冗餘

冗餘（粵拼：jung2 jyu4；英文：redundancy）指同個系統加啲「多餘」嘅功能，呢啲「多餘」功能喺冇故障嘅世界入面係唔必要，但可以提升個系統嘅容錯性。攞住「要提升佢容錯力」嘅系統部份，設計者可以將個系統部份複製幾次，啲複製品用嚟做後備；噉一旦個系統部份軭咗，個系統就可以即刻改為用啲後備部件頂替。

舉例說明，啲大型嘅船同飛機好興設計成有多過一部發動機（將發動機複製咗幾次）；噉如果架嘢嘅主發動機出咗故障，佢哋就可以改為用後備發動機嚟推動架嘢，等架嘢仲可以繼續行，或者起碼有足夠時間駛去安全嘅地方。

一條懸索橋嘅抽象圖解；條橋攞好多條纜吊住，查實條橋就算唔用咁多條纜都一樣吊得起（冗餘）－如果條橋嘅纜出事，搞到成條橋向下跌，可以造成嚴重人命傷亡，所以工程師就同條橋落大量嘅冗餘，想確保條橋夠嗮安全。

例外處理

内文：例外處理

又例如程式編寫噉，控制流程上就有所謂嘅例外處理（exception handling），好似以下呢段 Python 源碼噉：

  try: #「試吓行 try 嘅碼先。」
    print(x)
  except: #「如果 try 段碼出錯，噉就行 except 嘅碼。」
    print("An exception occurred")

當中 except: 入面嗰段碼就係冗餘嘅部份－喺冇出錯嘅世界入面，嗰段碼係冇需要存在嘅，但有咗 except: 段碼喺度，就可以喺 try: 段碼出事嗰陣有個後備保障。Python 以外嘅多種程式語言（好似係 C++ 同 Java 呀噉）都有例外處理嘅功能。

睇埋

• 容錯能力
• 成本
• 工程設計
• 例外處理
• 語言冗餘