吳孟達

香港男演員 (1952–2021)

吳孟達Ng Mang Tat1952年1月2號2021年2月27號)係香港演員,因為成日同周星馳合作演出而為人所熟悉。

吳孟達
男演員
英文名Ng Man Tat
花名達哥、達叔、三叔
國籍 中國香港
籍貫福建廈門
出世(1952-01-02)1952年1月2號[1]
中國 中國福建廈門
2021年2月27號(2021-02-27)(69歲)
 香港
墓地馬來西亞 馬來西亞柔佛州新山
職業演員
宗教信仰基督教(早年信佛教
網路電影資料庫(IMDb)資訊
第10屆香港電影金像獎最佳男配角

生平 編輯

吳孟達喺福建廈門出世,五歲移居香港,1970年代投考無綫電視藝員培訓班,同期考入嘅重有周潤發同導演林嶺東,以排第五名嘅成績畢業。吳孟達響1975年就經已響無綫電視做配角,拍過無數電視劇,不過一直都冇乜人氣。佢最早嘅演出係《民間傳奇》系列,至1979年佢響《楚留香傳奇》飾演「胡鐵花」,就開始受到注意。

吳孟達講過吓佢啱啱出道嗰陣嘅情形。嗰陣爛賭,到1980年唔單止爭人30萬蚊賭債,重俾無綫雪起,搞到佢想自殺。後來佢修心養性,重新努力,好好研究演技,終於成功爬返起身,重還晒冚嘭唥債。佢唔單止重新喺電視熒幕出現,1981年仲參演咗生平第一部電影《執法者》。

1989年佢同周星馳拍攝《他來自江湖》之後大受歡迎,佢就噉開始紅。日後佢轉戰影壇,拍嘅戲,都幾乎清一色由周星馳主演。佢喺1990年開始進軍電影界,嗰年佢就憑周星馳主演嘅《賭聖》獲提名嗰年香港電影金像獎最佳男配角,到1991年佢終於憑《天若有情》,榮獲金像獎最佳男配角獎。

吳孟達喺電影生涯幾十年,實際上都冇一部係自己領銜主演。但相對其他配角演員,吳孟達就係少數靠演配角而走紅海內外嘅演員。佢參演過嘅唔少電影入面,最為人熟悉嘅都係周星馳電影:《賭聖》、《逃學威龍》、《鹿鼎記》、《審死官》、《逃學威龍2》、《破壞之王》、《九品芝麻官之白面包青天》、《百變星君》、《食神》、《少林足球》等等。其中1990年上演嘅《賭聖》票房勁收四千萬,破咗歷來港產片票房紀錄。1992年周星馳主演嘅五部戲包辦嗰年度票房榜頭五位,其中三部都有吳孟達份。到2001年佢參演嘅《少林足球》再破歷來港產片票房紀錄,收六千幾萬。多年來吳孟達同周星馳合作無間,使到連海峽兩岸一提起吳孟達,亦都會聯想起周星馳,稱之為「搞笑男二號」。[2]

九十年代尾港產片市道不景,吳孟達喺港產片演出大為減少,主要仍然喺周星馳電影亮相。呢段期間佢喺大陸同台灣不斷接演劇集,比較成功嘅係台劇《白色巨塔》同埋大陸戲《流浪地球》。

2021年2月27號因肝癌病逝[3],之後佢嘅骨灰運咗去馬來西亞新山安葬。

信仰 編輯

吳孟達廿幾歲已經係佛教徒,亦都信觀音菩薩、關聖帝君、呂祖師、黃大仙咁多神佛。2015年之後唔知幾時改信基督教,喪禮用基督教儀式舉行。

作品 編輯

連續劇 編輯

網絡電視劇 編輯

電影 編輯

參考 編輯

  1. 生年份眾說紛紜 田啟文解開吳孟達真實年齡之謎. 報OL.
  2. . kknews.cc 每日頭條. 2017-12-06. 喺2021-03-10搵到.{{cite web}}: CS1 maint: url-status (link)
  3. 黃梓桓 (2021-02-27). 孟達入院多時終不敵肝癌逝世 終年70歲. 香港01. 喺2021-02-27搵到.

出面網頁 編輯