卡位
卡位（Booth Seat）係類似舊時火車卡，面對面嘅包廂形式座位，中間隔住張檯，畀人去食嘢、擺嘢、傾生意、傾保險……等等；最少可以有一人坐一邊嘅兩人卡位，同埋最多可以兩邊加埋坐六至八個不等嘅多人式坐位。
最常見到卡位嘅地方係一啲茶餐廳同埋西餐廳裡面，不過而家好多中菜酒樓同埋一啲特色食肆或者咖啡小店好似星巴克（Starbucks）咁，都特登整啲卡位，等人客有個私人空間嘅感覺。
好多高級少少嘅地方嘅卡位都會採用梳化設計，等人客可以坐得舒舒服服，但係一般嘅茶餐廳之類就會簡單咁用木板櫈，因為比較易清潔同埋唔使太多嘅保養。
除咗餐廳食肆會搵到卡位之外，其實喺一啲交通工具上面都可以發現到，好似一啲行走中國大陸嘅火車就有卡位。而喺香港，往來市區同離島嘅某啲渡海小輪上面都會搵到類似卡位嘅座位。