心靈哲學

心靈哲學sam1 ling4 zit3 hok6（英文：philosophy of mind）係哲學嘅一個子領域，專門思考有關心靈嘅問題，同心靈科學領域好有關係。

定義心靈

内文：心靈

定義上，心靈哲學就係專門諗心靈（mind）相關嘅問題。所以要搞心靈哲學，首先要問以下呢條問題：

「

何謂心靈？

」

對於呢個問題，廿一世紀初嘅心靈科學普遍採用功能主義（functionalism）。呢個觀點主張，要判定一件物件「係咪心靈」係應該以件物件嘅行動同傾向嚟定義嘅：要將物件分類，可以運用至少兩個方法，

• 一係靠佢哋嘅物料嚟分；
• 二係靠佢哋嘅功能嚟分；

例如一張枱噉，一張木造嘅枱同鐵造嘅枱喺物料上唔同，具有唔同嘅物理成份，但功能同行為上相同（有一個表面，能夠俾人擺啲嘢喺上面），所以用功能嚟分可以算係同一種物件。心靈功能主義主張嘅就係，心靈係一種功能上嘅物件分類－假想而家有個用血肉造嘅腦同一個用電子零件造嘅電腦，兩者都係能夠做運算嘅物體，而如果嗰部電腦能夠有齊嗮血肉造嘅腦嘅功能－即係感受情緒、學習知識同埋做決策呀噉－嘅話，噉佢就可以算得上係一個「心靈」。廿世紀後半橛以至廿一世紀初嘅認知科學家一般都抱持功能主義觀點，認為如果有一個人工智能或者一個（例如）外星人嘅腦（喺化學成份上可能同人腦好唔同），而佢係有齊嗮人類智能嘅功能嘅話，噉佢都可以算得上係一個心靈。

心腦之別

描繪一個腦喺度諗嘢嘅圖；腦同心靈係咪同一樣嘢？

睇埋：心腦同一論同Ghost in the machine

廿一世紀初嘅心靈哲學同埋相關領域多數都認同心腦同一論（mind-brain identity theory），意思即係主張腦等同於心靈。根據典型嘅心腦同一論，心靈入面發生嘅事－感知、思緒同想像等等－冚唪唥都同腦入面發生嘅物理事件（例如神經細胞之間嘅訊號）有所對應。

基本上，一個相信心腦同一論嚟研究心靈嘅人會攞住佢研究嗰種心靈現象，並且用神經成像方法，睇吓個腦嘅邊啲物理特性同佢研究緊嗰種心靈現象有統計相關，靠噉嚟劃出心靈同腦成點樣嘅對應；舉個簡單例子，家陣個研究者研究緊想像力，佢可以一路要受試者做要求想像力嘅工作（假設「想像力」呢個詞有明確嘅定義）一路用腦電圖方法睇住大腦皮層各橛嘅電活動，如果大腦皮層有幾橛嘅電活動同「係咪用緊想像力」完全冇統計相關嘅話，噉呢幾橛大腦皮層當中嘅物理過程就應該同想像力唔啦更。

基於心腦同一論搞嘅認知科學研究喺廿世紀經已取得相當大嘅成功，所以廿世紀嘅科學界基本上接受咗心腦同一論。例如廿世紀中就有心靈哲學家噉樣講：

「

原版英文："The logical objections which might be raised to the statement 'consciousness is a process in the brain' are no greater than the logical objections which might be raised to the statement 'lightning is a motion of electric charges'." 粵文翻譯：對於「意識係腦裏面嘅一個過程」呢一句陳述能夠作出嘅邏輯反駁並唔大過對「閃電係電荷嘅郁動」呢一句陳述能夠作出嘅邏輯反駁。

」

思想實驗

• 桶中腦

Info：哲學喪屍

哲學喪屍（philosophical zombie / p-zombie）係心靈哲學上嘅一場出名思想實驗。

喺 1974 年，有哲學家提出咗場噉嘅思想實驗：想像家陣有隻生物係所謂嘅「哲學喪屍」，呢隻生物喺各種物理性質上同一個正常嘅人類完全一個板，但唯獨冇意識同感質－噉講意思即係話，當一隻哲學喪屍（例如）俾啲尖嘅嘢拮到嗰陣，佢實際上唔會感覺到任何嘅痛楚，不過佢曉做出嗌痛、「塊面有痛嘅表情」同埋「嘗試避開支針」等正常人類覺得痛嗰時會有嘅一切行為。

哲學喪屍喺心靈哲學嘅討論上成日引發到人嘅思考：

• 有唔少主張「心靈同身體係兩樣分開嘅嘢」呢種觀點嘅哲學家都會用哲學喪屍嚟作出論證，嘗試用某啲方法證明哲學喪屍呢樣嘢係有可能存在嘅－一般認為，如果佢成功證明哲學喪屍有可能存在，就會表示正常人類有一啲哲學喪屍冇嘅嘢，噉亦都表示心靈並唔係完全物理性嘅（心身二元論最重要嗰個諗頭）。
• 除此之外，亦都有唔少哲學家鍾意思考喪屍世界（zombie world）嘅問題－即係想像一個「身邊嘅人查實冚唪唥都係哲學喪屍」噉嘅世界，帶出咗「點樣知道身邊嘅人係咪真係有意識同感質？」等嘅問題。

科學思考

内文：心靈科學

睇埋

• 認知科學（認知）
• 知識論