博多區

博多區（粵音：bok³ do¹ keoi¹）係福岡縣福岡市七個市轄區之一。

博多係福岡縣廳嘅所在，亦係福岡嘅交通中心，博多站、博多港、福岡機場都喺呢度。另外九州嘅交通大動脈國道3號穿過博多，所以佢係福岡市同其他地方、乃至同外國交流嘅交通樞紐。

地理

喺地圖上望，博多大概係福岡市嘅東部地方，個樣係西北東南走向嘅長長伸出嘅區域。西北面同中央區隔住條那珂川，正西面同南區隔住那珂川同鹿兒島本綫。北面係東區，東面係志免町，東南面係大野城市，西南面係春日市。

西北邊係臨博多灣嘅港灣地區，係博多港嘅核心。喺博多埠頭有去壹崎島、對馬島、五島、玄界島嘅波音929渡輪航班。西北部地方就係舊時嘅港市、商業重鎮「博多」，係比得上天神嘅福岡商業旺地。那珂川同博多川之間嘅地方叫做「中洲」，係九州第一嘅歡樂街。市區東南部就係博多站。博多站週邊係辦公樓、酒店林立嘅商業區。

佢係福岡縣廳駐地，喺眾議院總選舉區中屬福岡縣第一區。

1972年 4月1號，喺福岡市升為政令指定都市嘅時候同時設區。佢係當時福岡市咁多個區當中唯一保留咗當地固有地名嘅區。