劇道場

劇道場（Theatre Dojo）係香港一個獨立非牟利舞台劇團，「道場」一詞嚟自日文DOJO，由歐錦棠同佢老婆萬斯敏共同創立。2015年起係上環文娛中心場地伙伴計劃駐場劇團之一，每年大約推出三套舞台劇作品，同埋一系列嘅演技課程，致力推廣舞台劇同埋培育演藝新材。

歐錦棠同萬斯敏兩人除咗台前演出，亦兼任創作監督等等嘅事務，積極發掘唔同領域嘅題材同埋同藝人聯合演出，例如邀請著名日本動作片演員倉田保昭出演宮本武藏（2013年）、同王宗堯合演香港版科學怪人（2017年）等等。亦有到美國、加拿大、澳洲等地方作巡迴演出。

為加強同觀眾嘅互動溝通，劇團於2018年推出《劇場有道》Facebook直播節目，由歐錦棠同萬斯敏主持，談論不同嘅藝術文化熱門話題。

2020年，劇團深受武漢肺炎疫情影響，近10 個月無收入，但歐錦棠仍然照畀租金同人工。2021年7月，歐錦棠喺社交媒體宣布「劇道場」將會道別觀眾，原因係外在環境瞬速嘅轉變。