創業

創業（英文：entrepreneurship）係指一個人肯冒住風險搞一盤生意，當中「冒風險」意思係指搞呢盤生意嘅人（創業者）要－

• 孭最大嘅責任（蝕錢佢要孭）；
• 同時成功嘅話佢又會享受最多嘅成果（賺到嘅利潤主要歸佢）。

美國創業家喬布斯生前嘅相；佢係蘋果公司嘅其中一個創辦人。

現實嘅經驗表明，創業係創新嘅一大來源：本質上，創新就係要試行一啲前人未試過嘅諗頭，所以梗會有風險，尤其係大嘅創新好多時都會挑戰一啲固有嘅諗法而初頭唔俾人睇好；同時大間嘅企業成日都唔肯博，想一味淨係靠持續型創新討好股東－有高風險大諗頭嘅人，就往往焗住要揼低手上份工或者做緊嘅嘢，自己搞生意創業。

例如係 Facebook 嘅創辦人朱克伯格（Mark Zuckerberg）就係一個出名嘅創業家，佢後生嗰陣喺哈佛大學讀讀吓書絕學走去搞生意，搞生意嘅中途佢喺間企業裏面擔當咗領導嘅角色，而且佢唔似得一般嘅管理者噉淨係收人工幫手管啲員工，而係以佢間企業賺到嘅利潤做佢嘅入息主要來源，仲會帶領間公司做嘅研發，最後搞出咗 Facebook 做埋億萬富翁。

創業呢家嘢唔易做－創業有好多都係失敗收場，成功嘅創業家需要有返咁上下聰明，能夠諗出有潛力嘅諗頭；而且仲要有超乎常人嘅動機捱得住「盤新生意乜都要自己搞」嘅重大壓力，又要有一定嘅魅力能夠有效噉向人推廣自己嘅產品。因為噉，有唔少管理方面嘅工作者都會對喬布斯等嘅創業家做個案研究，想知有冇方法可以參考佢哋嘅成功，嚟得知點先可以成功噉創業。

睇埋

• 管理
• 創新