卡爾十六世古斯塔夫

(由卡爾十六世跳轉過嚟)

卡爾十六世·古斯塔夫Carl XVI Gustaf1946年4月30號—),全名卡爾·古斯塔夫·福爾克·休伯圖斯(英文:Carl Gustaf Folke Hubertus),係當今瑞典國王,1973年上任做到依家。佢同時亦係瑞典史上做得最耐嘅國王,而響全世界就僅次於英女皇伊利沙伯二世同埋丹麥女王瑪嘉烈二世

卡爾十六世古斯塔夫
Carl XVI Gustaf
瑞典國王
Crafoord Prize EM1B0726 (42329293351).jpg
卡爾十六世響2018年
在位1973年9月15號 -
加冕1973年9月15號
前任古斯塔夫六世阿道夫
私人明細
配偶西爾維亞王后
仔女維多利亞王儲
卡爾菲臘王子
馬德蓮公主
全名卡爾·古斯塔夫·福爾克·休伯圖斯
皇族伯納多特王朝
古斯塔夫·阿道夫親王
薩克森-高堡-哥達嘅施比拉公主
出世 (1946-04-30) 1946年4月30號(75歲)
瑞典 瑞典哈加宮
卡爾十六世古斯塔夫嘅簽名

簡歷

早年

 
卡爾同佢屋企人嘅合照,前排由左至右係阿媽、二家姐貝爾吉塔公主、四家姐克里斯蒂娜公主、三家姐德茜維公主,後排就係老豆同大家姐瑪嘉烈塔公主

卡爾十六世1946年響哈加宮(原本叫王后樓)出世,係西博藤公爵古斯塔夫·阿道夫親王施比拉公主最細嘅細路(同時亦係獨仔)、古斯塔夫阿道夫(嗰時係瑞典王儲)嘅長孫,上有四個家姐。響佢出世兩個月後,就到皇家教堂受洗。

因為個時瑞典國王係傳男不傳女,所以佢一出世就係瑞典王位嘅第四繼承人。同時,佢響無耐亦授予賈姆特蘭公爵呢個銜頭。

本身預計係由佢老豆西博藤公爵古斯塔夫·阿道夫親王繼承王位,之後先傳到卡爾。點知,西博藤公爵響1947年1月死於哥本哈根機場空難。由於佢老豆本身係大仔,係預定王位繼承人;但佢早死,而卡爾又太細個,唔可以勝任呢個位,就引發一系列嘅王位繼承爭議。當時,佢兩位叔叔都因為同平民結婚而放棄王室成員身份,所以最有聲望可以成為繼承人嘅係佢三叔伯達爾親王。但隨住爺爺古斯塔夫六世一直都冇立伯達爾做王儲,即係表示一定會傳畀大個咗後嘅卡爾。

1950年,佢太爺古斯塔夫五世死咗,由佢爺爺古斯塔夫六世繼位,卡爾亦因為咁而升為王儲。

接受教育

 
1961年,卡爾響瓦薩號旁邊

佢細個嘅時光一直響皇室度過,亦響王宮入面接受教育。後嚟佢先後升讀Broms school同埋Sigtuna boarding school。

1966年,當佢高中畢業後,就到瑞典陸軍瑞典海軍瑞典空軍接受兩年半嘅軍事訓練。1968年,佢完成咗軍事訓練,而因此升到上尉(陸軍同空軍)同中尉(海軍)。佢亦曾經到烏普薩拉大學斯德哥爾摩大學讀歷史、社會學、政治科學、財務權益同埋經濟學。

身為王位未來繼承人,佢接受咗好多教育,主要係法律系統、社會組織、工會、協會等等;另外佢仲會認真學習議會、政府各部嘅職能同工作方式,加埋點樣處理外交事務;佢更加響瑞典常駐聯合國代表團、瑞典國際發展代辦處、倫敦一間銀行、瑞典駐英國大使館、瑞典駐法國商會同埋Alfa Laval法國分廠做過嘢。

1970年,佢代表老國王,帶領代表團到日本大阪參加世博會

雖然佢讀咗好多書,但佢患有讀寫障礙。呢點亦遺傳到佢嘅大女維多利亞同大仔卡爾菲臘

國王時代

 
卡爾十六世響2009年

1973年9月,老國王古斯塔夫六世死咗,同日卡爾接任,成為瑞典國王,稱號係卡爾十六世古斯塔夫。雖然佢上位個時國王依然有最高權力,但議會逐漸有權威。

1974年,瑞典議會正式改咗瑞典憲法,由國王係最高元首,改為係虛位元首;國王只不過係純粹係代表性同埋禮儀性,而最高權力就響首相到,並且首相原先要由國王任命,依家就要由議長提名;而議會嘅法案都唔使經國王批准。總之依家國王只不過係個象徵。

另外,國王亦會代表瑞典對外國國事訪問、主持瑞典國會每年嘅開會儀式等等;名義上仲係瑞典三軍嘅最高統帥,但冇權指揮,除咗真係屬於佢嘅皇家軍事參謀(His Majesty's Military Staff);另外佢都有權任命或廢除任何一位王室成員。

佢仲會頒發每年嘅諾貝爾獎得主。第一個接受佢頒獎嘅人係江崎玲於奈

按照原本嘅瑞典憲法,王位係傳男唔傳女,所以佢個仔卡爾菲臘當然係王位繼承人。但卡爾十六世出於性別平等,之後唔理反對聲音,要求通過憲法修正案,令到佢家姐(卡爾十六世嘅大女)維多利亞響1980年成為瑞典史上第一位女王儲[1]

2000年,當時有厭食症嘅維多利亞王儲響健身室識咗丹尼爾·威士特寧,之後仲拍拖。卡爾十六世知道後非常反對。但係丹尼爾肯去學嚴格嘅皇室禮儀,最終得到咗國王嘅接受。佢哋響2009年結婚,而丹尼爾亦破天荒被封為「丹尼爾親王,西約特蘭公爵」。

2019年,佢宣佈分別取消卡爾菲臘王子嗰兩個仔亞歷山大王子加百列王子,同埋瑪德蓮公主三個仔女莉奧諾公主尼古拉斯王子愛卓恩公主嘅「殿下」銜頭[2]

2020年12月,卡爾十六世批評瑞典應對武漢肺炎嘅手法失敗。一個月後,佢宣佈會打疫苗[3]

阿仔卡爾菲臘王子曾經響2020年11月對武漢肺炎檢測呈陽性;響2021年3月,佢大女維多利亞王儲同老公丹尼爾一齊確診肺炎[3]

屋企

 
卡爾十六世同西爾維亞王后,攝於1976年
內文:卡爾十六世同西維爾亞王后嘅婚禮

卡爾十六世個老婆叫西爾維亞王后(婚前名:西爾維亞·索摩拉特,英文:Silvia Sommerlath),係一位德國巴西混血兒(老豆德國人・阿媽巴西人)。響1972年奧運會上,卡爾十六世識咗當時係一位翻譯嘅西爾維亞。國王後嚟話,當時佢哋一見面就「clicked」咗。

1976年6月19號,兩個人正式結婚。婚禮響斯德哥爾摩大教堂舉行,由時任烏普薩拉大主教奧羅夫·桑比主持。響1980年,卡爾十世六為咗畀細路有個更大嘅庭院,於是就搬咗去德羅汀漢皇宮(又叫卓寧霍姆宮)。

佢同老婆西爾維亞王后有三個仔女:

另外,卡爾十六世同多位歐洲國家嘅現任王室成員有血緣關係:其中丹麥女王瑪嘉烈二世係佢表姐(卡爾十六世個老豆西博藤公爵,同瑪嘉烈二世個阿媽英格麗公主係兄妹關係);前任希臘王后安妮-瑪麗係卡爾十六世個表妹(瑪嘉烈二世個細妹);而薩克森-高堡-哥達王朝現任王室首領安德烈阿斯係佢表哥(阿媽施比拉公主個細佬腓特烈·約西亞斯個仔)。

個人生活

 
卡爾十六世同西爾維亞王后,響出席大女維多利亞王儲嘅婚禮上

卡爾十六世嘅興趣廣泛,熱心於環保、科技、農業、貿易同埋工業等等事務;另外佢同好多瑞典王室成員一樣,都對情有獨鍾,其中佢最鍾意嘅一架車係Porsche 911s(佢同西維爾亞王后第一次影相嘅地方就係響呢架車入面);另外佢仲鍾意Volvo PV444、 Ferrari 456M GT同埋AC Cobra 等等。

響2005年夏季,佢揸車時響北雪平發生交通意外。雖然並未有任何傷亡,但依然畀傳媒大肆炒作。

佢經常帶老婆出去外國睇夏季同冬季奧運,其中包括2014、2016同2018。

風俗店風波

2010年11月,卡爾十六世畀人爆出佢成日去風俗店同埋通姦(即同其他女人有性行為),由《Carl XVI Gustaf – Den motvillige monarken》爆料,響瑞典引起轟動;不過無耐風波就平息咗[4]

直到2011年5月,有人影到佢同另外兩個女人一齊裸體嘅相,有傳指同拳擊手兼性俱樂部負責人Mille Marković有關,響國內又一次引起討論。卡爾十六世發表聲明,話自己冇去過風俗店,更加話自己唔會因為咁而退位。但係佢嘅公信力因此而下跌,有人要求佢退位。響2011年嘅民望調查中,相比起醜聞之前,佢嘅支持度跌到去64%,少咗近44%[4][5]

2011年12月,報紙Expressen指出,個張裸體相其實係卡爾十六世響1976年同王后影嘅相,後嚟畀人改成兩個裸體女人,即係呢張相係畀人P圖咗嘅[6][7]。而Mille Marković之前亦試過整啲新聞出嚟去嚇一位名人[8][9]

值得注意嘅係,賣淫響瑞典係合法嘅,但買春就係犯法嘅,即可以賣但唔可以買[10][11]

活動

卡爾十六世係世界童軍組織嘅名譽主席,成日參加國內外嘅童軍活動。佢亦會定期參觀世界童軍大露營。1981年,佢畀世界童軍組織頒發銅狼獎,紀念佢對童軍事業做出嘅貢獻。

佢同埋沙特阿拉伯前國王阿卜杜拉·賓·阿卜杜-阿兹兹·阿爾-沙地都係童軍和平使者

銜頭同徽章

銜頭

  • 1946年4月30號ー1946年6月7號:瑞典嘅卡爾·古斯塔夫王子殿下
  • 1946年6月7號ー1950年10月29號:瑞典嘅卡爾·古斯塔夫王子,賈姆特蘭公爵殿下
  • 1950年10月29號ー1973年9月15號:瑞典王儲卡爾·古斯塔夫,賈姆特蘭公爵殿下
  • 1973年9月15號ー:瑞典國王卡爾十六世·古斯塔夫陛下

雖然好多瑞典國王都叫「卡爾」,但其實佢地原名都唔係咁叫(就好似卡爾十四世約翰,佢原本叫尚ー巴堤斯特·伯納多特),好多時係國王自己揀嘅。

  1. Nyheter, Erik Rolandsen / ABC (2010-11-03). "Venter i spenning på skandalebok om kong Carl Gustaf". www.abcnyheter.no (挪威文). 喺2021-07-07搵到.
  2. 梁凱怡 (2019-10-09). "瑞典王室取消五名王孫殿下名銜 放下包袱一身輕". 香港01 (中文). 喺2021-08-05搵到.
  3. 3.0 3.1 https://www.facebook.com/ETtoday. "瑞典王室又染疫!王儲維多利亞公主夫婦確診新冠肺炎 | ETtoday國際新聞 | ETtoday新聞雲". www.ettoday.net (中文). 喺2021-08-05搵到.
  4. 4.0 4.1 "Svenskekongen anklages for ville fester og kvinneaffærer". www.vg.no (巴克摩挪威文). 喺2021-07-07搵到.
  5. "スウェーデン国王:風俗店通い疑惑…本人否定、退位論も - 毎日jp(毎日新聞)". web.archive.org. 2011-06-19. 喺2021-07-07搵到.
  6. Amster, Harry (2012-03-25). "Camilla Henemark kan själv". Svenska Dagbladet (瑞典文). ISSN 1101-2412. 喺2021-07-07搵到.
  7. Intervju med Kungen och Silvia (1976) (Från 100 höjdare) (英文), 喺2021-07-07搵到
  8. Radio, Sveriges. "Kungens vänner försökte köpa dementi - Nyheter (Ekot)". sverigesradio.se (瑞典文). 喺2021-07-07搵到.
  9. "Mille Markovic gripen för anstiftan till mord". www.aftonbladet.se (瑞典文). 喺2021-07-07搵到.
  10. "【トレビアン】世界の変わった法律! 売春が合法の国!?". ライブドアニュース (日文). 喺2021-07-07搵到.
  11. Weng, Sid (2016-04-08). "法國通過禁止買春法案 成為第5個「罰嫖不罰娼」歐洲國家". The News Lens 關鍵評論網 (中文). 喺2021-07-07搵到.