科學怪人
搵緊同名角色嘅話，請睇〈科學怪人 (角色)〉。
《
《科學怪人》嘅主角係一位後生嘅英格蘭科學家維特·弗蘭肯斯坦（Victor Frankenstein [註 1]），情節講到弗蘭肯斯坦因為好奇而創造咗一隻恐怖嘅怪獸出嚟，隻怪獸有能力諗嘢，而且佢仇視弗蘭肯斯坦，打後仲直接間接噉殺咗弗蘭肯斯坦嘅幾個親人朋友。
《科學怪人》影響力幾大：依本小說被指係最重要嘅哥德式小說之一，而且仲開創咗好幾個諗頭，係後世嘅科幻同恐怖故仔成日用嘅（例子可以睇吓科學怪人情結）。到咗廿一世紀初，本小說仲有好多人攞嚟睇。
情節大要改
《科學怪人》依本小說用咗書信體嘅寫法，即係話本小說特登寫到好似係一連串嘅信噉嘅樣。
本小說開頭講到身為船長嘅羅拔·渦頓（Robert Walton）同佢個妹瑪格列（Margaret）寫信畀對方。個故仔設咗喺 18 世紀（啲信啲日子嘅年份係 17--），講到渦頓船長帶領住佢啲船員去北極探險，諗住幫手推進科學知識。喺半途，佢哋見到一隻神秘嘅巨型人形怪獸拖住隻雪橇，但隻怪獸話咁快就消失咗。幾個鐘頭後，班船員搵到個就嚟凍死嘅男人。佢哋將個男人帶上船，仲救返佢條命。過咗冇幾耐，個男人神智恢復清醒，佢個名叫維特·弗蘭肯斯坦。渦頓船長出於好奇問弗蘭肯斯坦做乜一支公走嚟北極。弗蘭肯斯坦見到渦頓船長對科學好有興趣，就警告渦頓船長，話佢自己一世人搞到咁悽涼，就係搞科學搞到噉。
小說跟住落嚟嘅內容，用咗框架故仔噉嘅做法，寫到好似係「渦頓船長寫信，講返佢由弗蘭肯斯坦嗰度聽到嘅嘢」噉。
主角嘅背景改
成個故仔起始喺弗蘭肯斯坦嘅童年。弗蘭肯斯坦喺意大利拿坡利出世，佢家境富裕，有兩個親生嘅細佬，一個養妹伊利沙伯（Elizabeth）同埋一個養姐育士甸（Justine）。佢哋一家人生活融洽。由好細個開始，弗蘭肯斯坦就熱愛科學同各種嘅學問，有研究過煉金術（不過佢大個啲就知煉金術根本唔掂）等嘅好多諗頭。
正喺弗蘭肯斯坦要去德國讀大學嗰陣時，佢阿媽病死咗，搞到弗蘭肯斯坦好沮喪，仲因而更加沉醉於科學，想靠住科學嚟忘卻傷痛。弗蘭肯斯坦喺大學度成績優異，零舍擾長化學等嘅科學。冇幾耐，佢發明咗種技術，能夠將生命賦與畀冇生命嘅物質。出於好奇，弗蘭肯斯坦想試吓用依種技術創造一嚿人形嘅有生命物體，於是佢就搵咗啲嚟自人死屍嘅身體部份，再喺自己嘅實驗室度將依啲部份砌埋一齊，形成一個 8 呎（2.4 m）咁高嘅怪獸身體。乜都準備好嗮之後，佢就郁手「賦與生命」－啲砌埋一齊嘅身體部份真係開始郁，不過弗蘭肯斯坦嘅技術似乎出咗少少錯，隻怪獸生得好核突，佢啲皮膚甚至有少少遮唔到佢啲肌肉同血管。弗蘭肯斯坦畀隻怪獸嚇親，就有咁快得咁快走咗。跟住嗰日，弗蘭肯斯坦同佢嘅童年好友亨利（Henry）見面，佢返到自己嘅實驗室，發覺隻怪獸已經唔見咗。
弗蘭肯斯坦受驚過度，嚇到病咗。跟住落嚟嗰 4 個月，弗蘭肯斯坦一路受住亨利嘅照顧。好返之後，弗蘭肯斯坦收到佢阿爸寫嘅信，得知佢其中一個細佬威廉（Willam）畀人謀殺死咗。弗蘭肯斯坦即刻起程返屋企。佢喺兇案現場見到隻怪獸嘅身影，認定咗單嘢係隻怪獸嘅所為。冇幾耐之後，啲人喺弗蘭肯斯坦個養姐育士甸嘅衫袋當中搵到屬於威廉嘅物品，育士甸因而畀人指控佢係兇手，弗蘭肯斯坦心知單嘢係隻怪獸做嘅，但亦知道佢講咗出嚟都唔會有人信。最後育士甸因為謀殺罪成被處死，弗蘭肯斯坦、佢阿爸同伊利沙伯因為一嘢冇咗兩個屋企人而悲痛不已。
後嚟弗蘭肯斯坦去咗行山諗住散吓心，佢喺深山行行吓撞到隻怪獸。隻怪獸原來有智能識講嘢，仲同弗蘭肯斯坦講自己做咗啲乜。
隻怪獸嘅經歷改
根據隻怪獸講，佢離開咗實驗室之後，就一支公去咗野外生活；佢發覺人類又驚又憎佢，一見到佢就郁手攻擊，於是佢就搵咗地方匿埋唔敢見人；佢打後搵到間荒廢咗嘅屋，就喺嗰度定居；間廢屋隔離有戶窮困人家，係一個盲公同佢老婆仔女；隻怪獸見到佢哋咁窮咁慘，就暗中幫佢哋做斬柴、剷雪同其他工作；怪獸一路喺嗰度住咗幾個月，經歷咗好多嘢－隻怪獸靠住偷聽隔離嗰屋人講嘢嚟學識講嘢，仲搵到其他人抌低嘅書，從而學識讀寫，而且佢睇到自己喺水入面嘅倒影，得知自己個樣好核突好得人驚；幾個月過咗之後，隨住佢一路幫手，佢對佢隔離嗰屋人愈嚟愈有好感，有一日佢上前同個盲公接觸，成功噉開展對話，但過咗冇幾耐，盲公啲老婆仔女返到嚟，見到隻怪獸就好驚，盲公個仔仲郁手攻擊隻怪獸，搞到隻怪獸落荒而逃；第日，隻怪獸發現嗰屋人搬走咗。經歷咗依單嘢，隻怪獸就放棄嗮所有希望，唔再諗住自己會畀人類接納。打後，佢打算搵返自己個創造者，而佢亦都承認威廉係佢殺嘅，將單嘢嫁禍畀育士甸嘅都係佢。
然後，隻怪獸向弗蘭肯斯坦提出咗個請求：佢覺得身為一隻生靈，佢有權利得到快樂；佢想弗蘭肯斯坦造一隻女怪獸嚟做佢嘅伴；佢應承應弗蘭肯斯坦，話如果自己搵到伴，就會同個伴一齊去南美洲嘅野外嗰度生活，永遠唔會再出現喺人類嘅面前；而如果弗蘭肯斯坦拒絕，佢就會郁手殺埋弗蘭肯斯坦淨低嘅朋友同屋企人，仲會一路殺，殺到完全摧毀嗮弗蘭肯斯坦嘅人生為止。弗蘭肯斯坦想保護佢嘅朋友同屋企人，所以就心不甘情不願噉應承咗。隻怪獸話會睇住弗蘭肯斯坦做嘢。
一連串嘅災禍改
弗蘭肯斯坦喺亨利嘅陪同下去咗英格蘭，不過佢哋喺蘇格蘭巴富嗰度分途（因為弗蘭肯斯坦懷疑隻怪獸暗中跟蹤緊佢）。弗蘭肯斯坦一路郁手整隻女怪獸，一路覺得心寒－佢驚隻女怪獸會憎隻男怪獸，又或者可能隻女怪獸會變到仲衰過隻男怪獸，而且佢又開始想像男女兩隻怪獸生後代，產生成大班怪獸危害人類。驚驚吓，弗蘭肯斯坦頂唔順壓力，郁手將隻未完成嘅女怪獸撕爛咗。然後下一刻，隻男怪獸衝咗入屋（佢的確係跟蹤緊弗蘭肯斯坦），弗蘭肯斯坦唔肯繼續整，隻怪獸淨係可以離開，但佢臨走之前威脅話要令弗蘭肯斯坦受苦。跟住弗蘭肯斯坦決定出海抌嗮佢啲架生，喺艇上面瞓著咗，因為大風而返唔到岸，最後畀風吹咗去愛爾蘭嘅海邊，醒咗之後弗蘭肯斯坦見到亨利嘅死屍，仲畀人拉咗，啲人話亨利係畀人謀殺嘅，因為弗蘭肯斯坦個人喺條屍附近所以係疑兇。弗蘭肯斯坦畀人收監，喺監房入面精神崩潰咁滯。後嚟啲人查咗陣之後，覺得弗蘭肯斯坦係無辜嘅，就放咗佢。心身俱疲嘅弗蘭肯斯坦決定返屋企見佢阿爸同伊利沙伯。
喺日內瓦，弗蘭肯斯坦同伊利沙伯結婚。弗蘭肯斯坦準備埋手槍同匕首，想要同隻怪獸決一死戰。弗蘭肯斯坦同伊利沙伯新婚嗰晚，弗蘭肯斯坦叫伊利沙伯留喺房入面，佢自己去搵隻怪獸。當弗蘭肯斯坦去咗搜屋之際，隻怪獸搵到伊利沙伯，仲狠下毒手勒死佢。隻怪獸跟住出現喺弗蘭肯斯坦面前，畀弗蘭肯斯坦睇到伊利沙伯條屍。弗蘭肯斯坦想開槍射隻怪獸，但隻怪獸最後走甩咗。弗蘭肯斯坦阿爸已經有返咁上下年紀，伊利沙伯嘅死對佢造成重大打擊，於是佢就喺幾日之後死埋。弗蘭肯斯坦乜都冇嗮，於是就周圍追住隻怪獸想報復，一路追勻嗮成個歐洲，去埋俄羅斯，最後追到去北冰洋，曾經一度追到喺隻怪獸嘅 1 英里範圍內，但因為攰得滯凍得滯而倒地，又畀隻怪獸走甩咗－弗蘭肯斯坦就係喺依個時候畀渦頓船長嘅船員發現同救咗上船。
最終結局改
過咗幾日，渦頓船長架船受到重重浮冰圍困，有幾個船員死咗。弗蘭肯斯坦身體好虛弱，但好想殺死隻怪獸，想堅持單獨噉繼續追隻怪獸。
冇幾耐之後，弗蘭肯斯坦變到愈嚟愈虛弱，最後佢同渦頓船長講勸佢要 seek happiness in tranquility and avoid ambition（即係追求平靜和階當中嘅快樂同埋避免野心），過咗一陣弗蘭肯斯坦就斷咗氣。渦頓船長打算帶佢啲船員向南前進，返去安全嘅地方。跟住佢發現隻怪獸上咗佢隻船。隻怪獸企喺弗蘭肯斯坦條死屍前面憑弔咗陣。佢同渦頓船長講嘢，話弗蘭肯斯坦死咗唔會令佢心靈得到平靜，而佢犯嘅種種罪惡只係令佢覺得更加悲哀。到咗最後，隻怪獸下定決心要搵個冇人嘅地方自殺，然後渦頓船長就望住隻怪獸喺風雪之中消失。
影響改
.jpg)
隻怪獸又有畀人叫做「
首先，有關隻怪獸個名：廿一世紀初嘅人好興用英文字 Frankenstein 嚟指科學怪人依個角色，但隻字本來係主角個姓，而原版小說淨係用咗
- The Creature－嗰隻生靈噉解，或者
- The Monster－嗰隻怪獸噉解，
... 等嘅字眼嚟描述弗蘭肯斯坦整嗰隻怪獸。篇文跟住落嚟嘅部份，會用「科學怪人」嚟稱呼依隻怪獸。
《科學怪人》好大影響力，係最出名嘅哥德式小說之一。《科學怪人》有畀人改編做第啲媒體嘅作品，包括咗多部嘅電影，又例如日本嘅著名恐怖漫畫家伊藤潤二（日羅：Junji Ito）有將《科學怪人》改編做漫畫[3]，而英國嘅皇家芭蕾舞團仲有喺 2010 年代嘗試將個故仔改編做芭蕾舞劇[4]。响廿一世紀嘅恐怖故仔至奇幻故仔裏面，科學怪人可以算係成為咗一條橋段[註 2]：喺現代嘅作品當中，科學怪人通常係源於科學上嘅好奇，身體會由多條死屍嘅肉砌出嚟（所以成日畀人當係死靈嘅一種），生得好高大而且又好大力[5]。
主題改
有唔少文壇人士認為，《科學怪人》反映咗所謂嘅科學怪人情結。
佢哋指出，科學怪人同廿一世紀初嘅 AI 有唔少共通點：原則上 AI 可以泛指任何「由人類創造嘅有智能物體」；廿一世紀初嘅主流 AI 係靠住電腦程式嚟實現嘅－研究 AI 嘅人會將電腦程式寫到能夠展現出好似有智能噉嘅行為；不過原則上，「人類攞血同肉嚟造、有智能嘅物體」都可以算係廣義上嘅 AI；文壇人士留意到，人類硬係會對「人類創造嘅有智能物體」有一股恐懼，例如係《科學怪人》依本小說描繪嘅嘢，或者係廿至廿一世紀常見嘅科幻橋段講「有 AI 作反謀害人類」－例子可以睇吓
呀噉。依種對人造智能體嘅恐懼感，就係所謂嘅科學怪人情結[6]。
睇埋改
註釋改
- ↑ 亦即係話原版英文小說個標題，查實係主角個姓。
- ↑ 可以睇吓 TV Tropes 嘅 Frankenstein's Monster。廿一世紀初嘅英文圈又有用 Frankenstein's Monster 呢隻字詞嚟指科學怪人，隻字詞字面上解係弗蘭肯斯坦隻怪獸嘅意思。
攷改
- ↑ Hobbler, Dorthy and Thomas. The Monsters: Mary Shelley and the Curse of Frankenstein. Back Bay Books; 20 August 2007.
- ↑ Aldiss, Brian W. "On the Origin of Species: Mary Shelley". Speculations on Speculation: Theories of Science Fiction. Eds. James Gunn and Matthew Candelaria. Lanham, Maryland: Scarecrow, 2005.
- ↑ Manga legend Junji Ito reflects on the power of Frankenstein. Polygon.
- ↑ Royal Ballet: Frankenstein review – Steven McRae reanimates Shelley's tragic demon. The Guardian.
- ↑ Hitchcock, Susan Tyler (2007). Frankenstein: a cultural history. New York City: W. W. Norton.
- ↑ Olander, editors Patricia Warrick, Martin Harry Greenberg, Joseph (1978). Science fiction : contemporary mythology : the SFWA-SFRA (1st ed.). New York: Harper & Row. pp. 252.
拎改
| 維基同享有多媒體嘅嘢： Frankenstein |