劍橋公爵

劍橋公爵（英文：Duke of Cambridge，又譯康橋公爵）係英國王室一個世襲嘅爵位。個名係嚟自英國劍橋，由公爵嘅大仔去繼承，曾經多次冊封畀王室成員。最近一次冊封係2011年，畀咗威廉王子；而銜頭繼承人係佐治王子，公爵夫人就係嘉芙蓮。

現任劍橋公爵威廉王子嘅徽章

現任公爵威廉同公爵夫人嘉芙蓮，2012年

簡史

劍橋公爵第一次出現係響1660年，授予畀時任約克公爵占士（即後嚟嘅占士二世）大仔查理斯·斯圖阿特，取代由十二世紀冊立嘅劍橋伯爵。但係查理斯響出世六個月就夭折，銜頭冇辦法正式冊立。1664年，劍橋公爵正式納入英格蘭貴族名單，仲冊封畀約克公爵占士嘅二仔占士·斯圖阿特。占士·斯圖阿特響三歲就早走；同年，響占士·斯圖阿特死後，呢個銜頭再次冊封畀約克公爵占士嘅四仔艾德加·斯圖阿特，但艾德加·斯圖阿特同佢兩個阿哥一樣，響好細個就走咗。1677年，約克公爵占士嘅五仔查理斯·斯圖阿特（同名）再次畀人冊封呢個爵位，但無耐又死咗。

1706年，劍橋公爵畀人重新冊立並且畀咗漢諾威選侯基奧格一世·路德維希（即後嚟嘅英王佐治一世）個仔基奧格·奧古斯特。當基奧格·奧古斯特響1727年成功登基成英王佐治二世個陣，表示住呢個爵位返到國王手上。

1801年，佐治三世七仔阿道夫畀人冊立為劍橋公爵，再次入選英格蘭貴族名單。後嚟響1850年，爵位由阿道夫個仔佐治王子繼承。由於佐治王子同佢老婆係貴庶通婚，佢哋嘅後代冇繼承權，所以劍橋公爵由佐治王子響1904年死咗一刻再一次畀人丟空。

1999年伊利沙伯二世細仔愛德華王子結婚嗰陣，曾經盛傳佢會畀人冊封做劍橋公爵或者修適士公爵。最後愛德華畀冊立為韋息士伯爵，2023年繼承愛丁堡公爵銜頭。

2011年4月29號，即威廉王子同嘉芙蓮結婚當日，王室宣佈威廉王子得到「劍橋公爵」銜頭，係呢個爵位一百幾年後再次有人用。

歷任劍橋公爵

斯圖亞特王朝

1660年

名	樣	生	死	配偶	註
查理斯·斯圖阿特	N/A	1660年10月22號 伍斯特公園廳	1661年5月5號 白廳宮	N/A	占士二世同安妮·海德大仔 因早死而未趕得切冊立

1664年第一次冊封

名	樣	生	死	配偶	註
占士·斯圖阿特		1663年7月12號 聖占士宮	1667年6月20號 列治文宮	N/A	占士二世同安妮·海德二仔

1667年第二次冊封

名	樣	生	死	配偶	註
艾德加·斯圖阿特	N/A	1667年9月14號 聖占士宮	1671年6月8號 列治文宮	N/A	占士二世同安妮·海德四仔

1677年

名	樣	生	死	配偶	註
查理斯·斯圖阿特	N/A	1677年11月7號 聖占士宮	1677年12月12號 聖占士宮	N/A	占士二世同瑪麗王后大仔 因早死而未趕得切冊立

漢諾威王朝

1706年第三次冊封

名	樣	生	死	配偶	註
佐治·奧古斯都		1683年11月9號 漢諾威海恩豪森	1760年10月25號 倫敦肯星頓宮	顏斯巴赫嘅嘉芙蓬	佐治一世大仔 1727年登基成佐治二世

1801年第四次冊封

名	樣	生	死	配偶	註
阿道夫王子		1774年2月24號 白金漢宮	1850年7月8號 倫敦劍橋廳	黑山-卡素嘅奧古斯卓	佐治三世同莎樂皇后七仔
佐治王子		1819年3月26號 倫敦劍橋廳	1904年3月17號 倫敦劍橋廳	Sarah Fairbrother	阿道夫王子同奧古斯卓個仔

因為佐治王子同老婆Sarah Fairbrother係貴庶通婚，根據《1772年王室成員婚姻法》，佢哋嘅後代冇權繼承爵位。

溫莎王朝

2011年第五次冊封

名	樣	生	死	配偶	註
威廉王子		1982年6月21號 倫敦聖瑪麗醫院	N/A	嘉芙蓮·伊利沙伯·密道頓	查理斯三世同第一任老婆戴安娜王妃大仔 依家係英國王位第一繼承人