁紹嘅手下麴義做低，嚴綱被擒殺，公孫瓚同佢細佬走返去薊[13]。初平三年（192年)，公孫瓚喺龍溱同袁紹開戰，但俾袁紹做低，公孫瓚走返幽州[14]。之後袁紹派手下崔巨業領兵圍攻故安，但係打唔落嚟，撤退嗰陣喺巨馬水俾公孫瓚派嘅三萬人做低，死咗七八千人[15]。
殺害上司
編輯佢成日討伐外族，違反咗佢身為漢室宗親上司劉虞嘅親外族對策，加上佢之前暗中建議袁術佔用劉虞嘅支援同扣留佢個仔劉和，加深咗佢同劉虞嘅唔啱[16]。劉虞最後實在忍唔住，帶兵十萬攻打公孫瓚[17]，結果俾公孫瓚做低咗，之後仲俾公孫瓚搵借口殺咗[18]。劉虞生前有人望同有愛心，呢事激嬲咗佢嘅屬下鮮于輔佢哋推舉閻柔做烏桓司馬，起兵攻打幽州，喺潞河北部做低咗公孫瓚嘅部將鄒丹，殺咗鄒丹同埋佢嘅四千幾人，烏桓峭王借兵俾劉虞亞仔劉和，佢哋聯合袁紹派嚟嘅援軍，喺鮑丘做低公孫瓚軍，殺咗二萬幾人，公孫瓚只好匿入易京城入面固守。[19]。
敗亡
編輯公孫瓚攞到幽州之後，為咗發展自己嘅勢力，迫害當地嘅好多名士同埋富商，加上佢重用劉緯臺、李移子同埋樂何當嚟啲小人[20]，導致好多喺過去信任佢嘅手下離開咗佢嘅陣營。公孫瓚之後因為一首童謠話：「燕南垂，趙北際，中央不合大如礪，惟有此中可避世。」，因此喺易興建咗一座叫易京嘅城堡[21]。係被袁紹做低好多次之後，公孫瓚更加強化易京嘅守備，之後匿係入面唔肯出嚟，仲拒絕救援先前派出去各地戍守嘅部將，導致佢哋全部俾袁紹軍做低曬。建安四年（199年），袁紹親自帶領大軍攻打公孫瓚，公孫瓚匿喺易京嗰度唔敢出嚟，並且派佢亞仔公孫續聯絡黑山軍嘅首領張燕，準備做低包圍自己嘅袁紹軍[22]。然而件事被袁紹知道咗，袁紹用火光引誘公孫瓚出嚟，公孫瓚喺城樓上見到亮起火光，即刻帶兵出城，結果當場中伏，最終俾袁紹軍做低，公孫瓚匿返入去易京入面唔再出嚟[23]。袁紹派人用崛隊道到城落面，並且放火燒咗城牆底部嘅木柱(地基)，城牆因此倒塌[24][25]。公孫瓚見到城牆都冇咗，認為自己已經無力回天，於是殺咗自己嘅老婆之後自殺[26]。
部下
編輯- 嚴綱：公孫瓚嘅冀州刺史，喺界橋之戰被袁紹部將麴義臨陣斬殺。
- 田楷：公孫瓚嘅青州刺史，曾經喺巨馬水之戰嗰時做低麴義，後尾同劉備一齊到徐州救援陶謙。
- 單經：公孫瓚嘅兗州刺史。
- 鄒丹：公孫瓚嘅漁陽郡太守，喺潞河被閻柔做低咗。
- 關靖：長史，喺易京之戰前勸公孫瓚唔好攻打袁紹。易京之戰嗰陣後悔自己先前嘅勸阻搞到輸咗，於是同袁紹軍決戰戰死。
- 劉備：平原令，同田楷一齊抗擊袁紹，後尾同田楷到徐州救援被曹操攻打嘅陶謙，之後改投陶謙。
- 趙雲：帶領義軍加入公孫瓚，曾經同劉備一齊駐守平原，後尾話要幫亞哥奔喪而離開。
- 田豫：東州縣令，王門叛變嗰陣親自上陣鬧王門，鬧到王門羞愧退兵。
- 王門：叛變後帶住袁紹俾嘅萬餘兵馬攻打東州，被縣令田豫鬧到退兵。
- 范方：喺公孫瓚嘅指示下帶領部隊支援劉岱，後尾劉岱聽咗程昱嘅意見而親近袁紹，范方俾公孫瓚叫咗返去。
- 季雍：公孫瓚嘅鄃縣縣令。一開始幫袁紹做嘢，後尾背叛袁紹加入公孫瓚嘅陣營。之後袁紹派部將朱靈將佢做低。
- 文則：建安四年初（199年），黑山賊帥張燕領兵十萬嚟救公孫瓚。援兵未到，公孫瓚就派部將文則到約定點火為號，佢喺途中被袁紹軍俘虜，袁紹因此喺約定點嗰度埋伏公孫瓚。
- 李邵：鉅鹿太守，公孫瓚討伐袁紹嗰時投靠公孫瓚，俾董昭用計殺咗。
- 孫伉：同李邵一齊被董昭用計殺害。
- 張吉：公孫瓚嘅部將，董昭利用佢散佈假情報，搞死李邵同埋孫伉。
- 劉緯臺（算命佬），李移子（賣布嘅人），樂何當（小商販）：公孫瓚嘅契弟。
- 公孫紀：劉虞部將，因為同公孫瓚同姓而被佢當成兄弟咁對待。所以佢爆咗劉虞嘅計劃俾公孫瓚知，令公孫瓚有機會反殺劉虞。
參考
編輯引用
編輯- ↑ 《三國志·魏書八·二公孫陶四張傳》：公孫瓚字伯珪，遼西令支人也。
- ↑ 《三國志·魏書八·二公孫陶四張傳》：為郡門下書佐。有姿儀，大音聲，侯太守器之，以女妻焉，遣詣涿郡盧植讀經。
- ↑ 《三國志·魏書八·二公孫陶四張傳》：後復為郡吏。劉太守坐事徵詣廷尉，瓚為御車，身執徒養。及劉徙日南，瓚具米肉，於北芒上祭先人，舉觴祝曰：「昔為人子，今為人臣，當詣日南。日南瘴氣，或恐不還，與先人辭於此。」再拜慷慨而起，時見者莫不歔欷。劉道得赦還。瓚以孝廉為郎，除遼東屬國長史。
- ↑ 《三國志·魏書八·二公孫陶四張傳》：光和中，涼州賊起，發幽州突騎三千人，假瓚都督行事傳，使將之。
- ↑ 《三國志·魏書八·二公孫陶四張傳》：瓚將所領，追討純等有功，遷騎都尉。
- ↑ 《三國志·魏書八·二公孫陶四張傳》：屬國烏丸貪至王率種人詣瓚降。遷中郎將，封都亭侯
- ↑ 《三國志·魏書八·二公孫陶四張傳》注引《英雄記》：瓚每與虜戰，常乘白馬，追不虛發……簡其白馬數千匹，選騎射之士，號為「白馬義從」。一日胡夷健者常乘白馬，瓚有健騎數千匹，多乘白馬，故以號焉。
- ↑ 《後漢書·卷七十三·劉虞公孫瓚陶謙列傳》：瓚既諫劉虞遣兵就袁術，而懼術知怨之，乃使從弟越將千餘騎詣術自結。
- ↑ 《三國志·魏書八·二公孫陶四張傳》：術遣孫堅屯陽城拒卓，紹使周昂奪其處。術遣越與堅攻昂，不勝，越為流矢所中死。瓚怒曰：「余弟死，禍起於紹。」遂出軍屯磐河，將以報紹。
- ↑ 《三國志·魏書八·二公孫陶四張傳》：紹懼，以所佩勃海太守印綬授瓚從弟範，遣之郡，欲以結援。
- ↑ 《三國志·魏書八·二公孫陶四張傳》：範遂以勃海兵助瓚，破青、徐黃巾
- ↑ 《三國志·魏書八·二公孫陶四張傳》：以嚴綱為冀州，田楷為青州，單經為兗州，置諸郡縣。
- ↑ 《三國志·魏書八·二公孫陶四張傳》：紹軍廣川，令將麴義先登與瓚戰，生禽綱。瓚軍敗走勃海，與範俱還薊
- ↑ 《後漢書·卷七十四·袁紹劉表列傳》：三年，瓚又遣兵至龍湊挑戰，紹復擊破之。瓚遂還幽州
- ↑ 《後漢書·卷七十三·劉虞公孫瓚陶謙列傳》：紹遣將崔巨業將兵數萬攻圍故安不下，退軍南還。瓚將步騎三萬人追擊於巨馬水，大破其觿，死者七八千人。
- ↑ 《後漢書·卷七十三·劉虞公孫瓚陶謙列傳》：初，公孫瓚知術詐，固止虞遣兵，虞不從，瓚乃陰勸術執和，使奪其兵，自是與瓚仇怨益深。
- ↑ 《後漢書·卷七十三·劉虞公孫瓚陶謙列傳》：四年冬，遂自率諸屯兵觿合十萬人以攻瓚。
- ↑ 《三國志·魏書八·二公孫陶四張傳》：瓚誣虞欲稱尊號，脅訓斬虞。
- ↑ 《三國志·魏書八·二公孫陶四張傳》：虞從事漁陽鮮于輔、齊周、騎都尉鮮于銀等，率州兵欲報瓚，以燕國閻柔素有恩信，共推柔為烏丸司馬。柔招誘烏丸、鮮卑，得胡、漢數万人，與瓚所置漁陽太守鄒丹戰於潞北，大破之，斬丹。袁紹又遣麴義及虞子和，將兵與輔合擊瓚。瓚軍數敗，乃走還易京固守。
- ↑ 《三國志·魏書八·二公孫陶四張傳》注引《英雄記》：寵遇驕恣者，類多庸兒，若故卜數師劉緯臺、販繒李移子、賈人樂何當等三人，與之定兄弟之誓，自號為伯，三人者為仲、叔、李，富皆巨億，或取其女以配己子，常稱古者曲周、灌嬰之屬以譬也。
- ↑ 《英雄記》：先是有童謠曰：「燕南垂，趙北際，中央不合大如礪，惟有此中可避世。」瓚以易當之，乃築京固守。
- ↑ 《三國志·魏書八·二公孫陶四張傳》：建安四年，紹悉軍圍之。瓚遣子求救於黑山賊，复欲自將突騎直出，傍西南山，擁黑山之眾，陸梁冀州，橫斷紹後。
- ↑ 《三國志·魏書八·二公孫陶四張傳》：紹侯者得其書，如期舉火。瓚以為救兵至，遂出欲戰。紹設伏擊，大破之，復還守。
- ↑ 《三國志·魏書八·二公孫陶四張傳》：紹為地道，突壞其樓，稍至中京。
- ↑ 《英雄記》：袁紹分部攻者掘地為道，穿穴其樓下，稍稍施木柱之，度足達半，便燒所施之柱，樓輒傾倒。
- ↑ 《三國志·魏書八·二公孫陶四張傳》：瓚自知必敗，盡殺其妻子，乃自殺。