南韓干政風波

 南韓干政風波（粵拼：naam4 hon4 gon1 zing3 fung1 bo1） 係指2016年10月揭露韓國總統朴槿惠親信崔順實利用同總統關係，干預國政，並且懷疑強迫多個財團向崔順實嘅基金會揼水，違反憲法同多項法律，而且擾亂市場運作嘅醜聞。韓國好多地方啲人出街、遊行、示威。醜聞最終令到朴槿惠落台。

國民反應

首爾由2016年10月29號開始，連續六個禮拜六舉行反對總統朴槿惠嘅大型集會，主辦單位話12月3號嗰次有一百七十萬人出席，突破上個禮拜嘅紀錄，全國加埋超過二百一十萬人參加類似集會。數以十萬計嘅民眾，再次聚集響首爾光化門廣場，要求涉及親信干政醜聞嘅總統朴槿惠落台，部分人舉起拘捕朴槿惠嘅牌，雖然朴槿惠早前第三次同國民道歉，又承諾交由國會決定佢嘅去留。不過民眾並唔接受，連續第六個星期六舉行集會，講明直到朴槿惠落台為止。全國都有類似咁嘅集會。集會前，示威者遊行到總統府青瓦台一百米前嘅地方，以人鍊方式包圍總統府。之後沿住首爾市中心，遊行到光化門舉行燭光集會。

朴槿惠被彈劾

南韓三大在野黨，響2016年12月3號向國會提交彈劾動議，有一百七十一個議員簽咗名。動議指控朴槿惠容許親信崔順實干政合謀受賄，同埋喺2014年超過三百人死亡嘅世越號海難，指朴槿惠處理唔妥。在野黨正喺度游說執政新國家黨「非朴派」嘅議員支持。南韓中央日報報道話，「非朴派」要求朴槿惠響當地時間12月7號下晝六點前，宣布明確嘅落台時間，之後先再決定係唔係參加表決。所以朴槿惠屆時係唔係直接宣布落台時間，同埋提及權限轉讓問題，將會成為決定彈劾案過唔過到嘅關鍵。青瓦台相關人士話，為討論總統表明立場之類嘅問題，正考慮同新國家黨「非朴派」議員會晤。

議案響12月8號嘅國會全體會議報告。12月9號，國會以234票贊成彈劾朴槿惠動議，超過規定嘅三分之二，即係二百名議員，動議交畀憲法法院裁決。朴槿惠被暫停總統職務。

2017年3月10號，憲法法院代院長李貞美宣佈，八個法官一致同意國會嘅總統彈劾案，親信干政事件就係主要彈劾理由。朴槿惠正式被罷免，成為南韓首個被彈劾落台嘅總統，同時喪失總統刑事豁免權，將要就涉嫌受賄同濫用職權等罪名接受檢察部門調查問話。

李貞美亦話朴槿惠拒絕接受當面調查，冇維護憲法嘅意志，相當於嚴重嘅違法行為，違背咗國民信任，對憲法、秩序產生好大嘅負面影響。

公佈判決前後，大批支持同反對彈劾朴槿惠嘅民眾響憲法法院出面聚集，而反朴槿惠嘅民眾要求佢即刻落台。南韓當局啟動最高級別警戒令，出動超過八千警力同三百六十部巴士響憲法法院外戒備，首爾市中心同青瓦台附近一帶亦加強保安。