袁紹

袁紹（粵拼：jyun4 siu6；154年—202年），字本初bun2 co1，豫州汝南汝陽（今河南商水），東漢末年政治家、割據軍閥。佢曾經俾其他諸侯推舉做討董聯盟嘅盟主。討董聯盟解散之後，袁紹同北方嘅諸侯公孫瓚爭奪河北，最後佢喺易京之戰將公孫瓚做低。嗰時嘅袁紹控制住河北嘅幽州、并州、冀州同埋青州四個州，係東漢末年最強大嘅諸侯。之後袁紹派兵南下，諗住打低中原嘅諸侯曹操，但佢喺官渡之戰輸畀曹操，又喺第二年嘅倉亭之戰再輸多一次，實力大減，冇耐佢就病死咗。佢死咗之後，佢兩個仔袁譚同埋袁尚為咗爭老豆嘅位而內訌，結果佢哋兩個俾曹操做低，而河北四州亦都俾曹操攞到手。