廨

廨（粵拼：gaai3 ），官衙屋宇一種，本身畀官吏住，或兼辦公務，或兼倉庫。然而有錢會另建私宅。至早漢就有，至少用到大清。按唔同亦會叫公廨、郡廨、縣廨、官廨、治廨、廨館、廨宇、廨舍等等，甚至按職如將軍廨、尹兆廨、丞廨、訓導廨、教授廨等等。唔止唐人地方有，日本都有。日本公廨有所謂公廨田、公廨稻、公廨錢。舊日俸祿糧幾多石計，亦有咁必要。實情隋唐有公廨田，同來補助官吏供給。

廣州府側邊，有東公廨，有西公廨。

唔少字典解廨，都解做官署。然而由文獻睇，廨實情畀官吏棲息屋宇。牛若麟重修治廨記咁寫，「既立聽政之堂、必立棲息之廨」。

漢王充論衡咁寫，「星之在天也、為日月舍、猶地有郵亭、為長吏廨也。」可見廨為長吏屋宇，會留喺度住。南朝，顏之推顏氏家訓，「梁孝元在江州時、有人為望蔡縣令、經劉敬躬亂、縣廨被焚、寄寺而住」。又蕭繹金樓子又咁寫「夜還向城、入南郡空廨、無牀席、地寢至旦」廨空咗無牀，要瞓地下，見到廨可以瞓。由此可見廨畀官吏住。

大清同西方治外法權影響，喺上海開咗衙門，叫會審公廨，以大清律例、用來審理大清國人，同唔受治外法權嘅人。會審即大清同外國派人會審。依個到中華民國重有，但後來廢咗。

大明大清時，臺灣土著亦有公廨，族中廟堂議事，又兼未成年住所 。

名

廨，廣東話一直讀解讀界，大清時字典並無其他讀法。二十世紀中，字典就加咗懈音。

正寫廨，跟⼴部。之不過，大清時文獻好多時寫𪠘，跟⼚部。