功能主義（英文：functionalism）係一種心靈哲學觀點。
呢個觀點主張，要判定一件物件「係唔係心靈」係應該以佢嘅行動同傾向定義嘅：要將物件分類，可以運用至少兩個方法，
- 一係靠佢哋嘅物料分，
- 二係靠佢哋嘅功能嚟分，例如係一張枱噉，一張木抬同石枱喺物料上唔同，具有唔同嘅物理成份，但功能同行為上相同（有一個表面，能夠俾人擺啲嘢喺上面等），所以用功能嚟分可以算係同一種物件。功能主義主張嘅就係，心靈係一種功能上嘅物件分類－假想而家有一個用血肉造嘅腦同一個用電子零件造嘅電腦，兩者都係能夠做運算嘅物體，而如果嗰部電腦能夠有齊嗮血肉造嘅腦嘅功能（感受情緒、學習知識、對事物作出判斷等）嘅話，噉佢就可以算得上係一個「心靈」－功能主義者認為，如果有一個人工智能或者一個（例如）外星人嘅腦（化學成份可能同人腦好唔同），而佢係有齊嗮人類智能嘅功能嘅話，佢都可以算得上係一個心靈。
