動機（粵拼：dung6 gei1；英文：motivation），又或者叫動力，係指一個人或者一隻動物「想做某樣嘢」嘅動力，通常起源自佢嘅目的。動機喺心理學上好重要，用嚟解釋人類點解會做出某啲行為，點解會努力追求目標，或者點解會放棄某啲嘢。
工作動機係指做嘢嘅動機，係組織心理學成日研究嘅嘢。
人做嘢嘅動機可以分做外在同內在[1]兩大類；外在動機係指個人做一樣嘢係為咗想要攞到某啲回報（例如錢），一冇咗嗰樣回報就唔會再想做嗰樣嘢（冇錢嘅話就唔開工），而內在動機就係指個人做一樣嘢係因為覺得樣嘢過癮，就算冇回報都會照做（例如一個老師覺得教書好有意義，就算冇糧出冇人迫佢，佢都肯加班）。
