構圖
構圖（粵拼：gau3/kau3 tou4）係視覺藝術上嘅一個概念。一幅視藝作品嘅構圖指嗰幅作品當中唔同物件嘅位置－包括每件物件相對個框嘅位置以及彼此之間嘅相對位置：一幅視藝作品－例如係一幅畫或者一張相－當中會有若干件藝術元素；藝術元素包括咗線、形狀同色水等；每件元素會喺幅作品上有個位置以及相對於第啲元素嘅位置。視藝上對構圖嘅思考就旨在要諗[1][2]
- 「藝術元素嘅位置要點安排，先可以賦予幅作品結構同埋表達藝術家嘅意圖，造出令人覺得賞心悅目嘅作品。」
以荷蘭畫家維梅爾（Johannes Vermeer）嘅其中一幅出名作品《畫畫嘅藝術》為例，《畫畫嘅藝術》個構圖簡單講如下：圖中有掛毯、畫家同模特兒等嘅多件物件，當中個畫家線條上大致垂直（線），佔嘅空間大致成四方形（形狀），形態係一個坐喺度嘅人（形態），置於塊掛毯之後同個模特兒之前（相對第啲元素嘅位置；塊掛毯將觀眾視線引入個畫家身處空間），離右邊界距離大約係成幅畫闊度嘅 1/3（相對於個框嘅位置）[3]。
喺視覺藝術上，構圖扮演咗多種重要嘅作用，包括令幅圖變得更和諧同幫觀眾了解個場景等等。物件彼此之間嘅關係、相似嘅規律之間點樣分群、同物件點樣同背景分離等如果做得好會令成幅作品望落更加和諧，仲可以巧妙噉引導觀眾嘅眼光，令藝術家能夠控制觀眾點樣體驗佢幅作品（例如《畫畫嘅藝術》當中塊掛毯將觀眾眼光引入個畫家身處嘅空間）[1][2]。事實係，認知心理學（研究認知嘅心理學子領域）上對視知覺嘅研究表明咗，一幅圖像嘅構圖會影響觀眾嘅眼珠點郁動以至觀眾有幾鍾意幅作品[4][5]。
藝術元素
編輯
一幅圖像可以揼散做好多細嘅組成部份。喺視覺藝術上思考同埋分析一份作品嗰陣，分析者通常會用某幾樣嘢當做一幅圖嘅基本組成部份，呢啲嘢就係所謂嘅藝術元素。藝術上嘅形式分析會對一份作品嘅元素作出詳細嘅分析，嘗試了解份作品用咗乜元素同埋啲元素以乜嘢方式排列埋一齊（構圖），以及呢啲安排引致觀眾有乜反應[6][7]。喺一般形式分析上，藝術元素可以分做七大種[6][7]：
佈置元素
編輯根據主流藝術學者嘅見解，決定一幅作品嘅藝術元素嘅佈置（構圖）嗰陣有 CRBP 四大因素要考慮[9][10][11][12]：
- 對比（英文 Contrast），指兩件同類嘅藝術元素喺物理性質上有差異，簡例：兩條線唔同長度，或者兩個形狀一個係三角形一個係正方形。
- 節奏（英文 Rhythm），指一個對比方式嘅重複，簡例：幅圖入面有三個喺各方面（顏色、形狀、大細）完全一樣嘅長方形，第二個長方形喺正第一個長方形右邊 10 厘米遠嘅位置（彼此之間相距 10 厘米係呢兩個長方形之間嘅對比），而第三個長方形喺正第二個長方形右邊 10 厘米遠嘅位置（將彼此之間相距 10 厘米呢樣對比重複咗一次）。
- 平衡（英文 Balance），指一個空間兩邊嘅「重量」一唔一樣，一樣嘅話就係平衡，簡例：幅畫入面有兩邊，左手邊有一個大嘅三角形同一個細嘅三角形，右手邊有一個中等大細嘅三角形，噉幅圖喺啲形狀嘅大細上就算係平衡。
- 比例（英文 Proportion），指同類嘅藝術元素之間喺大細同距離同嘅特性上成特定嘅比例，簡例：第一條線同第二條線之間長度比例係 1:2，第三條線同第四條線之間嘅長度比例都係 1:2。
有藝術學者主張，人一般都對喺 CRBP 上具有某啲特性嘅事物有好感，會覺得呢啲嘢有美感。有學者由生物學嘅角度思考：佢哋指出，稍為複雜啲嘅動物都會進化到鍾意顯示嘢食出現嘅物理刺激，例如食昆蟲嘅哺乳類動物會對識郁嘅黑色點點（望落似周圍爬嚟爬去嘅細隻昆蟲）有好感－就算呢啲黑色點點唔係真係昆蟲都好[13]；而人類係一種雜食性動物，所以理論上會進化成對任何望落似有生命嘅嘢－即係對人類嚟講有可能係食得嘅嘢－有上述呢種反應，而有生命嘅嘢普遍都喺 CRBP 上具有某啲特性嘅，例如健康正常嘅生物一般都係左右大致上對稱嘅，於是人類就進化成會對具有呢啲特性嘅冇生命物體（例如係人造嘅藝術品）有好感，令到對稱性成為受歡迎嘅藝術品常有嘅特徵之一[14]。
節奏
編輯
節奏係構圖嘅一個重要考量：最廣義上嚟講，節奏可以指一連串以特定規律對比嘅刺激；喺音樂上，節奏會係指每隔一段時間就有一串具有某啲特定性質嘅聲出現，而喺視藝上，節奏可以想像成定時通過空間移動[15][16]－例如一棟建築物有若干個窗，而且啲窗之間彼此距離一致（第一個窗同第二個窗之間嘅距離，等如第二個窗同第三個窗之間嘅... 如此類推），又或者係一幅畫入面畫咗四樖樹，而嗰四樖樹彼此之間嘅距離一致，於是睇嗰份作品嘅人如果係以恆定嘅速度移動佢嘅目光嘅話，就會每隔一段特定長度嘅時間就見到其中一個元素（以開始賞畫嘅時間做 0 點，個人喺第 秒睇到第一樖樹，第 秒睇到第二樖樹...），而呢點能夠造到一般俾人覺得靚嘅美學效果[17][18]。
例如係法國印象派始祖莫奈（Claude Monet）嘅《白楊樹》系列當中嘅《四樖樹》（1891 年）噉，喺呢幅畫入面有四樖白楊樹，佢哋之間相隔大致恆定嘅距離（節奏－物件之間以恆定嘅規律成對比），同時四樖樹之間喺距離上有少量嘅不一致，令啲樹望落自然，而且背景嘅物件唔跟節奏，反而更強調四樖樹所形成嘅節奏[19]。順帶一提，亦有藝術界嘅人指出，節奏使唔使完全一致視乎物件係人造定自然：佢哋認為，自然物件多數都係有些少不規律性嘅，所以畫自然物件嗰陣，節奏要帶些少不規律性先會順眼（例如《四樖樹》當中嗰四樖樹之間嘅距離就唔完全一致）；相比之下，好似建築物呢啲人造物件就大可以有完美前後一致嘅幾何性規律[20][註 1]。
黃金比例
編輯藝術界有對構圖嘅數學特性作出思考。有唔少藝術方面嘅工作者同學者認為，構圖上展示某啲數學特性嘅畫會零舍有美感，而黃金比例（ ）就係一個成日俾人指同美感有重大關係嘅數值：想像有兩個數值 同 ， ；如果「 同 之間嘅比例」等同「 同 之間嘅比例」嘅話， 同 就算係成黃金比例，即係話[21]：
有好多藝術界嘅工作者相信，一幅靚嘅畫構圖需要喺某啲方面展示黃金比例；而文藝復興時期嘅意大利藝術家廣泛噉將黃金比例用喺佢哋作品嘅構圖當中[22]，以達文西（Da Vinci）舉世聞名嘅作品《蒙娜麗莎》為例[23][24]：
|
睇埋
編輯文獻
編輯
- Arnheim, Rudolf (1974). Art and Visual Perception: A Psychology of the Creative Eye. University of California Press. ISBN 978-0-520-02613-1.
- Bouleau, C. (2014). The painter's secret geometry: A study of composition in art. Courier Corporation.
- Downer, Marion (1947). Discovering Design. Lothrop Lee & Shepard. ISBN 0-688-41266-1.
- Stebbing, P. D. (2004). A universal grammar for visual composition? (PDF). Leonardo, 37(1), 63-70.
- Langford, Michael (1982). The Master Guide to Photography. New York: Dorling Kindersley Limited. ISBN 0-394-50873-4.
註釋
編輯- ↑ 可以睇埋 TV Tropes 嘅 Sinister Geometry。
引咗
編輯- ↑ 1.0 1.1 Elder, J. H., & Goldberg, R. M. (2002). Ecological statistics of Gestalt laws for the perceptual organization of contours. Journal of Vision, 2, 324–353.
- ↑ 2.0 2.1 Girshick, A., Interrante, V., Haker, S., & Lemoine, T. (1999). Line direction matters: An argument for the use of principal directions in 3D line drawings. Proceedings SIGGRAPH 1999.
- ↑ Critical Assessments: The Art of Painting 互聯網檔案館嘅歸檔，歸檔日期2019年7月8號，..
- ↑ Quian Quiroga, R., & Pedreira, C. (2011). How do we see art: an eye-tracker study. Frontiers in human neuroscience, 5, 98.
- ↑ Vartanian, O., Martindale, C., Podsiadlo, J., Overbay, S., & Borkum, J. (2005). The link between composition and balance in masterworks vs. paintings of lower artistic quality. British Journal of Psychology, 96(4), 493-503.
- ↑ 6.0 6.1 Hatcher, E. P. (1974). Visual metaphors: A formal analysis of Navajo art. West Publishing Company.
- ↑ 7.0 7.1 Glatstein, J. (2016). Formal visual analysis: The elements & principles of composition. The Kennedy.
- ↑ 外語詞彙：藝術元素（element of art）
形式分析（formal analysis）
形態（form） - ↑ Barratt, K. (1980). Logic and design: the syntax of art, science & mathematics. Eastview Editions.
- ↑ Graves, M. E. (1951). Art of color and design. New York: McGraw-Hill.
- ↑ Thompson, T. (1950). Basic layout design: a pattern for understanding the basic motifs in design and how to apply them to graphic art problems. Studio Publications.
- ↑ G. Rowley, Principles of Chinese Painting (Princeton, NJ: Princeton Univ. Press, 1970).
- ↑ P. Lieberman, The Biology and Evolution of Language (Cambridge, MA: Harvard Univ. Press, 1984) pp. 54–55.
- ↑ Stebbing, P. D. (2004). A universal grammar for visual composition? (PDF). Leonardo, 37(1), 63-70.
- ↑ 英文原文：timed movement through space
- ↑ Jirousek, Charlotte. 1995. "Rhythm". In An Interactive Textbook, Ithaca: Cornell University
- ↑ Eiichi Tosaki, Mondrian's Philosophy of Visual Rhythm: Phenomenology, Wittgenstein, and Eastern thought, Volume 23 of Sophia Studies in Cross-cultural Philosophy of Traditions and Cultures, Springer, 15 Nov 2017, pp. 108–109, 130, 139, 158.
- ↑ Piet Mondrian, Neo-Plasticism: Its Realization in Music and in Future Theater, 1922.
- ↑ Rhythm in Art – Master Painting Examples. Draw Paint Academy.
- ↑ GEOMETRIC VS ORGANIC SHAPES 互聯網檔案館嘅歸檔，歸檔日期2020年6月19號，..
- ↑ Dunlap, Richard A., The Golden Ratio and Fibonacci Numbers, World Scientific Publishing, 1997.
- ↑ See How Artists Discover Simplicity as an Art Form in Works Which Reflect the Golden Ratio. artnet.com.
- ↑ Da Vinci and the Divine Proportion in Art Composition. The Golden Number.
- ↑ Livio, M. (2002). The golden ratio and aesthetics. Plus Magazine, 22.
拎
編輯
- （中文） 10種常見繪畫構圖與12種構圖基本原理（繁體中文書面語）
- （中文） 琢磨構圖和配色來傳達故事！用繪圖基本規則繪製哥德風插圖（繁體中文書面語）
- （英文） 藝術與構圖嘅波氏原則