哈希姆家族

哈希姆（阿拉伯文：هاشمي），又叫哈希姆王朝，係現存嘅一個家族，舊時係古來氏多個部落嘅其中一個，先知穆罕默德就係呢個家族出身。響近代，呢個王朝統治過漢志、伊拉克同敘利亞，到目前依然掌控住約旦王位。

聖裔哈希姆王朝旗

簡史

早期

哈希姆一開始係古來氏多個部落嘅其中一個氏族，亦係巴努哈希姆嘅分支，原本叫「阿穆爾」。家族名就嚟自哈希姆·伊賓·馬拿夫，先知穆罕默德個阿太。據說佢曾經響一次旱災攞出嘢食畀人，所以就改名叫「哈希姆」。

哈希姆家族成員雖然係穆罕默德嘅女系後人（佢哋係穆罕默德四女法堤馬同阿里所生嘅後人），但佢哋淨係尊法堤馬為家族祖先。

1201年起，哈希姆家族得到世襲銜頭「麥加謝里夫」。

阿拉伯起義

侯賽因：哈希姆家族成員，阿拉伯起義嘅發起人之一，亦係核心人物

1908年，阿卜杜拉·伊拉帕沙個仔侯賽因·賓·阿里繼承咗銜頭「麥加謝里夫」。侯賽因發覺自己開始同當時控制伊斯坦堡嘅青年土耳其黨人敵對；加上話嗮自己都係先知穆罕默德嘅後人，血統唔算低賤，就開始想建立一個完全獨立、脫離奧斯曼帝國嘅阿拉伯國家。雖然奧斯曼方面一早有估到，但侯賽因多次扮到自己好似好忠心，因而對佢冇太大懷疑。

侯賽因有五個仔，其中二仔阿卜杜拉·賓·侯賽因係最有野心嗰位。佢曾經係奧斯曼帝國議會麥加地方代表，期間開始對阿拉伯民族主義有興趣。1914年一戰爆發，侯賽因響阿卜杜拉嘅建議下先表面上扮係支持奧斯曼帝國；另一方面又派人到英國談判，同英國駐埃及高級專員哈里·麥洪見面，侯賽因表示希望起義成功之後建立一個強大嘅阿拉伯國家，而哈里·麥洪就表示同意佢哋建立，但唔可以霸埋同英國有利益嘅跟據點。

1916年6月，響湯馬士·勞倫斯協助下，侯賽因正式發動阿拉伯起義。佢響漢志地區宣佈獨立，建立漢志王國。呢場起義，雖然係令到奧斯曼帝國解體，但由於英國早就同法國偷偷地簽咗《西斯-皮科協定》，所以響起義後侯賽因並冇好似理想咁建立一個大阿拉伯國，而係畀人分咗啲地：敘利亞畀咗法國，伊拉克、外約旦、巴勒斯坦就畀英國搶走。響土耳其宣佈廢除哈里發一職之後，侯賽因又宣佈自己係哈里發。

近代

侯賽因同仔女先後建立唔同政權：

1. 漢志王國
2. 外約旦（即依家嘅約旦）
3. 伊拉克王國
4. 敘利亞王國

其中由於侯賽因建立咗漢志王國，觸動咗伊本·沙地條神經（伊本想要統一阿拉伯半島），所以伊本響1924年出兵打漢志。侯賽因被迫唔撈，將王位交畀大仔阿里·賓·侯賽因，但阿里上任唔夠一年就畀伊本推翻，漢志王國玩完。

二仔阿卜杜拉1921年響英國委派下到外約旦做埃米爾；但外約旦依然英國殖民地。去到二戰，佢睇到英國顧住同納粹德國打、戰後已經唔可以好似以前有咁大實力，就響1946年宣佈獨立。1950年，外約旦改名做約旦。依家約旦國王係阿卜杜拉二世，係阿卜杜拉個太孫。

三仔費薩爾曾經做過敘利亞國王，之後敘利亞畀咗法國，佢就走去英國。後嚟英國擔心伊拉克局勢會變差、自己好難出手管，於是就搵嚟費薩爾做伊拉克國王，佢本人接受咗邀請，響1920年登基。去到第三任（即最後一任）國王費薩爾二世，因為親英嘅作風，響1958年由軍官發動嘅政變入面死咗，伊拉克王國玩完。

世系圖

哈希姆家族世系圖

王國

約旦

約旦王室徽

約旦，全名約旦哈希姆王國，由侯賽因二仔阿卜杜拉響1921年建立。

一戰之後，約旦地區交咗畀英國管。去到1921年，英國決定用約旦河做分水嶺，西邊成爲咗英屬巴勒斯坦，而東邊就係叫外約旦（響阿拉伯文嘅意思係「東約旦」）。英國響國際會議上，將外約旦建立成一個半自主保護國ー外約旦酋長國，立阿卜杜拉做酋長。

二戰後，阿卜杜拉睇到英國實力變差，就響1946年5月25號宣佈獨立，國名改叫「外約旦哈希姆王國」；兩年後外約旦成功佔領西邊嘅巴勒斯坦地區。1950年，外約旦改名叫約旦。

依家約旦國王係阿卜杜拉二世。

約旦歷代國王

名	樣	在位時間	註
阿卜杜拉一世		1921年4月11號ー1946年5月25號	侯賽因二仔
塔利拉·伊本·阿卜杜拉		1951年7月20號ー1952年8月11號	阿卜杜拉一世大仔 因為精神有問題 而將王位交畀大仔侯賽因
侯賽因一世		1952年8月11號ー1999年2月7號	塔利拉大仔
阿卜杜拉二世		1999年2月7號ー	侯賽因大仔 老豆本身立咗哈桑王子做王儲 臨死前改立佢做王儲

伊拉克

伊拉克王國徽

伊拉克王國嘅開國君主係費薩一世。

1920年，英國擔心自己遠響歐洲，管唔住局勢動盪嘅伊拉克，所以就搵嚟親英嘅費薩做國王；佢本人接受咗邀請，響一年後登基。去到1932年，英國決定放手畀伊拉克獨立，但王室依然親英，仲畀英國響當地建立軍事基地。

國王嘅舉動令到阿拉伯民族主義者好反感。佢哋發動多次政變，直至1941年第五場政變成功，由親德嘅拉希德·阿里做首相。拉希德響同年4月發動英伊戰爭，希望趕走英國；但最終都係輸咗畀英軍。拉希德被迫下野，由前首相、親英嘅羅尼·賽義德上台。

但咁樣唔代表國內嘅阿拉伯民族主義者就會收手。佢哋唔可以接受英國持續控制伊拉克，又因為當地人民生活唔好，就越嚟越想踢走英國。最終響1958年，屬於自由軍官組織嘅阿卜杜拉ー卡里·卡塞姆發動軍事政變，殺咗時任國王費薩二世同其他伊拉克王室成員。伊拉克王國玩完，阿卜杜拉ー卡里·卡塞姆成立伊拉克共和國（即今日嘅伊拉克）；自此伊拉克地區就捲入多場戰爭，到依家當地局勢依然係好緊張。

費薩二世死後，佢嘅四叔公（即佢阿爺・費薩一世個細佬）扎里德·賓·侯賽因宣佈自己係伊拉克同敘利亞分支首領（政府未承認）。

伊拉克歷代國王

名	樣	在位時期	註
費薩一世		1921年8月23號－1933年9月8號	由英國擁立 1921年登基
加齊一世		1933年9月8號ー1939年4月4號	費薩一世大仔 響1939年揸跑車出事走咗
費薩二世		1939年4月4號－1958年7月14號	加齊一世獨仔 由於登基嗰陣未成年， 響18歲前由堂叔阿卜杜拉·伊拉攝政 去到1958年政變被殺
阿卜杜拉·伊拉		1939年ー1953年（攝政） 1953年ー1958年（王儲）	阿里·賓·侯賽因二仔 因為堂侄登基嗰陣未成年， 1939年至1953年做攝政王 1953年後出任王儲 1958年政變被殺

伊拉克分支首領

• 扎里德·賓·侯賽因（1958年ー1970年）
• 華爾德·賓·扎里德（現任，1970年ー）

漢志

漢志王國由侯賽因·賓·阿里響1916年建立。

漢志王國響漢志地區建立。漢志地區響阿拉伯世界有住大影響力，因為佢嘅最大城市ー麥加，就係伊斯蘭教聖城。同時，漢志地區自1517年開始就由「麥加謝里夫」統治，而「麥加謝里夫」又係哈希姆家族嘅世襲銜頭，所以算得上係侯賽因嘅地盤。

1916年6月，侯賽因發動阿拉伯起義，推翻奧斯曼帝國，同月佢響漢志地區建立漢志王國。1919年，國王侯賽因宣佈自己係「阿拉伯之王」，宣稱自己已經統一阿拉伯地區。呢個舉動觸動咗另一位想要統一阿拉伯半島嘅貴族ー伊本·沙地條神經，加上伊斯蘭教兩個聖城ー麥加同麥地那ー都位於漢志地區，為第日漢志王國嘅玩完留下導火線。

本身侯賽因同英國達成協議，響起義成功之後。英國要承認佢哋。但由於英國一早同法國偷偷簽咗《西斯-皮科協定》，所以阿拉伯半島並冇統一，反而敘利亞畀咗法國，伊拉克、外約旦、巴勒斯坦就畀英國。響咁嘅情況下，令到侯賽因認為英國背叛咗佢，唔再信任英國政府。漢志先後拒絕承認《凡爾賽條約》同《貝爾福宣言》。1921年，英國提出要託管漢志，侯賽因唔肯。兩年後，英國想同漢志講掂數，都畀侯賽因拒之門外。

1924年3月，響土耳其宣佈廢除哈里發一職兩日後，侯賽因宣佈自己係下任哈里發。呢次徹底激嬲伊本·沙地，認為侯賽因嘅舉動唔符合伊斯蘭教嘅傳統同教義，叫班穆斯林對漢志發動「聖戰」。另一方面，英國因為多次同漢志傾唔埋，就轉為支持伊本·沙地。

1924年8月，伊本·沙地正式出兵打漢志。伊本好快就打下大半個漢志，侯賽因響貴族、生意人等等嘅壓力下，被迫讓位畀大仔阿里。同年10月，麥加淪陷，阿里走難到吉達。最終響1925年12月，吉達都淪陷埋，阿里走佬到伊拉克，漢志王國玩完。伊本響一年後將漢志地區納入「內志同漢志王國」。

歷代漢志國王

名	樣	在位時期	註
侯賽因·賓·阿里		1916年6月10號－1924年10月3號	1916年響起義入面獨立 原先係麥加謝里夫
阿里·賓·侯賽因		1924年10月3號－1925年12月19號	侯賽因大仔 1924年老豆被迫讓位畀佢 1925年畀伊本推翻

敘利亞

1920年3月7號，敘利亞國家大會（Syrian National Congress）成立敘利亞王國，擁立侯賽因三仔費薩（即後嚟伊拉克王國開國君主費薩一世）做佢哋嘅國王，稱號係「大敘利亞國王」。

但由於英國早就同法國偷偷地簽咗《西斯-皮科協定》，國家大會嘅決定徹底影響到佢哋嘅利益，英法兩國根本就會唔承認。所以同年4月，敘利亞由英國轉手畀法國託管，敘利亞王國實際上已經玩完。法國唔中意費薩，就要求佢最遲響6月14號投降。費薩最終投降，畀法國趕走，走難到英國。

敘利亞歷代國王

名	樣	在位時期	註
費薩一世		1920年3月8號－1920年7月24號	由敘利亞國家大會擁立 後嚟畀法國推翻