三原色

  「原色」跳轉到呢度。想搵專輯，請睇「原色 (專輯)」。

原色（粵拼：jyun4 sik1）係指唔可以透過其他色溝出嚟嘅基本色，分加色法原色同減色法原色兩種；因為兩種都係三隻原色，又叫三原色。

加色法嘅三原色

減色法嘅三原色

加色法三原色

加色法原色(又稱光源三原色)指紅、綠、藍，係光嘅三原色光，溝埋就會變白，係 RGB 色彩模式嘅基礎。

減色法三原色

減色法原色(又稱反光三原色、顏料三原色)指用顏料或者染料溝色溝唔出嘅色，唔同領域喺定義上有少少出入。喺光學，減色法原色就即係加色法原色嘅互補色，換句話即係青色（cyan）、桃紅（magenta）同黃（分別同紅、綠同藍互補）。減色法三原色溝埋，理論上應該係黑色，但係因為顏料同染料唔係純色，實際上並唔會得出黑。

喺視覺藝術，傳統上唔會講得咁仔細，而係講三原色係紅、黃、藍，無論係設計（唔恁印刷嗰陣）、影相（構圖嗰陣）、畫畫等等都係。

印刷講求準確，用嘅原色比較接近光學講嘅版本，都係叫青（cyan，簡稱 C）、桃紅（magenta，簡稱 M，有人叫 ｢紫｣）同黃（yellow，簡稱 Y），但係雖然色名一樣，其實深淺唔同。例如印刷嘅青其實係一種特定嘅藍，唔係光學上講嘅青，印刷嘅黃亦其實係一種特定嘅深黃，而唔係光學上講嘅黃。印刷上嘅三原色，再加埋實際上溝唔出嘅黑（簡稱 K），即係標準嘅青、桃紅、黃同黑（CMYK）四色，用 CMYK 四隻油墨印彩色嘢叫四色印刷，四色印刷嘅數學模型叫 CMYK 色彩模式。